Guceceka bikomeje kuba imbogamizi mu gukurikirana abasambanya abangavu

Yanditswe na Prudence Kwizera
Kuya 12 Ukuboza 2020 saa 09:30
Yasuwe :
0 0

Inzego zitandukanye zirimo ubuyobozi, ubugenzacyaha n’abafatanyabikorwa mu gukumira no kurwanya ihohoterwa rishingiye ku gitsina bemeza ko kuba u Rwanda rwarashyizeho ibihano bikakaye ku basambanya abangavu biri gutanga umusaruro kuko imibare y’abatwita imburagihe irimo kugabanyuka. Gusa bavuga hakiri imbogamizi ikomeye y’abaterwa inda bakanga kuvuga abazibateye ndetse n’abaturage banga gutanga amakuru hakiri kare kandi bayazi.

Byagarutsweho kuri uyu wa Kane tariki ya 10 Ukuboza 2020 mu Karere ka Huye ubwo hasozwaga ubukangurambaga bw’imisni 16 yahariwe kurwanya ihohoterwa rishingiye ku gitsina.

Umuyobozi w’Urwego rw’Igihugu rw’Ubugenzacyaha (RIB) mu Ntara y’Amajyepfo, Kamarampaka Consolée, yavuze ko u Rwanda rwahagurukiye abasambanya abana rushyiraho ibihano bikomeye birimo n’igifungo cya burundu kandi hakozwe ubukanguramba bwo bubimenyekanisha nk’uburyo bwo gukumira ababikora no kubaburira.

Yavuze ko mu gukurikirana ukekwaho gusambanya umwana bakunze guhura n’imbogamizi ikomeye yo guhishwa amakuru n’abakayabahaye.

Ati “Mu kugenza ibyaha by’ihohoterwa kuko nitwe dufite umwihariko wo kuba twabasha gukora amadosiye tukayishyikiriza ubushinjacyaha, duhura n’imbogamizi zitandukanye harimo ko abana bahohotewe baduhisha amakuru y’ababahohoteye kubera impamvu zitandukanye, cyane cyane iz’ubukene kuko akenshi yanga kuvuga uwamuhohoteye kuko aba amuha ubufasha.”

Indi mbogamizi yagarutseho ni umuco wo kunga aho usanga imiryango y’umwangavu wasambanyijwe n’iy’uwamusambanyije yiyunga igahisha amakuru.

Uhishe amakuru wese arabiryozwa

Umuyobozi wa RIB mu Ntara y’Amajyepfo, Kamarampaka Consolée, yavuze ko mu rwego rwo guca burundu abafite ingeso yo gusambanya abangavu n’abahisha amakuru kandi bayazi kuri ubu hemejwe ko uwahishe amakuru na we azajya abiryozwa.

Yavuze ko uwahishiriye amakuru y’uko umwana yasambanyijwe yaba umubyeyi, umuturanyi cyangwa undi wese na we abibazwa agahabwa ibihano kuko bifatwa nk’ubufatanyacyaha.

Ati “Ni ukuvuga ngo twajyaga dukurikirana uwakoze icyaha ariko ubu mu rwego rwo gukumira no kugira ngo abantu bibabere isomo, amabwiriza dukurikiza ni uko na wa wundi wahishiriye na we tugomba kumukurikirana.”

Hari abishe umwana bashaka gusibanyanya ibimenyetso!

Kamarampaka yavuze ko bafite dosiye bari gukurikirana mu Karere ka Nyanza aho umwangavu yahohotewe barabihishira ntibyakurikiranywa, umwana aravuka nyuma y’amezi abiri arapfa baramushyingura.

Ati “Kubera ko tutamenye amakuru ntabwo twigeze tubasha kubona ibimenyetso, ubu turi mu nzira zo gutaburura umurambo kugira ngo dupimishe turebe isano iri hagati ‘umwana n’ukekwaho icyaha kugira ngo tubashe kumukurikirana.”

Yavuze ko uwo mwangavu wasambanyijwe afite ubumuga bwo kutavuga, anenga ababyeyi be n’abaturanyi bahishe amakuru banga kumenyekanisha ko umwana wabo yahohotewe ngo bikurikiranywe hakiri kare.

Abangavu bagaragaje impamvu bahisha amakuru

Bamwe mu bangavu bo mu Karere ka Huye batewe inda z’imburagihe bataregeza no ku myaka 18 y’amavuko babwiye IGIHE ko ubufasha bahabwa n’ababasambanyije aribwo butuma batabavuga.

Umwe wo mu Murenge wa Huye ufite imyaka 17 avuga ko yatewe inda n’umusore w’imyaka 23 wo mu Mujyi wa Kigali kandi kuri ubu amuha ubufasha burimo ibyo kurya, imyambaro n’amafaranga yo kwifashisha, bityo atajya kumurega.

Ati “Nabyaye mu kwa Gatandatu uyu mwaka. Uwo twabyaranye aba i Kigali, aramfasha kandi yambwiye ko nimara kuzuza imyaka tuzabana. Ntabwo najya kumurega kuko amfasha kurera umwana. Mureze se bakamufunga njyewe n’umwana twabaho gute? Na mama ntabwo namumubwira.”

Undi mwangavu wo mu Murenge wa Kinazi yavuze ko yatewe inda ajya kurega uwayimuteye kuko yamwimye ubufasha.

Ati “Inda imaze kugira amezi ane yahise areka kongera kumvugisha, nagiye kumurega kuko yanze kumfasha kuko ubu umwana agize umwaka hafi n’igice. Iyo amfasha ntabwo nari kwirirwa njya kumurega. Ubu ntabwo nzi amakuru ye kuko naramubuze.”

Umuyobozi w’umuryango Women for Women International mu Rwanda, Uwimana Antoinette, yavuze ko guha ubushobozi abangavu batewe inda no kubigisha bizakuraho ikintu cyo guhishira ababahohoteye.

Ati “Ni ukuvuga ngo bagomba gufashwa mu miryango barimo ntibateranywe kugira ngo badasanga ababateye ikibazo bajya kubasaba ubufasha. Ni ukubaha uburyo bwo kwigenga mu bushobozi, ni cyo cy’ingenzi twabonye. Ikindi ni ukwigisha amategeko kugira ngo abantu basobanukirwe ko guhishira uwasambanyije umwana ari icyaha gihanwa n’amategeko.”

Umunyamabanga Nshingwabikorwa w’Inama y’Igihugu y’Abagore mu Rwanda, Kamanzi Jacqueline, yasabye abaturage kujya abatanga amakuru hakiri kare ku basambanya abangavu kuko bisigaye bikabije.

Ati “Kugira ngo tugire amahoro tugire cya gihugu twifuza gitekanye kandi giteye imbere bizahera mu muryango. Rero turasaba abantu bose kumva ko ikibazo kiri kuri mugenzi wawe, uko utifuza ko kiba ku mwana wawe cyangwa ku nshuti yawe abe ari byo biguha imbaraga zo kudahishira abasambanya abana bacu.”

Umuyobozi w’Akarere ka Huye, Sebutege Ange, yavuze ko imibare y’abangavu baterwa inda imburagihe irimo kugabanyuka bishingiye ahanini ku guhagurukira ababasambanya.

Yavuze ko mu mwaka wa 2019 abazitewe muri Huye ari 136 naho muri uyu mwaka wa 2020 ari 54 barimo 39 bamaze kubyara na 15 batwite.

Muri abo bose ababashije gutanga amakuru y’ababahohoteye ni batanu gusa.

Bamwe mu bangavu bo mu Karere ka Huye batewe inda imburagihe
Umuyobozi wa RIB mu Ntara y’Amajyepfo, Kamarampaka Consolée, yavuze ko mu rwego rwo guca burundu abasambanya abangavu hazajya hahanwa abahise amakuru bose
Umuyobozi w’umuryango Women for Women International mu Rwanda, Uwimana Antoinette, yavuze ko guha ubushobozi abangavu batewe inda no kubigisha bizakuraho guhishira ababahohoteye
Umunyamabanga Nshingwabikorwa w’Inama y’Igihugu y’Abagore mu Rwanda, Kamanzi Jacqueline, yasabye abaturage kujya abatanga amakuru hakiri kare ku basambanya abangavu
Umuyobozi w’Akarere ka Huye, Sebutege Ange, yavuze ko imibare y’abangavu baterwa inda imburagihe irimo kugabanyuka bishingiye ahanini ku guhagurukira ababasambanya

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .