Gen Mupenzi yasabye Ingabo z’Umutwe wa Afurika y’Iburasirazuba kutarangamira inkunga z’amahanga

Yanditswe na Uwimana Abraham
Kuya 16 Ukuboza 2020 saa 03:50
Yasuwe :
0 0

Umugaba Mukuru w’Ingabo zirwanira ku butaka, Lt Gen Jean Jacques Mupenzi, yashishikarije ibihugu binyamuryango by’Umutwe w’Ingabo za Afurika y’Iburasirazuba guhora witeguye (EASF) kurushaho kwishakamo ibisubizo by’ibibazo byose kuruta gutegereza kuzabikemurirwa n’inkunga.

Ibi Lt Gen Jean Jacques Mupenzi yabivugiye mu nama ya 28 y’Inzego Nkuru za EASF iri kubera i Kigali kuva ku wa 14 Ukuboza 2020, kuri uyu wa 16 Ukuboza 2020, hakaba hatangiye inama yahuriyemo abagaba b’ingabo izageza ku wa 17 Ukuboza 2020.

Icyiciro cya mbere cy’iyi nama cyahuje impuguke zo muri EASF kuva ku wa 14 Ukuboza 2020, hateganyijwe ko iyi nama izasozwa n’icyiciro cya gatatu cy’inama izahuza ba Minisitiri b’Ingabo n’ab’umutekano bo mu bihugu binyamuryango bya EASF, izaba ku wa 18 Ukuboza 2020.

Umugaba Mukuru w’Ingabo zirwanira ku butaka, Lt Gen Jean Jacques Mupenzi, yavuze ko kugira ngo uyu mutwe ugere ku ntego zawo zo kubungabunga amahoro n’umutekano mu karere, ari uko ibihugu binyamuryango bishishikarira kwishakamo ibisubizo bitarangamiye ku nkunga.

Yagize ati “Tugomba gushikama ku cyo twiyemeje ari cyo gushaka ibisubizo bya Afurika ku bibazo bya Afurika, tukagira twese ubushake bungana bwo gushakishiriza ibisubizo kuri uyu mugabane kuruta uko bikorwa uyu munsi, kugira ngo turusheho guha igisobanuro gifatika uyu mutwe.”

Yakomeje avuga ko kandi nta gihugu na kimwe gikwiye gusigara inyuma muri uru rugamba rwo guharanira amahoro n’umutekano mu karere, kuko iyo igihugu kimwe gihungabanye, nta kabuza n’ibindi biba bidatekanye.

Ati “Mu mwuka wo gukorera hamwe, ndetse n’imyumvire y’uko umutekano w’igihugu kimwe nta kabuza ufite aho uhuriye n’ibindi, dukwiye guhuriza hamwe imbaraga tugahangana n’ibibazo bifite aho bihuriye n’amahoro n’umutekano, tugakoresha imbaraga zose dufite dufatanyije n’abandi, kugira ngo tugere ku ntego ndetse no ku nyungu z’abaturage bacu.”

Umuyobozi wa EASF, Brig Gen Getachew Shiferaw Fayisa, yavuze ko kuri ubu ubukungu bw’uyu mutwe butifashe neza, ahanini bivuye ku ngaruka za Covid-19, yasabye ibihugu ko n’ubwo ubukungu bwabyo bwahungabanyijwe n’icyorezo bikwiriye no kuzirikana EASF muri duke byabona.

Yagize ati “Ubukungu bw’uyu mutwe kuri ubu bwifashe nabi cyane, kugeza ubu ibihugu bibiri byonyine nibyo bimaze gutanga umusanzu, nishimiye kwakira amakuru ko na Leta y’u Rwanda yohereje umusanzu wayo biteganyijwe ko ugera kuri konti zacu vuba.”

Yongeyeho ati “Turumva ingaruka COVID-19 yagize ku bukungu bwacu, gusa ubwo duteganyiriza amafaranga make dufite, ndabasaba ko bwazirikana na EASF.”

Mu mwaka ushize wa 2019 EASF yakoresheje agera kuri 7.359.479 $, muri yo 61% akaba ari ayavuye mu banyamuryango, 23% yari inkunga yavuye mu nshuti, mu gihe 16% ari ayavuye mu Muryango wa Afurika Yunze Ubumwe binyuze muri APSA (African Peace and Security Architecture).

Buri gihugu kigenerwa umusanzu kizatanga hashingiwe ku musaruro mbumbe wacyo, ni muri urwo rwego nko muri uwo mwaka wa 2019, u Rwanda rwatanzemo umusanzu ugera kuri 9.3%, kuri ubu kandi bikaba byemejwe ko n’umusanzu w’uyu mwaka rwawutanze, rukaba rubaye igihugu cya gatatu cyihutiye gutanga umusanzu.

Mu bindi bihugu by’inshuti bitera inkunga uyu mutwe harimo Ubwami bw’u Bwongereza, Denmark, Finland, ndetse na Norvège.

Iyi nama yahuje abaga b’ingabo izasozwa ku munsi w’ejo, biteganyijwe ko ifatirwamo imyanzuro itandukanye, irimo uburyo bw’imikorere y’uyu mutwe mu guhangana n’iterabwoba mu myaka itanu iri imbere, ndetse n’izindi gahunda z’ibikorwa bya EASF mu myaka itanu iri imbere.

EASF yatangiye ku wa 16 Nyakanga 2004, ukaba ari umwe mu mitwe itanu igize Ingabo za Afurika zihora ziteguye (African Standby Force/ASF) zigizwe n’abasirikare, abapolisi ndetse n’abasivili aho kimwe mu byo bashinzwe ari uguhangana n’ibikorwa bihungabanya umutekano.

Ibi byiciro byose bihora byiteguye kugira ngo bitabare byihuse mu gihe gikwiye hagendewe ku mabwiriza agena gutabara aho rukomeye mu bikorwa byo gushyigikira amahoro mu karere.

EASF igizwe n’ibihugu icumi birimo u Burundi, Comoros, Djibouti, Ethiopia, Kenya, u Rwanda, Seychelles, Somalia, Sudani na Uganda, kuva muri Mata 2013, Repubulika ya Sudani y’Epfo yitabira ibikorwa by’uyu muryango nk’indorerezi ikaba izagirwa umunyamuryango mu bihe biri imbere.

Umugaba Mukuru w’Ingabo zirwanira ku butaka, Lt Gen Jean Jacques Mupenzi, ubwo yagezaga ijambo ku bitabiriye iyi nama
Uyu mutwe uri kurebera hamwe ibikorwa byawubashisha kugera ku nshingano zawo
Umuyobozi wa EASF, Brig Gen Getachew Shiferaw Fayisa, yagaragaje ko ikibazo cy'ubukungu bw'uyu mutwe ari kimwe mu bihangayikishije

Amafoto: RDF


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .