Gukoresha ingufu z’umurengera cyangwa zica ntibyemewe – Minisitiri Busingye avuga kuri Polisi

Yanditswe na Rabbi Malo Umucunguzi
Kuya 5 Nzeri 2020 saa 01:41
Yasuwe :
0 0

Minisitiri w’Ubutabera akaba n’Intumwa Nkuru ya Leta, Johnston Busingye, yatangaje ko hagiye kubaho ubufatanye bugamije gukemura ikibazo cy’ikoreshwa ry’imbaraga z’umurengera ku basivili batitwaje intwaro, kugira ngo gikemuke burundu.

Ni icyemezo gitangajwe nyuma y’iminsi havugwa abantu barashwe na Polisi, baba imfungwa cyangwa abakekaho icyaha, bikaza gusobanurwa ko bageragezaga gutoroka cyangwa se ko bashatse kurwanya inzego z’umutekano nyuma yo gufatwa.

Ubu butumwa bwa Minisitiri Busingye butangajwe nyuma y’uko kuri uyu wa Gatanu, Polisi y’Igihugu yatangaje ko yarashe umusore witwa Munyaneza Boy wari ufungiye ku Kimisagara, wagerageje gutoroka yerekeza mu mugezi wa Mpazi ubwo yari asohotse agiye mu bwiherero.

Ku Cyumweru tariki ya 30 nabwo umupolisi ukorera mu Karere ka Ngoma mu Murenge wa Zaza, yarashe umusore witwa Nsengiyumva Evariste, mu bivugwa ko yashatse kumurwanya atwaye umuturage wari wahinduye urugo rwe akabari, yarenze ku mabwiriza yo kwirinda COVID-19.

Mu butumwa yanyujije kuri Twitter, Minisitiri Busingye yagize ati “Gukoresha ingufu z’umurengera cyangwa zica ku mfungwa/abakekwa ntibyemewe n’amategeko kandi ntibikwiye. Turakorana na @Rwandapolice n’inzego bireba iki kibazo gikemuke binyuze muri politike n’imikorere, gukaza kubibazwa kw’ababikora, amahugurwa no gukaza ubugenzuzi.”

Ibi bikorwa byo kurasa abakekwaho ibyaha nubwo byatangazwaga ko ari ku mpamvu z’uko bari bagiye gutoroka cyangwa kugerageza kurwanya inzego z’umutekano, hari abakunze kwibazwa niba nta bundi buryo bwakoreshwa bwo gufata umuntu nk’uwo, bitabaye ngombwa ko araswa agapfa.

Ubwo umusore w’i Ngoma yaraswaga, Polisi yemeje ko irimo gukurikirana Umupolisi ukekwaho kumurasa. Yakomeje iti “Iperereza rirakomeje kugira ngo hamenyekane uko byagenze.”


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .