Guharanira ubukungu butangiza ibidukikije ni ukubaka ahazaza h’abadukomokaho- Minisitiri Dr Biruta

Yanditswe na Ishimwe Israel
Kuya 26 Ugushyingo 2018 saa 05:03
Yasuwe :
0 0

Imyaka irindwi irashize u Rwanda rushyizeho ingamba zo kubaka ubukungu butangiza ibidukikije, butanahungabanywa n’imihindagurikire y’ibihe “Green Growth and Climate Resilience Strategy.”

Ni icyerekezo cyazamuye ubukungu burambye hibandwa ku mutungo kamere, ujyanye no gutera amashyamba, gutunganya amazi, kunoza ubucukuzi bw’amabuye y’agaciro n’ibindi bitangiza ibidukikije.

Ubwo hatangizwaga Ihuriro rya mbere Nyafurika ku bukungu butangiza Ibidukikije, riteraniye i Kigali kuva ku wa 26 Ugushyingo 2018, Minisitiri w’Ibidukikije, Dr Biruta Vincent, yakomoje ku musaruro u Rwanda rwakuyemo.

Yagize ati “Turi kuganira ku buryo u Rwanda rwakoresheje mu kubaka ubukungu butangiza ibidukikije mu myaka 20 ishize n’uko inararibonye ryacu ryagaragaza iterambere rikwiye ku mugabane wose."

Ikiganiro yagitanze haganirwa ku nsanganyamatsiko yibanze ku “Ngamba z’igihugu zo kubaka ubukungu butangiza ibidukikije.”

Yakomeje ati “Nta gushidikanya ko kubaka ubukungu butangiza ibidukikije ari ahazaza ha Afurika. Ibi bidusaba kwiga, gusangizanya ubunararibonye no kongera kwiyemeza kubaka ahazaza abana bacu, n’abuzukuru bazishimira.”

Umuhuzabikorwa wa One UN mu Rwanda, Fodé Ndiaye, yanyuzwe n’intambwe y’u Rwanda mu kwimakaza ubukungu butangiza ibidukikije.

Yagize ati “Ndashimira Guverinoma y’u Rwanda na Minisiteri y’Ibidukikije ku bw’imishinga myinshi iganisha ku bukungu butangiza ibidukikije yagezeho. UNDP Rwanda yiteguye gutanga inkunga mu ishyirwa mu bikorwa ry’iyi mishinga.”

U Rwanda rwashyizeho Ikigega cyo kubungabunga ibidukikije (Rwanda Green Fund) nk’umuyoboro ufasha mu bukangurambaga bwo gushora imari mu kubyaza umusaruro umutungo kamere.

Cyahanze imirimo 140 000, kinarengera hegitari nyinshi zari kugerwaho n’ingaruka z’imihindagurikire y’ibihe. Ku bufatanye n’abafatanyabikorwa cyakusanyijwemo miliyoni $150.

Nyuma y’inama ku mihindagurikiye y’ibihe, COP 21, yabereye i Paris mu Bufaransa, u Rwanda rwahaye imbaraga imishinga iteza imbere ubukungu butangiza ibidukikije.

Rwimakaje uburyo bubungabunga ibidukikije mu mijyi yunganira Kigali, ubwikorezi bw’abantu n’ibindi.

U Rwanda na Afurika byeretswe ko kwita ku gukoresha ingufu zitisubira ku gipimo cya 100% no gushyiraho ibikorwa remezo birimo n’ibyagutse nk’Ikibuga Mpuzamahanga cy’Indege cya Bugesera bitangiza ikirere ari ingenzi.

Iri huriro ryateguwe na Minisiteri y’Ibidukikije, ifatanyije n‘Ishami ry’Umuryango w’Abibumbye ryita ku Iterambere (UNDP), UN Environment, UN Habitat na FAO. Rihuje abagera ku 1 000 barimo abanyapolitiki, ba rwiyemezamirimo n’abahanga mu by’imari baturutse mu bihugu bitandukanye muri Afurika n’ahandi.

Abatanze ibiganiro bagarutse ku ngingo zirimo guha abikorera umwanya, gushyiraho ibikorwa remezo bihamye, kubaka ubushobozi bw’ibigo bitera inkunga imishinga igamije kubungabunga ibidukikije.

Iturufu yo kugera kuri iyi ntego yabumbiwe mu kugira ubuyobozi bwiza butajegajega kandi bubereye abaturage.

Inyigo yatangajwe mu 2016, igaragaza ko hakenewe miliyari 2.6 z’amadolari yiyongera ku yari asanzwe akoreshwa mu guteza imbere ubuhinzi, ingufu z’amashanyarazi n’imicungire myiza y’umutungo w’amazi bijyanishwe no kubungabunga ibidukikije mu myaka 15.

Minisitiri w'Ibidukikije, Dr Biruta Vincent, yakomoje ku bufatanye bukwiye kuranga inzego zose mu kwimakaza iterambere ry'ubukungu butangiza ibidukikije
Umuhuzabikorwa wa One UN mu Rwanda, Fodé Ndiaye, yanyuzwe n’intambwe y’u Rwanda mu kwimakaza ubukungu butangiza ibidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza