Gukoresha umwana yarataye ishuri ni ugukora ibyaha bibiri: Guverineri Mufulukye

Yanditswe na Hakizimana Jean Paul
Kuya 21 Nzeri 2019 saa 04:45
Yasuwe :
0 0

Ubuyobozi bw’Intara y’Iburasirazuba bwatangiye urugamba rwo guhangana n’abantu bakoresha abana mu tubari, mu mabuye y’agaciro, mu bishanga barinda umuceri, ababahindura abakozi bo mu rugo no mu bindi bintu bitandukanye bikoreshwamo abana bari munsi y’imyaka 18, abazajya babasanganwa bakazajya bashyikirizwa inkiko.

Ni mu nama yahuje Guverineri w’Intara y’Iburasirazuba, abayobozi b’inzego z’umutekano, abayobozi b’uturere bagiranye na bamwe mu batanga serivise z’amahoteri, utubari, abahagarariye amakoperative y’abahinzi n’aborozi, abahagarariye urugaga rw’abikorera n’abandi batandukanye.

Umuyobozi w’Urwego rw’ubugenzacyaha (RIB), mu ntara y’Iburasirazuba Herbert Rutaro, yasobanuriye abitabiriye iyi nama ibihano biteganyijwe ku batubahiriza uburenganzira bw’umwana.

Yavuze ko Itegeko Nshinga riteganya ibihano kandi bikakaye yihanangiriza abagikoresha abana mu ngo n’ababakoresha mu mirimo ivunanye ko uwo bazafata azajya ashyikirizwa inkiko.

Rutaro yavuze ko hari ababyeyi banywesha abana inzoga, abandi bakabikoresha ibintu bibarusha imbaraga ibyo byose bifite amategeko abahana kandi ko biteguye kuyakurikiza.

Yakebuye n’abantu baba bafite ububasha ku bana baba abababyaye cyangwa ababarera batubahiriza inshingano zabo kugera ubwo bahindutse inzererezi, avuga ko nabo bafite amategeko abahana.

Guverineri w’Intara y’Iburasirazuba, Mufulukye Fred, yavuze ko hari abana bata ishuri bakajya gukora imirimo irimo gukora mu tubari, gucukura amabuye y’agaciro, abandi bakajya gukora mu bishanga bataye ishuri yibutsa ababakoresha ko baba barimo gukora ibyaha bibiri.

Ati “Uriya mwana ukoresha yarataye ishuri, uba uri gukora ibyaha bibiri, icya mbere uba waramutesheje ishuri, ikindi uba ukoresha umwana imirimo ivunanye ntabwo aba yakagejeje igihe cyo gukora aba akwiriye kujya mu ishuri, uwaba abakoresha wese rero akwiye kwisubiraho.”

Mufulukye yavuze ko hari n’ababyeyi basohokana n’abana babo bagera mu kabari bagatangira gusogongeza wa mwana ku nzoga agira ngo amwumvishe uko imeze.

Ati “Turagira ngo bariya bafite akabari bajye bahita bereka wa mubyeyi ko akoze icyaha nta mwana wemerewe kunywa inzoga bamusobanurire neza bo bidakwiye.”

Murekatete Martha w’imyaka 48 waturutse mu Murenge wa Rwimiyaga mu Karere ka Nyagatare, yavuze ko nk’iwabo haje utubari turarura abana babo asaba buri mubyeyi gufata iki kibazo nkaho bimureba ngo nibwo kizacika.

Ati “Hari ubwo usanga abana bari mu tubari bamwe bakanaceza bambaye ubusa, dukwiye kubikurikirana bigacika kuko ni abana bacu kandi naho bibera ni iwacu ntabwo ari ahandi.”

Umuyobozi wa koperative ihinga umuceri mu Karere ka Gatsibo COPRORIZ Ntende, Rugwizangonga Elysee, yavuze ko kimwe mu bizatuma abantu bareka gukoresha abana mu bikorwa bibavunisha harimo no kubashyiriraho ibihano bikarishye.

Yagize ati “Twe twatangiye dushyiraho ibihano ku bahinzi uwo dufashe tukamuca ibihumbi 10 Frw tugeze aho turazamura dushyira ku bihumbi 50 ubu iwacu mu bahinzi b’umuceri ntabwo tukibakoresha n’abandi nibafate ingamba zikomeye bizagera aho bicike.”

Imibare ya minisiteri y’ubuzima y’umwaka wa 2018 igaragaza ko mu turere dutanu tuza ku isonga mu kugira abana benshi batewe inda imburagihe, tune ari utwo mu ntara y’iburasirazuba aritwo Nyagatare 1465, Gatsibo 1452, Kirehe 1055 na Bugesera 925.

Mu ntangiriro z’uyu mwaka iburasirazuba habaruwe abana 15519 bataye ishuri, ubuyobozi bukaba bwarakoze ubukangurambaga abagera ku 13196 barigarurwamo abandi 2323 ntibafitiwe amakuru bigakekwa ko baba bari mu tubari no mu yindi mirimo ivunanye.

Bamwe mu bayobozi b'uturere bitabiriye iyi nama
Murekatete avuga ko hari abana usanga no mu tubari
Rugwizangonga wo muri COPRORIZ Ntende avuga ko hari ibihano bashyiriyeho abahinzi barindisha abana umuceri
Umuyobozi wa RIB mu Burasirazuba Rutaro yerekanye uko imirimo ikoreshwa abana ihanwa
Guverineri Mufulukye yavuze ko bagiye gutangira kugenzura hirya no hino bareba abakoresha abana imirimo ivunanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza