00:00:00 IGIHE NETWORK KN KINYARWANDA EN ENGLISH FR FRANCAIS

Gen Muhoozi yavanye i Kigali umusirikare wa Uganda wari ufunzwe

Yanditswe na Philbert Girinema
Kuya 23 January 2022 saa 12:01
Yasuwe :

Gen Muhoozi Kainerugaba yavuye i Kigali amwenyura nyuma y’uko asabye Perezida Kagame gufungura umusirikare wa Uganda wari warayobeye mu Rwanda akabimwemerera.

Gen Muhoozi wari mu Rwanda kuva mu masaha y’igitondo kuri uyu wa Gatandatu, yavuye i Kigali ku gicamunsi ari kumwe n’umusirikare witwa Private Ronald Arinda wari ufunzwe.

Mu butumwa bwe, uyu Mugaba w’Ingabo za Uganda zirwanira ku Butaba, yanditse ko uyu musirikare yisanze ku butaka bw’u Rwanda atabizi ubwo yari muri gahunda ze bwite.

Gen Muhoozi yatangaje ko ashimira Perezida Kagame ku bwo kwemera ubusabe bwe bwo kurekura Arinda. Ati “Harakabaho umubano mwiza w’ibihugu byombi.”

Ibiganiro Gen Muhoozi yagiranye na Perezida Kagame, byagarutse ku bibazo u Rwanda rwakunze kugaragaza birubangamiye mu mubano warwo na Uganda.

Ibyo birimo kuba Uganda yarahaye rugari abarwanya ubuyobozi bw’u Rwanda, basigaye bidegembya ku butaka bwayo kandi bafite intego zo guhungabanya umutekano w’umuturanyi wayo. Abo barimo umutwe wa FDLR na RNC iyoborwa na Kayumba Nyamwasa.

Ibindi bijyanye n’ihohoterwa rikorerwa Abanyarwanda muri Uganda, aho bafatwa bashinjwa kuba intasi, bagakorerwa iyicarubozo nyuma bakajugunywa ku mipaka bagizwe intere.

Gen Muhoozi yatangaje ko ashingiye ku biganiro yagiranye na Perezida Kagame, umubano w’ibihugu byombi ushobora gusubizwa ku murongo mu gihe cya vuba.

Ibiro by’Umukuru w’Igihugu byatangaje ko Perezida Kagame na Gen. Muhoozi bagiranye ibiganiro byiza kandi “bitanga icyizere ku bibazo u Rwanda rwagaragaje” n’ibikwiye gukorwa kugira ngo umubano w’ibihugu byombi usubire mu buryo.

Gen Muhoozi yashimiye Perezida Kagame wemeye ubusabe bwe bwo kurekura umusirikare wa Uganda wari warayobeye ku butaka bw'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .