GroFin yeretse abahagarariye inganda nto n’iziciriritse amahirwe ari mu gukorana na yo

Yanditswe na Nkurunziza Ferdinand
Kuya 15 Gashyantare 2020 saa 01:03
Yasuwe :
0 0

Ikigo cy’imari gitanga inguzanyo, ubujyanama n’ubufasha bwo gukurikirana imishinga y’ubucuruzi, GroFin Rwanda, cyahishuriye ba rwiyemezamirimo bafite inganda zitunganya zikanongerera agaciro ibicuruzwa, zimwe muri serivise gitanga zabafasha kurushaho guteza imbere ishoramari ryabo.

Ba rwiyemezamirimo bitabiriye ibi biganiro, basobanuriwe uko inguzanyo zitangwa muri GroFin ndetse berekwa zimwe mu mbogamizi ba rwiyemezamirimo batandukanye bahura na zo zituma ibikorwa byabo bikomwa mu nkokora, ntibigere ku ntego rimwe na rimwe, bikaba byabaviramo gufunga imiryango.

Ni kenshi ba rwiyemezamirimo bumvikana hirya no hino bataka ibibazo by’amikoro yabafasha gutera indi ntambwe, abandi ugasanga batorohewe bitewe n’ubumenyi buke mu birebana n’ubucuruzi, gusa ikigo cy’imari GroFin kivuga ko uburyo gifasha kikanakurikirana abakigana, ari igisubizo kirambye kuri ba rwiyemezamirimo bifuza gutera imbere mu byo bakora.

GroFin ni ikigo cyahanzwe nyuma yo kubona ko ba rwiyemezamirimo badakeneye inguzanyo gusa, ahubwo ko bakeneye n’ubufasha buhoraho bubafasha gushyira mu buryo buboneye gahunda z’ibikorwa by’ubucuruzi bwabo, bigatuma ibyo bikorwa byaguka kandi bikunguka mu buryo burambye.

Ibyo biteza imbere ba rwiyemezamirimo ubwabo ariko bigateza imbere igihugu muri rusange, bitanga akazi n’imisoro, ituma hubakwa ibikorwa remezo biteza imbere abaturage byiganjemo amashuri, amavuriro, imihanda, amazi n’amashanyarazi n’ibindi.

Mu kiganiro yahaye IGIHE, Umuyobozi Mukuru wa GroFin mu Rwanda, Christian Bugabo, yavuze ko guhura n’aba rwiyemezamirimo b’inganda nto n’iziciriritse zikorera mu Rwanda biri mu murongo wo guteza imbere gahunda ya ‘Made in Rwanda’ yatangijwe na leta.

Ati “Twe nk’abari mu rwego rw’imari kandi baha inguzanyo ba rwiyemezamirimo mu buryo bwo kubateza imbere, uyu ni umusanzu wacu mu gushyigikira gahunda yo guteza imbere ibikorerwa mu Rwanda, binyuze mu kuborohereza kubona inguzanyo mu buryo butababera umutwaro ku byo basanzwe bakora kandi tukabagira inama zituma ibikorwa byabo by’ubucuruzi byaguka kurushaho, bakora ibicuruzwa byinshi kandi byujuje ubuziranenge, bishobora guhangana no ku masoko mpuzamahanga”.

Bugabo yakomeje avuga ko ba rwiyemezamirimo beretswe ko GroFin yababera igisubizo mu kwagura ibikorwa byabo no gukomeza kongerera agaciro ibyo mu Rwanda, bakagabanya ibitumizwa hanze, banitegura kubyaza umusaruro amahirwe ari mu isoko rusange ry’Afurika.

Ati “Twanabahuguye mu bijyanye n’imisoro kuko ni ingenzi cyane kandi biri muri wa murongo wacu, wo kudatanga amafaranga gusa ahubwo agomba guherekezwa no guhugura no gutanga inama zihoraho kugira ngo ba rwiyemezamirimo baguke mu buryo bufatika ariko banubahiriza inshingano zo kwishyura imisoro n’amahoro neza kandi ku gihe”

Muri ibi biganiro, GroFin yafatanyije n’ikigo PKF International mu guhugura ba rwiyemezamirimo ku bijyanye n’imisoro nka kimwe mu bishobora gukoma mu nkokora ubucuruzi ubwo ari bwo bwose mu gihe idakurikiranywe neza nk’uko biteganywa n’amategeko.

GroFin itanga inguzanyo kuri ba rwiyemezamirimo bato n’abaciriritse mu Rwanda, igakurikirana no kwaguka kw’imishinga yabo.

Iki kigo gifite icyicaro gikuru mu Birwa bya Maurice, cyatangiye gukorera mu Rwanda mu 2007, gikurikirana imishinga yiganjemo ikora ku buzima bwa benshi kandi itanga akazi nk’uburezi, ubuvuzi, inganda, ubuhinzi n’ubworozi, ingufu n’ubukerarugendo.

Iki kigo gikorera mu bihugu 15 byo muri Afurika no mu Burasirazuba bwo Hagati birimo; Afurika y’Epfo, Zambia, Kenya, Uganda, Tanzania, u Rwanda, Ghana, Nigeria, Côte d’Ivoire, Senegal, Misiri, Jordan, Oman na Irak, aho kimaze gushora imari ingana na miliyoni 47 z’amadorari ya Amerika, mu mishinga y’inganda nto n’iziciriritse.

Iyi mishinga yose yafashije guhanga imirimo 9,970, irimo abari n’abategarugori bangana na 28%.

Inguzanyo nto GroFrin itanga ni ibihumbi 100 by’amadolari ya Amerika (miliyoni 94 z’amanyarwanda), mu gihe inguzanyo yo hejuru itarenza ari miliyoni 1.5 z’amadolari ya Amerika (miliyari imwe na miliyoni magana ane na cumi z’amafaranga y’u Rwanda).

Imbogamizi za mbere iki kigo gihura na zo mu gihe cyo gutanga inguzanyo ni ukubona ba rwiyemezamirimo bafite imishinga iteguye neza n’uburyo buhamye bwo kuyishyira mu bikorwa, kutagira ibyangombwa bisabwa kugira ngo umushinga ukore, kutagira ubumenyi buhagije ku bafite inganda ziciriritse, kutagira uburyo bw’ibaruramari buhamye muri izo nganda n’ibindi.

Nyuma yo kubona ibyo bibazo, GroFin, yongereye ingufu mu gutanga ubujyanama mbere yo gutanga amafaranga, aho ifasha nyiri umushinga kuwunononsora neza ndetse igakurikirana ku buryo bwiza abatse inguzanyo mu rwego rwo kwirinda ahaturuka igihombo hose.

Inzobere mu by’ubukungu n’ishoramari zigaragaza ko rwiyemezamirimo nyawe ari uhorana inzozi zo gutera imbere no kugera kuri byinshi byisumbuye, ariko ko kubigeraho bimusaba kugira abafatanyabikorwa beza bamugira inama z’ingirakamaro zimurinda ibibazo byose byamukoma mu nkokora.

Nyuma y’ibiganiro, abashoramari bahawe umwanya wo kubaza ibibazo banerekana ko bishimiye kandi biteguye gukorana na GroFin, kuko babonye ko ifite umwihariko batari bamenyereye ku bindi bigo by’imari, kuko amahugurwa bahawe ajyanye n’imisoro agaragaza ko GroFin irenga gutanga inguzanyo, igatanga n’ubundi bufasha bw’ingirakamaro.

Ba rwiyemezamirimo bahawe umwanya wo kubaza ibibazo bitandukanye
GroFin yeretse abahagarariye inganda nto n'iziciriritse uko bakorana na yo
Nyuma y'ibiganiro habaye n'umwanya wo gusabana
Umuyobozi Mukuru wa GroFin mu Rwanda, Christian Bugabo, yavuze ko guhura n’aba rwiyemezamirimo ari muri gahunda yo guteza imbere Made in Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza