Gisagara: Abatishoboye barenga ibihumbi 60 bagiye korozwa inka mu mwaka wa 2020-2021

Yanditswe na Prudence Kwizera
Kuya 29 Ukwakira 2020 saa 08:38
Yasuwe :
0 0

Ubuyobozi bw’Akarere ka Gisagara bwiyemeje ko umwaka w’imihigo wa 2020-2021 uzarangira nta rugo rudafite inka kuko basanze ari itungo rifasha umuryango gutera imbere ukava mu cyiciro kimwe ukajya mu kindi.

Uyu muhigo wagarutsweho n’Umuyobozi wungirije ushinzwe Imibereho myiza y’Abaturage mu Karere ka Gisagara, Gasengayire Clémence, kuri uyu wa Kane tariki ya 29 Ukwakira 2020, ubwo yitabiraga igikorwa cyo guha inka imiryango 15 y’abatishoboye baba mu Cyiciro cya Mbere n’icya Kabiri by’ubudehe mu Murenge wa Ndora.

Izo nka z’imbyeyi zifite amezi bazihawe n’Itorero ADEPR Paruwasi ya Gisagara ku bufatanye na Compassion International.

Umushumba wa ADEPR Paruwasi ya Gisagara, Ndayishimiye Emmanuel, yavuze ko batanezezwa no kuyobora abakene bityo ari yo mpamvu bakora ibishoboka byose ngo babateze imbere.

Ati “Ntabwo dushaka kuyobora abantu bakennye, ni nayo mpamvu twabashyize mu matsinda kugira ngo tubigishe gucuruza, guhinga neza kijyambere no korora ku buryo bazajya mu ijuru bameze neza. Iyo uyoboye umuntu ukennye buri gihe ahorana agahinda.”

Bamwe mu bahawe inka bavuze ko bari bamaze imyaka myinshi batorora bityo bagiye kuzifata neza zikazabateza intambwe mu iterambere.

Yabaragiye Fortunée ati “Ndumva iyi nka ngomba kuyifata neza ikambyarira akanyana noneho nkabona n’amata yo guha abana banjye. Nari maze igihe mpinga bikanga kwera kubera kubura ifumbire, ariko ndumva ubwo mbonye ifumbire nziva mu cyiciro cy’abatishoboye.”

Niyirora Consolée we yavuze ko kuva yakubaka urugo mu 2002 atigeze atunga inka ariko kuba ayibonye igiye kumuhindurira ubuzima.

Ati “Iyi nka izankura mu bukene kuko izampa amata abana bayanywe bagubwe neza kandi izampa n’ifumbire mpinge neze. Njyewe icyo nzakora ni ukuyifata neza nkayitaho.”

Mu minsi ishize ADEPR Paruwasi ya Gisagara yahaye imiryango itishoboye ihene 268 n’inkoko zirenga 260 hagamijwe kuyivana mu bukene.

Gasengayire yavuze ko biyemeje ko uyu mwaka w’imihigo wa 2020-2021 uzarangira buri rugo rufite inka.

Ati “Tumaze gutanga inka 27,575 ubwo ingo twahaye zingana na 31.5% kuko abaturage basigaye ni 60,480 nabo dushaka ko uyu mwaka urangira byibura buri muryango wo mu Karere ka Gisagara utunze inka. Dufite icyizere ko uyu mwaka w’imihigo uzajya kugera ku musozo buri muryango ufite inka.”

Yavuze ko uyu muhigo bawihaye bashingiye ku kuba abahawe inka mbere imibereho yabo yarahindutse, bava mu mubare w’abakennye.

Kugeza ubu mu Karere ka Gisagara habarurwa ingo 88,201 muri zo izirenga 28,500 zitunze inka.

Bahawe inka nziza z'imbyeyi zimaze igihe zivutse
Kuri iyi nshuro imiryango 15 y'abatishoboye niyo yahawe inka
Umushumba wa ADEPR Paruwasi ya Gisagara, Ndayishimiye Emmanuel, yavuze ko batanezezwa no kuyobora abakene bityo ari yo mpamvu bakora ibishoboka byose ngo babateze imbere
Umuyobozi wungirije ushinzwe Imibereho myiza y’Abaturage mu Karere ka Gisagara, Gasengayire Clémence, yasabye abahawe inka kuzifata neza kugira ngo zibavane mu bukene
Yabaragiye Fortunée yavuze ko inka yahawe ayitezeho iterambere

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .