Gisagara: Ni uwuhe muzimu wateye Umurenge wa Mukindo utuma abawuyobora badahuza n’abaturage?

Yanditswe na Bukuru JC
Kuya 30 Ukuboza 2020 saa 08:21
Yasuwe :
0 0

Abazi Akarere ka Gisagara n’abakurikirana ubuzima bw’abagatuye umunsi ku wundi bari kwibaza ikibazo kiri mu Murenge wa Mukindo muri iyi minsi gituma abayobozi bawo badahuza n’abaturage aho bashinjwa kubakubita no kubahohotera.

Hari abibaza ‘umuzimu’ waba warateye Umurenge wa Mukindo kuko abawuyobora bakunze kugirana ibibazo n’abaturage!

Byatangiye muri Kamena 2020 ubwo umugore witwa Niyomuhoza Joselyne ucumbitse mu Murenge wa Mugombwa mu Karere ka Gisagara yashinje Umunyamabanga Nshingwabikorwa w’Umurenge wa Mukindo, Rutaganda Jean Félix n’ukuriye Dasso muri uwo murenge ko bamuhohoteye bakamufunga ndetse bakanamushyira kuri moto bakamujyana kumuroha mu Akanyaru ariko ku bw’amahirwe akaza kuvamo adapfuye.

Urwego rw’Igihugu rushinzwe Ubugenzacyaha, RIB, rwahise rutangira iperereza, ku wa 25 Kanama 2020 ruta muri yombi abagabo barindwi barimo Gitifu wa Mukindo Rutaganda Jean Félix kugira ngo babazwe ku cyaha cyo guhohotera umuturage.

Gusa nyuma yaho Rutaganda yararekuwe ngo akurikiranwe ari hanze, ahita yoherezwa kuyobora Umurenge wa Musha mu Karere ka Gisagara agurana na Tumusifu Jérome wahawe inshingano zo kujya kuyobora Mukindo.

Nyuma yaho ku wa 28 Ukuboza 2020 mu Murenge wa Mukindo hongeye kumvikana inkuru ko Gitifu Tumusifu na we yahohoteye umwana w’imyaka 15 witwa Musabyemahoro Ethienne aramukubita bimuviramo urupfu.

RIB yahise imuta muri yombi, ivuga ko mu ibazwa ry’ibanze rya Tumusifu yemeye ko yakubise uwo mwana ariko ngo ntiyamukubise ku buryo byamuviramo gupfa.

Umuvugizi w’Umusigire wa RIB, Dr Murangira B. Thierry, yagize ati “RIB yihutiye kuhagera hanyuma umurambo woherezwa muri Laboratwari y’u Rwanda y’ibimenyetso bishingiye ku bumenyi n’ubuhanga bikoreshwa mu butabera (RFL) ku Kacyiru kugira ngo ukorerwe isuzuma rigamije kugaragaza icyo yazize.’’

Bamwe mu baturage bo mu Murenge wa Mukindo babwiye IGIHE ko impamvu hari kugaragara ibibazo hagati yabo n’abayobozi ari uko batabegera ahubwo babahutaza.

Habyarimana Emmanuel yagize ati “Njyewe mbona ikintu kiri kubitera, abaturage bo muri uyu Murenge wa Mukindo uje ukabegera ukisanisha nabo wabayobora neza bigakunda kuko uhita umenya icyo bakunda n’icyo banga, icyo gihe ukareba bya bindi banga ukabagira inama noneho n’ibyo bakunda ukareba ko bikwiye.”

Atanga urugero aho akarere kabemereye ko umuturage ufite urutoki ashobora kwenga inzoga yo kunywera mu rugo ariko ko iyo babikoze ubuyobozi bw’umurenge buza bugahita buzimena nta kubaganiriza ngo bamenyeshwe impamvu buvuguruzanya n’akarere.

Ati “Icyo gihe bararakara kandi iyo uyoboye abantu barakaye nta terambere mugeraho kuko muba mudahuza.’’

Kuri we asanga ubuyobozi bukwiye kurushaho kwegera abaturage no kubaganiriza bagafatanya muri byose.

Ati “Ndibaza ko hano hamaze kuyobora ba gitifu batandatu kuva imirenge yajyaho, muri bo usibye umwe witwa Bigirimana Augustin ni we muntu wahavuye amahoro. We ikintu yashoboje Mukindo kandi n’imihigo yarayesaga, we yarazaga muri santere runaka akegera abaturage akavugana n’abantu baho, akahava akajya mu yindi santere akavugana n’abantu baho. Urumva ko yahitaga amenya amakuru yose mu baturage n’igikenewe. Birasaba umuntu ukorana n’abaturage kandi adakoresha ingufu z’umurengera mu kubahana.”

Muhizi François na we avuga ko abaturage bo muri Mukindo badashaka umuyobozi ubahutaza.

Ati “Ubundi icyo mbona ni abayobozi duhabwa badashobotse kuko nanone kuyobora Mukindo n’abaturage bafite akantu ko kumva bayoborwa n’umuntu ubatwara gake, ariko iyo umuyoboye umuhutaza ntibihura.”

Avuga ko Tumusifu Jérome ari umukozi kuko yita ku kubazanira iterambere ariko akwiye kongera ikintu cyo ‘kwegera abaturage’.

Ndayisaba Samuel na we ntajya kure ya bagenzi be, avuga ko ikosa abayobozi bari kugwamo muri iyi minsi ari iryo guhana bihanukiriye batabanje no kwigisha abaturage.

Ati “Buriya rero abaturage hari ukuntu uza kubayobora ubashyizeho igitutu gikabije, ukabanza kubahana nk’aho wabanje kwigisha, hahita hazamo ikintu gituma badahuza. Nk’aho wabanje kwigisha abantu ngo ubabwire ikibazo gihari ahubwo ugahita uhana cyane wihanukiriye, icyo gihe bararakara bigatuma na we bashaka kukunaniza, bagashaka no kuguta mu mutego w’ibyaha.”

Abaturage bo mu Murenge wa Mukindo baganiriye na IGIHE bahuriza ku ngingo y’uko bashaka umuyobozi ubegera akabereka ikibi n’icyiza akabasobanurira impamvu y’ibyemezo bifatwa kandi bakajya inama.

Guverineri w’Intara y’Amajyepfo, Kayitesi Alice, yabwiye IGIHE ko ikibazo kiri mu Murenge wa Mukindo bakimenye kandi ku bufatanye n’Akarere ka Gisagara bari kugishakira umuti urambye.

Ati “Icyo twabonye ni uko hakenewe ubukangurambaga bwinshi, ni abaturage bakeneye kwegerwa cyane bakaganirizwa kugira ngo bazamure urwego rw’uburyo babana n’abayobozi babo hatabayeho no kuba babashyira mu makosa.”

Yakomeje avuga ko nta gisobanuro na kimwe gihari cyatuma umuyobozi akubita umuturage, abasaba kubyirinda.

Yavuze ko ubusanzwe Gitifu Tumusifu Jérome asanzwe ari umuyobozi mwiza ari nayo mpamvu yari yajyanywe kuyobora Mukindo kugira ngo ayizamure.

Ati “Uriya Munyamabanga Nshingwabikorwa wagiyeyo ubundi ni umuyobozi mwiza wakoraga neza no kumujyanayo ubuyobozi bw’akarere ni uko bwifuzaga ko hagaragara nyine iyo mpinduka kuko yari umuntu uzi gukora ubukangurambaga.”

Kayitesi avuga ko Umurenge wa Mukindo usa n’uhura n’undi wa Mugombwa ku buryo agace kaho kaba gasa naho abaturage baba bari kure y’ubuyobozi, ariko baza gufatanya n’ubuyobozi bw’Akarere kugira ngo abaturage barusheho kwegerwa.

Kugeza ubu RIB ikomeje iperereza ku rupfu rwa Musabyemahoro Etienne kugira ngo hamenyekane mu by’ukuri icyamwishe n’uwabigizemo uruhare.

Mu Gasantere ka Kanto ko mu Murenge wa Mukindo mu Karere ka Gisagara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .