Gisagara: Ingamba ku mubare munini w’abanyeshuri batazi gusoma ijambo na rimwe ry’Ikinyarwanda

Yanditswe na Prudence Kwizera
Kuya 6 Gashyantare 2020 saa 07:29
Yasuwe :
0 0

Igenzura ryakozwe mu bigo by’amashuri abanza mu Karere ka Gisagara, ryagaragaje ko abanyeshuri bo mu mashuri abanza biga mu mwaka wa mbere, uwa kabiri n’uwa gatatu bangana na 41% batazi gusoma ijambo na rimwe ry’Ikinyarwanda.

Iryo genzura ryakozwe mu 2019 n’abarimu bakorera muri ako karere bahuriye mu itsinda ryitwa Local Early Grade Reading Assessment, LEGRA; rikorerwa mu bigo by’amashuri abanza n’ayisumbuye.

Ibyavuye muri iryo genzura byagarutsweho kuri uyu wa Gatatu ubwo muri ako karere hatangizwaga gahunda y’ubukangurambaga bwo gusoma izamara umwaka wose ifite insanganyamatsiko ivuga ngo “Mumpe urubuga nsome.”

Hagaragajwe ko impamvu nyamukuru yatumye Minisiteri y’Uburezi itangiza ubukangurambaga bwo gusoma ari uko Raporo ya Banki y’Isi yagaragaje ko u Rwanda rukiri nyuma mu biyanye no gusoma.

Ikindi ni uko gahunda ya Leta y’u Rwanda ivuga ko ubukungu bw’igihugu bugomba kuba bushingiye ku bumenyi kandi umwana yakagombye kugera mu mwaka wa gatatu w’amashuri abanza azi gusoma neza Ikinyarwanda.

Iyo gahunda yo gutoza abana bato gusoma no kubikunda, Minisiteri y’Uburezi iyishyira mu bikorwa ku bufatanye n’abafatanyabikorwa barimo USAID Mureke Dusome.

Umukozi uhagarariye USAID Mureke Dusome mu Karere ka Gisagara, Mutabazi Edouard, yagaragarije abari bitabiriye icyo gikorwa ko isuzuma ryakozwe n’abayobozi b’ibigo by’amashuri hamwe n’abarimu ryagaragaje ko hari umubare munini w’abanyeshuri biga mu mashuri abanza batazi gusoma ijambo na rimwe.

Ati “Abana ibihumbi 40 bisaga ni bo bakoze kiriya kizamini cya LEGRA; twasanze 41% biga mu wa mbere mu wa kabiri no mu wa gatatu byagaragaye ko batazi gusoma ijambo na rimwe; bari mu cyiciro cya zeru.”

Yasobanuye ko mu bana barenga ibihumbi 40 bakoze icyo kizamini abarenga ibihumbi 17 batigeze basoma ijambo na rimwe ry’Ikinyarwanda.

Ati “Abana 17 358 ari bo bangana na 41% ni bo bafite zeru; ni ukuvuga ngo gusoma badategwa ntibigeze basoma n’ijambo na rimwe. Ntabwo umwana yigeze asoma ijambo na rimwe ubwo ntiyasubiza n’ikibazo cyo kumva umwandiko.”

Zimwe mu ngamba zafashwe mu rwego rwo gukemura icyo kibazo harimo guhugura abarimu, gutiza abana ibitabo byo gusoma; gutegura amarushanwa yo gusoma, gushishikariza ababyeyi gutoza abana babo gusoma n’izindi.

Mu Karere ka Gisagara kandi muri Nzeri 2019 hatangijwe umuganda wo gusoma ku bana usigaye uba mu mpera za buri kwezi. Hatanzwe kandi ibitabo 45 500 mu bigo by’amashuri 64 byo muri ako Karere. Bivuze ko buri munyeshuri ashobora kubona igitabo cyo gusoma.

Bamwe mu babyeyi bari bitabiriye igikorwa cyo gutangiza ubukanguramabaga bavuze ko bagiye kujya baha abana umwanya wo gusoma kandi bakabibakundisha.

Nkeshimana Oscar ati “Icyo ngiye gukora ni ugufata gahunda y’iminota 15 buri munsi nkaha umwanya abana bagasoma nkabibigisha ndetse nkajya mubaza n’ibibazo bijyanye n’ibyo yasomye.”

Ku ruhande rw’abarimu nabo bavuga ko bagiye gutanga umusanzu wabo mu gufasha abana kumenya gusoma no kwandika ndetse no kubikunda.

Uwambajimana Donatille ati “Njyewe nka mwarimu mba nzi icyiciro umwana arimo, icyo ngomba gukora ni ukumutiza igitabo kijyanye nacyo noneho nkamukurikirana yamenya gusoma nkamutiza ikindi ku buryo azamuka mu cyiciro akajya mu kindi.”

Umuyobozi w’agashami gashinzwe Ubugenzuzi bw’Uburezi bw’amasomo ya Siyansi muri Minisiteri y’Uburezi, Nzeyimana Jean Claude, yasabye ababyeyi n’abarezi guha abana umwanya uhagije wo gusoma basubira mu byo bize kuko ariwo musingi w’ubumenyi burambye.

Ati “Ni uguha umwana umwanya wo gusoma agatizwa n’ibitabo agahabwa nibura iminota 15 ya buri munsi asoma. Ibyo bigomba kugirwamo uruhare n’abarezi, ababyeyi, abayobozi b’amashuri n’abashinzwe uburezi mu mirenge n’uturere.”

Nzeyimana yibukije ko kugira ngo umwana abashe kwiga neza andi masomo akwiye kubanza kwigishwa neza ururimi gakondo kugira ngo bimubere umusingi mwiza wo kumenya ibindi.

Ubukangurambaga bwo gutoza abana gusoma butangijwe ku nshuro ya gatatu; kuri iyi nshuro hahembwe abana 38 biga mu mashuri abanza n’ayisumbuye batsinze neza amarushanwa yo gusoma, bahawe ibikapu birimo amakayi n’amakaramu.

Abanyeshuri batsinze ikizamini cyo gusoma Ikinyarwanda bahawe ibihembo
Abarimu basabwe gutoza abana gusoma no kubibakundisha
Kuri iyi nshuro hahembwe abana 38 biga mu mashuri abanza n'ayisumbuye batsinze neza amarushanwa yo gusoma
Mu Karere ka Gisagara hatangijwe ubukangurambaga bwo gutoza abana gusoma no kubibakundisha
Umuyobozi w'Agashami gashinzwe Ubugenzuzi bw'Uburezi bw'amasomo ya Siyansi muri Mineduc, Nzeyimana yasabye ababyeyi gukundisha abana gusoma

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .