Gisagara: Umuzingo w’ibyifuzo by’abangavu barenga 600 baherutse guterwa inda

Yanditswe na Prudence Kwizera
Kuya 16 Ugushyingo 2018 saa 09:12
Yasuwe :
0 0

Abangavu 623 baherutse guterwa inda z’imburagihe barimo abagitwite n’abahetse impinja bagaragarije inzego z’ubuyobozi ibyifuzo byabo nyuma yo guhura n’ibyo bibazo byo gutwita imburagihe.

Ibyo byifuzo byabo babigaragaje kuri uyu wa Kane mu gikorwa cy’iminsi itatu cyo kubaganiriza no gukora iperereza ku bibazo bahuye nabyo by’umwihariko hashakwa uko bafashwa kubisohokamo.

Ni igikorwa cyateguwe na Minisiteri y’Uburinganire n’Iterambere ry’Umuryango ku bufatanye n’Akarere ka Gisagara ndetse n’abafatanyabikorwa batandukanye.

Biri kuba muri gahunda y’ubukunguramabaga bw’amezi abiri ku miyoborere n’imibereho myiza y’umuryango bifite insanganyamatsiko igira iti ‘Twubake umuryango twifuza turwanya gusambanya abana’.
Imibare y’ibarura riri gukorwa yerekanye ko mu bana 623 bamaze kubarurwa batewe inda harimo 189 bataruzuza imyaka 18 y’amavuko n’abandi 425 bataragira 20.

Bose baherekejwe n’ababyeyi babo cyangwa ababarera bagiranye ibiganiro byihariye umwe ku wundi n’abakozi ba Isange One Stop Center barabahumuriza nyuma baganira n’Urwego rw’Igihugu rushinzwe iperereza (RIB).

Bagaragaje ibyifuzo bitandukanye byabafasha kugira ejo hazaza heza no gukumira ko hari uwakongera gutera inda umwangavu.

Basabye ubufasha kugira ngo babashe kurera abana babyaye ndetse bave no mu mibereho mibi.

Abagera kuri 98 basabye ko bakwigishwa umwuga wo kudoda; 74 basaba amatungo yo korora; 39 bifuza gucuruza; 38 basaba kwishyurirwa ubwisungane mu kwivuza.

Abandi 26 bavuze ko bakeneye ibitunga abana; 14 nta myambaro y’abana bafite; 12 bifuje gusubizwa mu ishuri; 10 ntibagira aho kuba basabye icumbi naho babiri bakeneye imirima yo guhinga mu gihe umwe yifuza ko yafashwa kwandikisha umwana we.

Bagaragaje ko bahura n’ibibazo birimo gutotezwa mu miryango; kudafashwa kurera abana n’abagabo babateye inda; kubuzwa n’ababyeyi uburenganzira bwo kurega ababahohoteye n’ibindi.

Minisitiri w’Uburinganire n’Iterambere ry’Umuryango, Solina Nyirahabimana, yababwiye ko ubuyobozi bwaje kubahumuriza, kubagira inama, kubafasha no gukumira ko hari uwakongera guterwa inda.

Ati “Icyatumye dushaka kubonana namwe cyane twaje dushaka kubahumuriza; bana bacu muhumure ibyabayeho ntabwo bibabuza ko muba abana bacu.”

“Ntabwo twabanze kubera ikibazo mwagize ntabwo tugomba kubatererana ahubwo tugomba kubafasha birenze kugira ngo dufatanye kubaka ubuzima bwanyu bukurikiraho.”

Yakomeje abasaba kwirinda kugira ngo ibyababayeho bitazongera ahubwo bikwiye kubaha isomo rikomeye.

Umwe mu bangavu batewe inda yatanze ubuhamya agaragaza ko nyuma yo kubyara yafashijwe n’ababyeyi baramuhumuriza bamusubiza mu ishuri kandi kuri ubu yiga neza nta kibazo.

Icyatunguye benshi ni uko umubare munini w’abo bangavu utifuza ko ababateye inda bahanwa bitewe n’impamvu zirimo ko babaha ubufasha.

Umuyobozi w’Akarere ka Gisagara, Rutaburingoga Jerome yagize ati “Mu bindi bibazo ni uko 27 gusa ari bo bifuje gutanga ibirego. Ni ikibazo gikomeye kuko batifuza kurega ababahohoteye; birasaba ubufatanye kugira ngo bumve ko ari uburenganzira bwabo.”

Ku kijyanye no guhana abatera abangavu inda hagaragajwe ko abagabo bari ku kigero cya 50.8% banze kwemera abana naho abangavu 20.5% batanze ibirego ariko ntibahabwa ibisubizo.

Muri bo abagera kuri 63 bapimwe Virusi itera Sida basanga nta n’umwe ufite ubwandu.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza