Gisagara:Buri rugo rutishoboye ruri guhabwa inkunga y’ibihumbi 800 Frw yo kwikenuza

Yanditswe na Prudence Kwizera
Kuya 18 Gashyantare 2020 saa 09:08
Yasuwe :
0 0

Mu Karere ka Gisagara abaturage batishoboye bari guhabwa amafaranga y’u Rwanda 806,700 Frw nk’inkunga ibafasha kwikura mu bukene bagakora ibikorwa bibageza ku majyambere arambye.

Ni umushinga watangiriye mu Murenge wa Mugombwa mu mpera z’umwaka ushize wa 2019 aho bahereye ku ngo zituye hafi y’Inkambi icumbikiye Impunzi z’Abanye-Congo; impunzi ziyirimo nazo zirayahabwa.

Umuyobozi wungirije ushinzwe imibereho myiza y’abaturage mu Karere ka Gisagara, Gasengayire Clemence, avuga ko ayo mafaranga ari gutangwa muri gahunda yitwa ‘Give Direct’ yazanywe na Minisiteri y’Ubutegetsi bw’Igihugu.

Yasobanuye ko uwo mushinga waje mu Karere ka Gisagara kuko ari kamwe mu turere tw’u Rwanda dufite umubare munini w’abaturage bari mu bukene.

Ati “Give Direct ni Umuryango w’Abanyemerika; izatanga amafaranga ku miryango 3300 y’abaturage b’Umurenge wa Mugombwa kongeraho impunzi zose ziri mu Nkambi ya Mugombwa.”

Gasengayire yakomeje avuga ko atangwa mu byiciro bibiri; icyiciro cya mbere umuryango uhabwa 329,680 Frw naho mu cya kabiri ugahabwa 477,020 Frw

Yavuze ko kugeza ubu bamaze guha ayo mafaranga abaturage bangana na 85% hakaba basigaye abo mu Kagari kamwe ka Baziro kandi nabo bazayahabwa muri Werurwe 2020. Hari abayahawe yose hari n’abamaze guhabwa ay’icyiciro cya mbere bategereje guhabwa icya kabiri.

Yasobanuye ko urugo ruyahabwa ari ururi mu cyiciro cya mbere, icya kabiri n’icya gatatu by’ubudehe bigaragara ko ruri mu bukene kandi rukaba rumaze byibura amezi atandatu ruhatuye mbere y’ibarura.

Mu rwego rwo gukurikirana kugira ngo abayahabwa batayapfusha ubusa, buri rugo rubanza kugaragaza imihigo y’ibyo ruzakora biruvana mu bukene kandi ubuyobozi bugakurikirana kenshi ko bari kubishyira mu bikorwa.

Ati “Buri muturage afite umuhigo w’icyo azajya ayakoresha ahereye ku by’ibanze biri mu bikenewe mu mibereho by’ibanze nko kuvugura inzu ye, udafite itungo akiha umuhigo ko azagura inka. Abageze mu zabukuru bafite inzu bagomba kugira ikiraro cy’amatungo magufi. Ni ibintu nk’ibyo bituma umuturage ava mu bukene.”

Bamwe mu baturage bamaze guhabwa amafaranga y’icyiciro cya mbere bashimira Leta y’u Rwanda ikomeje kubitaho, bakavuga ko nabo batayitenguha kuko biteguye kuva mu bukene.

Uyisabye Josée ati “Nari nkennye cyane ntagira n’inzu none ubu ndimo kuzamura inzu ya metero eshanu kuri zirindwi, ndimo gushima Imana n’ubuyobozi bwacu bwiza.”

Karengera Medard ati “Ubu ndimo ndavugurura inzu yanjye ngo nshyiremo sima mpakore neza nshake n’irangi nshyiremo. Twaguze amabati tuvugurura inzu yacu; twaguze imyambaro twishyura n’ideni twari dufite, mbese yatugiriye akamaro atuvana mu bukene.”

Benshi mu bayahawe baguzemo amatungo yo korora, matela zo kuryamaho n’ibikoresho by’ibanze byo mu rugo abandi bari kuvugurura inzu zabo zari zitameze neza bazikurungira bakazisakaza n’amabati.

Imibare igaragaza ko mu Murenge wa Mugombwa hazatangwa amafaranga y’u Rwanda asaga Miliyari eshatu agahabwa ingo zose uko ari 3300 ziwutuye.

Ubuyobozi bw’Akarere ka Gisagara buvuga ko nyuma yo kuva muri Mugombwa bazakomereza mu yindi mirenge bahereye ku ifite abakene benshi.

Ayo mafaranga ni inkunga ibafasha kuva mu bukene ntabwo ari inguzanyo bazishyura.

Abatagiraga matela zo kuryamaho nabo bahise bazigura
Amafaranga barimo guhabwa agamije kubakura mu bukene no guhindura imibereho yabo
Bamwe mu bahawe amafaranga bahise baguramo ibyo bakeneye nk'amabati yo gusakara inzu
Bari kuguramo ibikoresho bahereye ku by'ibanze bakeneye
Bemeza ko ayo mafaranga y'inkunga barimo guhabwa abafitiye akamaro cyane kuko baguzemo ibyo bakeneye
Nyuma yo guhabwa amafaranga buri wese agura icyo akeneye kiri mu muhigo yahize
Umuyobozi wungirije ushinzwe imibereho myiza y’abaturage mu Karere ka Gisagara, Gasengayire Clemence, yavuze ko kugeza ubu bamaze guha ayo mafaranga abaturage bangana na 85% bo mu Murenge wa Mugombwa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .