00:00:00 IGIHE NETWORK KN KINYARWANDA EN ENGLISH FR FRANCAIS

Goodluck Jonathan yagaragaje amateka y’u Rwanda nk’isomo Abanya-Nigeria bakeneye

Yanditswe na Iradukunda Serge
Kuya 5 September 2022 saa 11:48
Yasuwe :

Goodluck Jonathan wabaye Perezida wa Nigeria yasabye abaturage b’iki gihugu kwigira ku Rwanda ibijyanye no kubaka igihugu kitarangwa n’amacakubiri ashingiye ku moko, aho buri muturage areshya na mugenzi we.

Ibi Goodluck Jonathan yabigarutseho ku wa Gatandatu, tariki 3 Nzeri 2022, ubwo yari mu birori byo kwizihiza isabukuru y’Umunyemari wo muri iki gihugu akaba n’umunyepolitiki ukomeye, Dr. Emmanuel Iwuanyanwu.

Muri ibi birori byabereye muri Leta ya Imo, Goodluck Jonathan, yavuze ko Nigeria imaze igihe irangwa na politiki ishingiye ku moko kandi yashegeshe ubumwe bw’abaturage b’iki gihugu.

Ati “Nk’Abanya-Nigeria dufite ibibazo ariko ntitugomba kuba abacakara b’ibibazo byacu. Mureke tubirenge dukomeze urugendo rugana ku iterambere.”

Yavuze ko Abanya-Nigeria bakwiye gukoresha u Rwanda nk’urugero rw’uko umuntu yarenga ibibazo bimwugarije.

Ati “Mureke dufate urugero rw’u Rwanda, nyuma ya Jenoside baricaye bashyira ku murongo igihugu cyabo. Mu Rwanda rw’uyu munsi, amoko ntakiri ikibazo. Bose bibona nk’umuntu umwe.”

Yakomeje avuga ko abayobozi ba Nigeria b’uyu munsi bakwiye guhagurukira ikibazo cy’amoko gikomeje gushyamiranya abaturage.

Ati “Abayobozi bashya ba Nigeria bakwiye gutera intambwe iganisha ku gukemura ikibazo cy’amoko kidutandukanya ndetse kigasubiza igihugu cyacu inyuma. Icyo nisabira Abanya-Nigeria ni ukudaha agaciro ibidutandukanya ahubwo tukibanda ku biduhuza.”

Uyu mugabo wayoboye Nigeria imyaka itanu, yasabye urubyiruko rw’iki gihugu gukoresha amatora rusange yo mu 2023 nk’amahirwe yo gukosora ibitaragenze neza.

Ati “Ku bw’amahirwe, turi kugana mu bihe by’amatora, umukoro mpa urubyiruko ni ugufata mu biganza ahazaza harwo rutora abashyira imbere ubumwe bwacu kandi bashyira imbere amahoro bagaharanira iterambere, aho gutora abazubaka inkuta z’amoko n’amadi zitandukanya abaturage bacu.”

“Mu gihugu cyacu politiki twayishyizemo amoko cyane aho gushyigikira iterambere risangiwe na bose. Turamutse dutahirije umugozi umwe, tugashyira inyuma ibidutandukanya twakubaka igihugu buri wese yumva akwiriye kubamo ndetse afite uburenganzira bungana n’ubwa mugenzi we.”

Goodluck Jonathan yayoboye Nigeria kuva mu 2010 kugeza mu 2015, aho yavuye ku butegetsi nyuma yo gutsindwa mu matora na Muhammadu Buhari.

Nigeria ni kimwe mu bihugu bya Afurika byamunzwe na politiki ishingiye ku moko n’amadini, ibintu bituma gihorana ibibazo by’umutekano muke n’amakimbirane adindiza iterambere ry’abaturage.

Ibijyanye n’ikibazo cya politiki ishingiye ku moko muri Nigeria biherutse kugarukwaho na Olusegun Obasanjo na we wayoboye iki gihugu.

Uyu mukambwe wayoboye Nigeria kuva mu 1999 kugeza 2007, yavuze ko yahakuye isomo ry’uko kuyobora ushingiye ku ivangura ry’amoko bidashobora kugira aho bigeze igihugu.

Yavuze ko kubaka inzego zikomeye na demokarasi mu gihugu, ari inzira nziza kugira ngo Jenoside n’ibisa na yo bitaba mu gihugu icyo ari icyo cyose.

Goodluck Jonathan wayoboye Nigeria yagaragaje u Rwanda nk’isomo abaturage b’iki gihugu bakeneye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .