00:00:00 IGIHE NETWORK KN KINYARWANDA EN ENGLISH FR FRANCAIS

Gicumbi: Abagore basaga ibihumbi 10 basoje 2022 bahinduye icyiciro cy’ubudehe

Yanditswe na Evence Ngirabatware
Kuya 31 Ukuboza 2022 saa 01:10
Yasuwe :

Bamwe mu bagore bo mu Karere ka Gicumbi barishimira ko basoje umwaka wa 2022 bahinduye icyiciro cy’ubudehe bagatera imbere, babikesha kwizigamira mu matsinda.

Ni ubuhamya butoroshye kuko iri terambere barishakishije mu myaka itandatu ishize, bakaba bavuga ko mbere yaho biciraga isazi ku jisho kubera ubukene, bamwe baranasuzugurwaga, gusa kuri ubu abenshi muri bo banashimishwa n’uko batangiye kwinjizwa mu nzego z’ubuyobozi kubera urugero rukomeye batanze muri bagenzi babo.

Mukankubito Valentine amaze imyaka itandatu acuruza Avoka, inyanya n’ubunyobwa ku gataro, wabarizwaga mu cyiciro cya mbere cy’Ubudehe mu myaka itandatu ishize, kuri ubu asoje umwaka wa 2022 ari mu cyiciro cya gatatu.

Ati “Njye nabaye umuntu usuzuguritse kuva kera kubera ubukene. Nari ntaramenya ibyo kwizigama kubera no kutagera mu ishuri. Natangiye gucuruza ndanguza amafaranga 1000, nkacuruza avoka ku gataro ariko kubonamo ayo kurya byari ingorabahizi. Nyuma naje kuguza ibihumbi bitatu mu itsinda ntangira kurangura n’inyanya.”

Uyu mugore avuga ko kuri ubu akomeje gucuruza no gukorana n’amatsinda y’amakoperative atandukanye, aho mu cyumweru kimwe yizigama asaga ibihumbi icumi.

Umwaka wa 2022 yawuguzemo inka y’imbyeyi, ari mu nzu nziza kandi akomeje ubucuruzi.

Abisangiye n’abandi bagore basaga ibihumbi 10 bahinduriwe ubuzima, nyuma yo kwegerwa n’Umuryango nyafurika AEE, bakoranye guhera mu 2016.

Mu mwaka wa 2016 hashinzwe amatsinda 568 y’abagore agamije kuzamura imibereho y’abana babo binyujijwe mu iterambere ry’umuryango, hakorwa impuzamatsinda 56 n’urugaga rumwe byahuzaga ingo zigera ku 10.360.

Kuri ubu abagera kuri 260 bamaze kwinjira mu nzego z’ubuyobozi bw’ibanze ku mudugudu, nyuma y’aho bagaragaye ko batakiri mu cyiciro cya mbere.

Uwiringiyimana Jacqueline uhagarariye impuzamatsinda bita Twarabohowe ikorera mu murenge wa Giti mu kagari ka Murehe, yagize ati Twarahuguwe, twigishwa uburyo twakwegera ibigo by’imari kwaka inguzanyo no kumenya kuyishyura, gukorera muri koperative. Twigishijwe ibyo gukora nk’ubuhinzi, ubworozi, kudoda, kogosha ndetse no gucuruza. Kuri ubu turi gufasha bagenzi bacu ngo na bo bazarusheho kuzamuka mu byiciro by’ubudehe be kubarizwa mu batishoboye”.

Namara Wherny uyobora AEE ishami rya Gicumbi, avuga ko bishimira uburo basoje icyiciro cya kabiri cyo kwigisha uburyo bwo kwizigama no gukorera mu matsinda.

Ati “ Twari dufite umushinga wo gufasha umwana binyuze mu guteza imbere umuryango, twari tumaze imyaka igera kuri itandatu kuri uyu mushinga mu mirenge icumi ya Gicumbi. Twibandaga mu kuzamura abagore binyuze mu kubigisha gukorera mu matsinda”.

Umuyobozi w’Akarere ka Gicumbi wungirije ushinzwe imibereho y’abaturage, Mbonyintwari Jean Marie Vianney yashimye AEE yafashije abo baturage kwivana mu bukene.

Ati “Mwigishijwe kwizigama no gukorera mu matsinda abafasha kwiteza imbere, ntidukeneye kubona umwana w’umwe mu banyamuryango banyu ugaragaraho imibereho mibi.Turashima umuryango w’ivugabutumwa nyafurika AEE wabafashije guhugurwa no kubongerera ubumenyi, namwe mugerageze gufasha bagenzi banyu.”

Abagore bafashijwe ni abo mu mirenge ya Rutare, Bwisige, Bukure, Rwamiko, Mutete, Rubaya, Nyamiyaga, Ruvune, Giti na Muko.

Aba bagore bahuguwe gukora imyuga itandukanye
Uyu mushinga wageze mu murenge wa Rutare, abagore bishimira ubufasha bahawe
Ubu bufasha hasabwe ko bwagezwa no mu yindi mirenge
Aba bagore basabwe kwita ku mibereho myiza y'abana babo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .