Gisagara: Umuhanda wa kaburimbo bemerewe na Perezida Kagame ugeze ahashimishije [Amafoto]

Yanditswe na Prudence Kwizera
Kuya 16 Ugushyingo 2019 saa 08:37
Yasuwe :
0 0

Umuhanda wa kaburimbo Perezida Kagame Paul yemereye abaturage bo mu Karere ka Gisagara ugeze ahashimishije wubakwa ku buryo bitanga icyizere ko mu gihe gito uzaba umaze kuzura ugatahwa ku mugaragaro.

Ni umuhanda wa kilometero 13.8 uturuka i Huye ukagera ku biro by’Akarere ka Gisagara; watangiye kubakwa tariki ya 8 Ukwakira 2018. Biteganyijwe ko uzatwara agera kuri Miliyari 6.5Frw.

Umuyobozi w’Akarere ka Gisagara, Rutaburingoga Jérôme, yabwiye IGIHE ko kuri ubu ugeze ku kigero cya 90% kandi mu gihe gitoya bazawutaha ku mugaragaro.

Ati “Ugeze kuri 90% hasigaye kuyisoza neza no kurangiza agace gato kari muri Huye. Muri Gisagara igice kinini cyararangiye bivuze ngo birarangirana n’uyu mwaka wa 2019.”

Rutaburingoga avuga ko iyo kaburimbo yatangiye kubazanira amajyambere kuko ibikorwa byo kuvugurura umujyi wa Gisagara byatangiye, aho mu cyumweru gitaha bazatanga ibibanza 18 ku baturage bihite bitangira kubakwa.

Mu mujyi wa Gisagara hari ibibanza birenga 60 byo guturamo kandi hari n’igice cyagenewe ubucuruzi na cyo kigiye kubakwa.

Mu gice cyahariwe inganda hari kubakwa uruganda rutunganya ifu ya kawunga mu bigori hamwe n’urwenga umutobe mu bitoki.

Muri icyo gice hari kandi uruganda rwa GABI Ltd rumaze igihe rwenga inzoga mu bitoki.

Kuwa gatatu w’iki cyumweru hakiriwe abashoramari bagiye kubaka uruganda ruzajya ruhunika imyaka mu buryo burambye ntiyangirike.

Rutaburingoga ati “Iyi kaburimbo yatangiye irahindura amateka ya Gisagara n’imibereho myiza y’abaturage iganisha ku iterambere. Ibyo bikorwa byose bizatanga akazi bitume haba ubuhahirane. Abanya-Gisagara bahishiwe byinshi byiza bituruka kuri uyu muhanda.”

Akarere ka Huye na ko kabinyujije ku rubuga rwa Twitter kishimiye ko hari igice cyako cyubatswe giherereye ku Kabutare imbere y’Ibitaro by’Akarere na Katederale ya Butare.

Kagize kati “Mu Gishanga cya Rwasave gihuza uturere twombi, kaburimbo yashyizwemo. Hari gushyirwa kaburimbo mu muhanda uzamuka ku Kabutare, ugana ku Bitaro bya Kabutare. Indatirwabahizi zirashimira Nyakubahwa Paul Kagame kuri iri terambere.”

Ni ubwa mbere Akarere ka Gisagara kagize umuhanda wa kaburimbo mu mateka yako.

Ibyishimo ku baturage

Bamwe mu baturage bo mu Karere ka Gisagara bavuga ko bafite ibyishimo kuba kaburimbo bari kubakirwa igiye kuzura mu gihe gito.

Bifuza ko hatekerezwa n’uko yakomeza ikagera mu yindi mirenge by’umwihariko mu Murenge wa Mamba hari kubakwa uruganda rwa Nyiramugengeri.

Mukaburasa Pascasie ati “Ni ibitangaza kuba iwacu hageze kaburimbo; dufite ishimwe rikomeye kuri Perezida wacu Paul Kagame uhora udutekerezaho yifuza kutuzanira amajyambere. Turizera ko izagezwa no mu yindi mirenge.”

Gasana Gerard asanga uwo muhanda uje guhdindura amateka ya Gisagara.

Ati “Gisagara ni ko Karere kari gasigaye mu Rwanda nta kaburimbo kagira, bivuze ko ubu amateka yahindutse tugiye kwinjira mu ruhando rw’iterambere.”

Mu bindi bikorwa remezo; mu Karere ka Gisagara buri Kagari gafite Poste de Santé naho ingo zifte amashanyarazi ziri ku kigero cya 52%.

Hari kubakwa kandi uruganda rwa Nyiramugengeri rwitezweho gutanga megawati 80 bikongera 40% by’amashanyarazi asanzwe akoreshwa mu gihugu hose.

Abanya-Gisagara biteze iterambere rikomeye kuri uyu muhanda wa kaburimbo
Bitaganyijwe ko uyu muhanda wa Kaburimbo uzatwara agera kuri Miliyari 6.5Frw
Harabura igihe gito ngo uyu muhanda ube wuzuye utahwe ku mugaragaro
Ibinyabiziga bitandukanye byatangiye kunyura mu muhanda wa kaburimbo mu Karere ka Gisagara
Imbere ya Katederale ya Butare naho hamaze gushyirwa kaburimbo ituruka ku Gisagara
Imbere y'ibiro by'Akarere ka Gisagara hahoze hari umuhanda w'igitaka ubu hageze kaburimbo
Imodoka zitwara abagenzi zatangiye kuwugendamo kandi mbere byasabaga gutega moto gusa
Kukaba umuhanda wa kaburimbo muri Gisagara byatumye abashoramari batangira kuhagana
Mu gice cy'Akarere ka Huye naho bishimira ko kaburimbo iva ku Gisagara yahageze
Mu mateka ya Gisagara igize umuhanda wa kaburimbo
Ni ubwa mbere Akarere ka Gisagara kagize umuhanda wa kaburimbo mu mateka yako
Ni umuhanda wa kilometero 13.8 uturuka i Huye ukagera ku biro by’Akarere ka Gisagara
Umuhanda wa kaburimbo Perezida Kagame Paul yemereye abaturage bo mu Karere ka Gisagara ugeze ahashimishije
Uyu muhanda wa Kaburimbo Huye-Gisagara watangiye kubakwa tariki ya 8 Ukwakira 2018

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza