Guma mu Rugo mu midugudu itandatu ya Kigali ihagaze ite? (Amafoto na Video)

Yanditswe na Nkurunziza Ferdinand
Kuya 27 Kamena 2020 saa 07:04
Yasuwe :
0 0

Ku mugoroba wo kuri uyu wa Kane, tariki ya 25 Kamena 2020, Leta y’u Rwanda yafashe icyemezo gitegeka imidugudu itandatu yo mu turere tubiri two mu Mujyi wa Kigali kubahiriza gahunda ya ‘Guma mu Rugo’ mu gihe cy’iminsi 15, mu rwego rwo gukumira ikwirakwira ry’icyorezo cya COVID-19.

Iki cyemezo kireba imidugudu ya Kamabuye na Zuba yo mu Kagari ka Nyarurama; Umudugudu wa Nyenyeri wo mu Kagari ka Bwerankori byose byo mu Murenge wa Kigarama ndetse n’Umudugudu wa Ruganwa I, mu Kagari ka Kinunga, Umurenge wa Gikondo mu Karere ka Kicukiro.

Hari kandi n’imidugudu ibiri ariyo Kadobogo na Gisenga yo mu Kagari ka Kigali, Umurenge wa Kigali, mu Karere ka Nyarugenge.

Inzego z’ibanze n’izishinzwe umutekano zasabwe gukurikirana ishyirwa mu bikorwa ry’iki cyemezo ku buryo ishusho y’ubuzima busanzwe yongeye guhinduka muri iyi midugudu yose.

Ibice by’imidugudu yashyizwe muri Guma mu Rugo byashyizweho ibimenyetso byerekana ko abayirimo batagomba kuyirenga ndetse n’abashinzwe umutekano kugira ngo abayituyemo batagira aho bahurira n’abari hanze yayo.

Ubukana bw’ubu bwandu bushya bugaragarira ku ngero za hamwe mu ngo zakuwemo abanduye barenga batanu mu rugo rumwe.

Mu Mudugudu wa Ruganwa I, mu Kagari ka Kinunga, Umurenge wa Gikondo mu Karere ka Kicukiro hari urugo rucumbitsemo imiryango 11, igizwe n’abantu 42 […] rwasanzwemo abanduye COVID-19 bagera ku munani.

Minisiteri y’Ubuzima yatangaje ko ibipimo byafashwe kuva tariki ya 03 Kamena kugeza tariki 24 Kamena, 2020; muri Kigali hagaragaye abantu 34 banduye COVID-19, muri abo 25 bose baturukaga mu midugudu ine yo muri Kicukiro na Nyarugenge.

Minisitiri w’Ubutegetsi bw’Igihugu, Prof. Shyaka Anastase, yavuze ko gushyira iyi midugudu muri Guma mu Rugo bigamije kurinda abayirimo n’abari hanze yayo, asaba abaturage kumva ko atari igihano.

Ati “Byumvikane neza Guma mu Rugo si igihano, Guma mu Rugo ni uburinzi, ni ubutabazi, ni ineza y’abanyarwanda, ni ukugira ngo abantu twirinde iki cyorezo.”

Yasabye abashyizwe muri Guma mu Rugo kugira ikinyabupfura, ntibatangire kujya basurana urugo ku rundi ngo ni uko bari imbere mu mudugudu wagiye muri iyi gahunda.

Igikorwa cyo gupima abaturage bo mu midugudu yashyizwe muri ’Guma mu Rugo’ kirakomeje, aho nko mu tugari twa Kadobogo na Gisenga hamaze gufatwa ibipimo 321.

Ku mugoroba wo ku wa 25 Kamena 2020, Leta y’u Rwanda yafashe icyemezo gitegeka imidugudu itandatu yo mu turere tubiri two mu Mujyi wa Kigali kubahiriza gahunda ya ‘Guma mu Rugo’ mu gihe cy’iminsi 15, mu gukumira ikwirakwira rya COVID-19. Abashinzwe umutekano bashyizwe ahashoboka hose mu rwego rwo gukumira ingendo zose zitari ngombwa
Inzira zinjira cyangwa zisohoka mu midugudu yasubijwe muri 'Guma mu Rugo' zafunzwe
Mu Mudugudu wa Ruganwa I, mu Kagari ka Kinunga, Umurenge wa Gikondo mu Karere ka Kicukiro, abahatuye basabwe kubahiriza gahunda ya Guma mu Rugo
Mu Mudugudu wa Ruganwa I, mu Kagari ka Kinunga, Umurenge wa Gikondo hari urugo rucumbitsemo imiryango 11, igizwe n’abantu 42, rwasanzwemo abanduye COVID-19 bagera ku munani
Abaturage batuye mu midugudu yashyizwe muri 'Guma mu Rugo basabwe kudasurana uko bishakiye bitwaje ko batuye hamwe
Ingendo hagati mu midugudu yashyizwe muri 'Guma mu Rugo' nazo ntizemewe, keretse abagiye guhaha cyandwa indi mpamvu ikomeye
Inzira zinjira cyangwa zisohoka mu midugudu yasubijwe muri 'Guma mu Rugo' zafunzwe
Amaduka acuruza ibikenerwa by'ibanze yo yemerewe gukora muri iyi midugudu
Abaje guhaha ku maduka ntibemerewe kwinjira imbere, ahubwo bazanirwa ibyo bakeneye hanze
Bazanirwa ibyo bakeneye hanze mu kwirinda ko abantu begerana
Kujya guhaha biremewe, ariko ubikora ntarenge umudugudu atuyemo
Urujya n'uruza mu midugudu yashyizwe muri 'Guma mu Rugo' rwahagaritswe
Umukino uzwi nka Dame ni umwe mu yitabazwa muri Guma mu Rugo
Iyi nzu ikingirijwe n'insina yavanywemo abantu 4 banduye COVID-19
Abaturage barahaha kuko amaduka acuruza ibikenerwa by'ibanze yo yemerewe gukora muri iyi midugudu
Urubyiruko rw'abakorerabushake ruri mu bitabazwa mu gukurikirana ko Guma mu Rugo yubahizwa uko bikwiye
Inzu iri iburyo iri mu Mudugudu wa Gisenga, mu Kagari ka Kigali, Umurenge wa Kigali, mu Karere ka Nyarugenge, yabonetsemo umuntu umwe wanduye COVID-19

Amafoto: Niyonzima Moïse
Video: Karangwa Gaspard


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .