00:00:00 IGIHE NETWORK KN KINYARWANDA EN ENGLISH FR FRANCAIS

Gisagara: Bahangayikishijwe n’umuhanda wangiritse ubangamiye ubuhahirane

Yanditswe na Akayezu Jean de Dieu
Kuya 6 Ukuboza 2022 saa 04:03
Yasuwe :

Abaturage bo mu bice bitandukanye by’Akarere ka Gisagara baratabaza ubuyobozi nyuma y’iyangirika rikomeye ry’umuhanda uhuza ibice bitandukanye by’aka karere n’aka Huye mu Ntara y’Amajyepfo.

Ni umuhanda uturuka mu Murenge wa Mamba ukanyura mu yindi Mirenge nk’uwa Musha na Save muri Gisagara ukagera mu Karere ka Huye.

Uyu muhanda kandi niwo unyuramo imodoka nini z’amakamyo ajya ku ruganda rubyaza amashanyarazi nyiramugengeri.

Abaturage bavuga ko wangiritse kuko mbere wari utsindagiye (latérite ) nyuma imvura ikaza kubisenya kuri ubu ukaba waracitsemo ibinogo.

Ubusanzwe kuva i Mamba ugera i Karama muri Huye ni 1200Frw wakoresheje imodoka zitwara abantu mu buryo bwa rusange mu gihe uwakoresheje moto ashobora gucibwa 3000 Frw cyangwa 4000Frw.

Abaganiriye na IGIHE bagaragaje ko uyu muhanda uramutse ukozwe byagabanya impanuka ndetse bikoroshya ingendo zo muri iyi Mirenge yo muri Gisagara ndetse no kugera i Huye.

Uwitwa Barakagira Onesephore utuye mu Kagari ka Kigarama ,Umurenge wa Musha mu Karere ka Gisagara, yavuze ko nko muri ibi bihe imvura iba yabaye nyinshi bisaba kwigengesera cyane.

Yagize ati “Urabona bari barashyizemo latérite none yashizemo kubera amazi agenda ayisenyagura, hanyuma rero habera impanuka, ibinyabiziga bikagongana. Hari n’abajya bacumbikisha iwanjye ibinyabiziga. Dukeneye kaburimbo.”

Yakomeje agira ati “Mu minsi ishize habereye impanuka y’imodoka yari ihetse ibicuruzwa birimo inzoga, yaguye munsi y’umuhanda inzoga zirameneka n’ibyo bicuruzwa abantu baritoragurira.”

Hari undi muturage witwa Innocent wo mu Kagari ka Kigarama wagize ati “Icyo twifuza ni uko umuhanda wasanwa ndetse n’iteme riherutse kwangirika rigasanwa kuko nk’ubu imodoka ntabwo zishobora kurinyuraho.”

Hari amateme yakozwe kugira ngo amazi anyure munsi y’umuhanda ariko nabyo ngo byarangiritse.

Umuyobozi w’Akarere ka Gisagara Wungirije ushinzwe Iterambere ry’Ubukungu, Habineza Jean Paul yabwiye IGIHE ko bamenye iki kibazo ariko harimo gushakwa umuti urambye.

Ati “Ahanini byaturutse kuri iyi mvura yaguye mu buryo budasanzwe kuko hari n’amazu yangiritse , birumvikana iyo umuhanda ugendwa hari amakamyo awugendamo, imodoka zitambuka umunsi ku munsi […] latérite igenda ivamo ariko tugomba kubikemura mu minsi ya vuba.”

Yakomeje agira ati “Ikiba gisigaye ni ugushaka amafaranga, iyo yabonetse hari ikigo dusanzwe dukorana mu gusana imihanda kiratangira kubikora vuba ubundi urujya n’uruza rw’abantu rukomeze.”

Habineza avuga ko mu kwezi kumwe [muri Mutarama 2023] ibikorwa byo gusana uyu muhanda bizaba byatangiye. Avuga ko ibikorwa byo kuwusana bizakomeza kubaho mu gihe ingengo y’imari yo kuwushyiramo kaburimo itaraboneka.

Abaturage basabye ko uyu muhanda wasanwa
Uburyo bukoreshwa mu ngendo ni moto ariko iyo ari mu mvura ziba zikosha by'umwihariko kubera ko umuhanda wangiritse
Imvura yaguye yatumye umuhanda uzamo ibinogo
Iri teme riherutse kwangirika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .