#GumaMuRugo i Kigali: Abarenga 73 000 basabye impushya ku rubuga rwa Polisi

Yanditswe na Akayezu Jean de Dieu
Kuya 24 Mutarama 2021 saa 09:48
Yasuwe :
0 0

Polisi y’u Rwanda yatangaje ko muri ibi bihe abaturage bo mu Mujyi wa Kigali bari muri #GumaMuRugo, hagaragaye abantu benshi basaba impushya zo gukora imwe mu mirimo n’ingendo zitandukanye.

Imibare ya Polisi y’Igihugu igaragaza ko mu minsi itanu ishize, abaturage ibihumbi 73 bo mu Mujyi wa Kigali basabye impushya binyuze ku rubuga rwashyizweho na Polisi [Online].

Umuyobozi ushinzwe Ibikorwa bya Polisi n’Umutekano, CP Rumanzi George, mu kiganiro na RBA yavuze ko muri abo baturage bose basabye impushya harimo ibihumbi 58 basanze ibyo bazisabiye bifite ireme, bemererwa kujya gukora ibyo bari basabye.

Ku rundi ruhande hari abandi bagera ku bihumbi 15, basabye impushya biza kugaragara ko impamvu batanze zidafatika, bityo ubusabe bwabo buteshwa agaciro.

CP Rumanzi yagize ati “Muri Polisi dufite abashinzwe kugenzura izo mpushya zisabwa n’abantu, ari nayo mpamvu hari abasaba impushya ntibazihabwe kubera ko baba batanze impamvu zidafatika.”

Yakomeje agira ati “Abo bantu bashoboraga guhama mu rugo, ikindi ni abo dusubiza mu rugo, baraza bakavuga ngo nasabye uruhushya narubuze, tukamusubizayo.”

CP Rumanzi yavuze ko hari n’abandi bagicokoza gusa akajya ku rubuga rwo gusaba impushya, umuntu akavuga ngo ashaka kujya Karongi avuye i Kigali kandi aragenda n’amaguru.

Ati “Ntabwo waba ushyira mu gaciro uvuga ko usaba uruhushya rwo kujya guhaha ukava i Nyamirambo kandi uvuye Kimironko mu gihe ibyo ugiye gushakayo wabibona hafi yawe.”

Abarenga ku mabwiriza babaye benshi…

Ubuyobozi bwa Polisi y’Igihugu buvuga ko mu minsi itanu ishize abaturage bo muri Kigali bari muri guma mu rugo, hagaragaye benshi barenze ku mabwiriza.

Imibare ya Polisi igaragaza ko hagati ya 19-23 Mutarama 2021, hafashwe imodoka 1221, byagaragaraga nta gushidikanya ko zarenze ku mabwiriza ya guma mu rugo.

Abantu bagera ku 2489, aba bafashwe ubona ko ibisobanuro ntaho bihuriye no kuba bagiye gutanga serivisi nkenerwa cyangwa izashyizweho nk’iza ngombwa.

Hari kandi n’abandi 141, bafatiwe mu bikorwa bigaragara ko aribyo bishobora gukwirakwiza cyane COVID-19 nk’abafatiwe mu tubari bikingiranye barimo kunywa inzoga.

CP Rumanzi yavuze ko “Ikigaragara ni uko haracyakenewe kongeramo ingufu cyane cyane ab’i Kigali bakumva ko bakwiye kubahiriza guma mu rugo kurusha uko bimeze uku nguku.”

Abaturage by’umwihariko abo mu Mujyi wa Kigali basabwe kubahiriza amabwiriza yashyizweho aho bibaye ngombwa ko bakenera serivisi bagasaba uruhushya ku rubuga rwa Polisi y’Igihugu cyangwa imirongo ya telefoni iriho.

CP Rumanzi yavuze ko abantu bakitwikira ko hari serivisi batanga ariko bakazihinduramo utubari, ingo bakazihindura ibirori, bitegure ko polisi izabafata kandi bazabihanirwa.

Urwitwazo rw’abavuga ko bari muri siporo

Mu mabwiriza yashyizweho muri ibi bihe harimo kuba uretse serivisi za ngombwa, Abanya-Kigali banemerewe gukora siporo ariko batarenze imidugudu yabo.

Ku wa Kabiri tariki ya 19 Mutarama 2021, Minisiteri ya Siporo yatangaje ko abatuye Umujyi wa Kigali bemerewe gukora siporo ku giti cyabo ariko batarenze umudugudu batuyemo.

Mu mibare y’abafashwe barenze ku mabwiriza ya COVID-19, harimo abagiye babwira abapolisi ko barimo gukora siporo.

Minisitiri w’Ubutegetsi bw’Igihugu, Prof Shyaka Anastase yavuze ko nta muturage uzongera kwitwaza ibyo gukora siporo kuko hashyizweho amasaha bazajya bazikoreraho.

Ati “Akenshi nka siporo rwose abantu barayikeneye, ubu rero hafashwe ingamba z’uko siporo yo mu mudugudu izajya itangira saa Kumi n’imwe za mu gitondo ariko ntabwo izajya irenga saa Tatu. Ayo masaha atatu cyangwa abiri wayikora, ariko ntawe uzongera kurenza amasaha kuko polisi izajya ibafata.”

Mu bahawe impushya harimo n’abakora muri serivisi z’ingenzi nko kugemura amafunguro ahantu hatandukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .