00:00:00 IGIHE NETWORK KN KINYARWANDA EN ENGLISH FR FRANCAIS

Gicumbi: Abasaga 1400 bataye ishuri bari gushakishwa ngo barisubizwemo

Yanditswe na Evence Ngirabatware
Kuya 21 Mutarama 2023 saa 03:02
Yasuwe :

Ubuyobozi bw’Akarere ka Gicumbi buhangayikishijwe n’abana bataye ishuri kandi ko bwahagurukiye iki kibazo ndetse ko aho bizaba ngombwa hazajyaho n’ ibihano ku babyeyi bakura abana babo mu ishuri kandi bafite ubushobozi bwo kubishyurira ibyo bakeneye.

Kuri uyu wa 20 Mutarama 2023 mu Murenge wa Miyove mu Kagari ka Mubuga bitabiriye ubukangurambaga bwo gushakisha abana bataye ishuri. Ku munsi umwe babashije kubona abagera kuri 25 basubizwa mu ishuri ndetse bavuga ko bakomeje gushaka n’ abandi mu tugari dutandukanye.

Mu Karere ka Gicumbi abana bagera kuri 703 biga mu mashuri abanza bamaze kuva mu ishuri, ku mpamvu zitumvikana nyuma y’aho ibibazo byinshi byakundaga kugaragara mu burezi byageragejwe koroshywa, harimo kugabanya amafaranga y’ishuri cyangwa kubaha ifunguro rya saa sita.

Abagera kuri 722 bigaga mu mashuri yisumbuye na bo bamaze kurivamo. Inzego zitandukanye zikomeje gusaba ubufatanye ngo bashakishe aho aba bana bari kuko ikibazo kidahagurukiwe n’ inzego zitandukanye bavuga ko byagorana kubasubiza kwiga bose.

By’umwihariko muri uyu murenge wa Miyove wakorewemo ubukangurambaga hari ibigo by’ amashuri birindwi, byigagamo abana bagera ku bihumbi 6374, muri abo bana abagera ku 112 bataye amashuri, gusa kuri uyu wa 20 Mutarama hashakishijwe abagera kuri 25 baraboneka basubizwa mu ishuri ku bufatanye n’Umuryango, Aco Rwanda ( Act For Children Organisation) .

Muri Karere ka Gicumbi bikunze kugaragazwa ko intandaro y’ ibibazo bituma ababyeyi batuzuza inshingano zo kujyana abana mu ishuri, akenshi usanga bituruka ku makimbirane yo mu miryango ndetse n’imyumvire ikiri hasi ku bamaze kugira amikoro, usanga babwira abana babo ko “bafite ku mafaranga kandi batarageze mu ishuri.”

Ikindi ni ubucukuzi bw’ amabuye y’agaciro arimo zahabu muri uyu murenge aho usanga abana bagira inyota yo gutunga amafaranga bakiri bato bityo bakishora mu birombe rwihishwa.

Mu kiganiro twagiranye n’ abana bari barataye ishuri nyuma bakabasha kugaruka kwiga, bavuze ko bari batangiye gukora imirimo ivunanye kandi ko nyuma yo kugarurwa kwiga bashimira ubuyobozi bw’ ishuri bwabakurikiranye bukabagarura mu ishuri.

Uwitonze Juliene yiga mu mwaka wa Gatatu mu ishuri rya G.S Miyove, avuga ko yari yavuye mu ishuri kubera ikibazo cy’ubushobozi bucye bwo kwiyishyurira amafaranga yo kwiga, ayo kurya ndetse no kugura imyambaro y’ ishuri, ashima ubuyobozi bw’ishuri bwamugaruye.

Umuyobozi w’ ishami ry’uburezi mu Karere ka Gicumbi, Nsengimana Jean Damascene, yavuze ko muri uyu mwaka abana bagera kuri 2361 bari bataye ishuri mu mashuri abanza ndetse no mu mashuri yisumbuye abagera kuri 688 bari barivuyemo.
Hamaze kugarurwa abagera kuri 1558 mu mashuri abanza na 466 mu mashuri yisumbuye kandi ko ubukangurambaga bukomeje.

Yagize ati “Ubu dufite abana 703 turi gushakisha bataye ishuri mu cyiciro cy’abanza ndetse na 722 mu yisumbuye. Ababyeyi basabwa kumenya amategeko yashyizweho mu burezi kuko hariho n’ibihano ku basibya abana kwiga cyangwa bakabima ibikoresho by’ ishuri”.

Yongeraho ko umuntu uwari we wese ukoresha abana imirimo ituma atajya mu ishuri nko kwahirira amatungo ,kubakoresha mu birombe cyangwa kubakoresha akazi ko mu rugo ahanishwa ihazabu kuva ku bihumbi 200 kugera ku bihumbi 500 by’amafaranga y’u Rwanda.

Abana basubijwe mu ishuri bafashwa kubona ibikoresho bari bakeneye
Ababyeyi baratungwa agatoki ku myumvire ikiri hasi
Abayobozi b'ibigo by'amashuri basabwe gushakisha abana bataye ishuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .