Gisagara: Miliyoni 17 zimaze gucibwa abanyuranya n’amabwiriza yo kwirinda Coronavirus

Yanditswe na Prudence Kwizera
Kuya 2 Kanama 2020 saa 04:03
Yasuwe :
0 0

Imibare itangwa n’Ubuyobozi bw’Akarere ka Gisagara yerekana ko hari abantu benshi bakomeje kutubahiriza amabwiriza yo kwirinda icyorezo cya Covid-19 giterwa n’agakoko ka Coronavirus.

Muri bo hari bamwe bagirwa inama abandi bagahabwa ibihano birimo gucibwa amande no gufungwa by’igihe gito bitewe n’uburemere bw’ikosa bafatiwemo.

Umuyobozi w’Akarere ka Gisagara, Rutaburingoga Jérome, yabwiye IGIHE ko abamaze guhanwa ari abantu 1153 bakaba baraciwe amande y’amafaranga 17,840,000.

Yavuze ko amakosa bakunze gufatirwamo yiganjemo gufungura utubari no kunywa mu masaha ya nyuma ya saa tatu z’ijoro.

Ku wa Gatanu tariki ya 31 Nyakanga 2020 abantu 172 bafashwe batubahirije amabwiriza yo kwirinda COVID-19 barazwa bicaye. Muri bo 121 bari batambaye agapfukamunwa; 43 bafatiwe mu nzira nyuma ya saa tatu z’ijoro naho 16 bafatirwa mu tubari bagiye kunywa inzoga.

Abo bose bagiriwe inama bibutswa ko icyorezo cya Coronavirus gihari kandi gifite ubukana basabwa gukomeza kucyirinda; abadafite udupfukamunwa baraduhabwa.

Abafatiwe mu makosa basabye imbabazi, basezeranya ubuyobozi ko batazabisubira kandi ko bagiye no kwigisha bagenzi babo n’abaturanyi kuko hari abatabyitaho cyangwa bakabyirengagiza ku bushake.

Harindintwari Raphael yagize ati “Isomo nakuyemo ni uko agapfukamunwa ari rwo rukingo rwa mbere rwa Coronavirus bityo ngomba kukambara igihe cyose mvuye mu rugo. Inama nagira abandi ni ukubahiriza amabwiriza yashyizweho na Leta yo kwirinda Coronavirus.”

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi meza n’isabune, kwambara udupfukamunwa mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.

Ku wa Gatanu tariki ya 31 Nyakanga 2020 abantu 172 bafashwe batubahirije amabwiriza yo kwirinda COVID-19 barazwa bicaye, bukeye bagirwa inama barataha

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .