00:00:00 IGIHE NETWORK KN KINYARWANDA EN ENGLISH FR FRANCAIS

Lt Gen Muhoozi: Ni ryo tafari ryaburaga mu mubano w’u Rwanda na Uganda?

Yanditswe na Iradukunda Serge
Kuya 29 April 2022 saa 02:53
Yasuwe :

Nyuma y’imyaka ine y’urunturuntu, ibimenyetso bikomeje kuba byinshi ko umubano w’u Rwanda na Uganda ugana aheza, nyuma yo guhura k’Umugaba w’Ingabo za Uganda zirwanira ku butaka, Lt Gen Muhoozi Kainerugaba, na Perezida Paul Kagame.

Nyuma y’ugushidikanya kwa benshi, ku Cyumweru tariki 24 Mata 2022 Perezida Kagame yagiye i Kampala mu isabukuru y’uyu muhungu w’imfura wa Perezida Yoweri Museveni.

Ni kenshi abantu bakunze gufata ibyo Lt Gen Muhoozi avuga nk’amashyengo, bagera aho bamwita Jenerali wo kuri Twitter cyangwa ’the tweeting general’. Nyamara si ko biri.

Ni nako benshi bibwiraga ubwo yatangazaga ko Perezida Kagame ari mu bazitabira isabukuru ye, inkuru iba impamo, agirira uruzinduko i Kampala nyuma y’imyaka ine.

Iyo myaka u Rwanda rwakomeje gushinjamo Uganda guhohotera Abanyarwanda no gushyigikira abagamije gukuraho ubuyobozi bwarwo, nayo ikarushinja ubutasi.

Mu 2019 u Rwanda rwafashe icyemezo cyo gufunga Umupaka wa Gatuna, runasaba abaturage kudasubira muri Uganda.

Mu kureba icyo abantu bapfa, biba byiza uhereye ku cyo bapfana.

Uganda ifitanye igihango gikomeye n’u Rwanda cyane ko Abanyarwanda babaye impunzi muri icyo gihugu, baza kurwana mu ntambara zahiritse ubutegetsi bwa Idi Amin na Milton Obote.

Ku wa 3 Gashyantare 1981, itsinda ry’inyeshyamba ryarakoranye ngo rigabe igitero cya mbere, ari na yo ntango y’urugendo rwagejeje Museveni ku butegetsi mu 1986.

Igitero cya mbere cyagabwe ku Kigo cya gisirikare cya Kabamba, hagamijwe kubohoza intwaro zari zikenewe.

Bari abarwanyi 41, bafite imbunda 27. Mu bari bazifite harimo n’abanyarwanda Paul Kagame na Fred Gisa Rwigema.

Byarakomeje, kuko amateka agaragaza ko Museveni, umugore we na Muhoozi bafatiwe kuri bariyeri i Kireka ku wa 11 Ukwakira 1980, ndetse bashoboraga kwicwa.

Museveni aheruka gutangaza ko Kagame na murumuna we Salim Saleh, bari mu babarokoye.

Na nyuma yo kugera ku butegetsi mu 1986, abanyarwanda bagize uruhare mu kubaka Uganda.

Rwigema yagizwe Minisitiri wungirije w’Ingabo, icyo gihe Perezida Kagame yabaga mu by’ubutasi.

Ariko iw’abandi harahanda! Abanyarwanda baje kwikoranya batangiza urugamba rwo gutaha iwabo, rutangira ku ya 1 Ukwakira 1990. Icyo gihe Museveni na Juvenal Habyarimana wayoboraga u Rwanda bari mu nama i New York.

Museveni yanze kurekura

Abasesenguzi bahamya ko nyuma ya 1994, Museveni yakomeje kumva ko abayobozi b’u Rwanda – barimo abo yayoboye muri NRA – bakwiye gukomeza kuba munsi ye. Nyamara bari bageze mu kindi gihugu gifite ubusugire n’ubwigenge.

Abashinjwaga imikorere mibi mu Rwanda haba mu butegetsi bwa gisirikare na gisivili, inzira ya mbere yo gutoroka yari Uganda.

Hari n’ubuhamya bw’uko bamwe mu bayobozi mu Rwanda babwirwaga icyo gukora n’ubuyobozi bwa Kampala, hirengagijwe inzira zagenwe.

Byageze aho ibi bihugu bijya mu mitsi muri Congo mu ntambara izwi nk’iya Kisangani mu 2000, yamaze iminsi itandatu.

Iyo ntambara ifatwa nk’impamvu ya mbere yateye Museveni kurakarira u Rwanda kubera uburyo ingabo ze zatsinzwe, yirengagije ko ingabo z’u Rwanda zari zimaze imyaka icumi mu ntambara.

Ibibazo ntibyaburaga, ariko n’ibisubizo byahoraga hafi aho.

Ku isabukuru ya 15 yo Kwibohora, ku wa 4 Nyakanga 2009 Museveni yageze i Kigali, Perezida Kagame amwambika imidali ibiri mu birori byabereye muri Stade Amahoro.

Harimo Uruti nk’umudali wo kubohora igihugu (National Liberation Medal) n’Umurinzi nk’umudali wo guhagarika Jenoside (Campaign Against Genocide Medal).

Perezida Museveni yambikiwe imidali i Kigali, ku wa 4 Nyakanga 2009

Ni imidali kandi yahawe Meles Zenawi wari Minisitiri w’Intebe wa Ethiopia na Mwalimu Julius Nyerere wayoboye Tanzania.

Perezida Kagame na we yagiye muri Uganda ku wa 26 Mutarama 2012, yambikwa imidali itatu: Order of the Pearl of Africa; Kagera Medal na Luwero Triangle Medal.

Ni mu gikorwa cyabereye ahitwa Kapchorwa mu burasirazuba bwa Uganda. Icyo gihe hari mu isabukuru y’intsinzi ya National Resistance Movement (NRM).

Perezida Kagame yambikwa imidali muri Uganda, ku wa 26 Mutarama 2012

Imitwe yitwaje intwaro yarabihuhuye

Uganda yakomeje gufatwa nk’iwabo ha kabiri ku bayobozi bamwe cyane cyane abasirikare, kugeza ubwo abakoraga amakosa batorokeragayo mu rwego rwo guhunga ubutabera.

Mu bazwi baciye muri iyo nzira harimo Kayumba Nyamwasa, wayoboye Ingabo z’u Rwanda.

Kimwe na bagenzi be, bahahinduye ibirindiro bicurirwamo imigambi yo guhungabanya ubutegetsi bw’u Rwanda, ibintu u Rwanda rutishimiye na gato.

Ibintu byarakururanye, kugeza ubwo mu 2017 Abanyarwanda bari muri icyo gihugu badashyigikiye iyo migambi batangira gufatwa, gufungwa, bagakorerwa iyicarubozo.

Byageze aho imitwe irwanya ubutegetsi bw’u Rwanda yivanga mu mikorere y’inzego z’umutekano za Uganda, by’umwiharizo Urwego rwa gisirikare rushinzwe ubutasi, CMI.

Habarwa ko abanyarwanda barenga 20 biciwe muri Uganda, abandi bakorerwa iyicarubozo ryabavuriyemo ubumuga.

Abarekuwe bajugunywaga hakurya y’umupaka nta kintu na kimwe bambukanye, imitungo yabo igasigara muri Uganda.

Gen Muhoozi azaba umucunguzi?

Hitabajwe imishyikirano n’abahuza barimo Repubulika Iharanira Demokarasi ya Congo na Angola, hashyirwaho n’amatsinda y’ibiganiro akuriwe na ba Minisitiri b’Ububanyi n’amahanga, ab’umutekano n’abakuriye iperereza.

Imyaka itatu yashize nta musaruro ufatira, uretse ko icyorezo cya COVID-19 nacyo cyadindije ukwihuta kw’ibiganiro.

Nyamara byafashe ingendo ebyiri gusa za Muhoozi, ku wa Mbere tariki 31 Gashyantare 2022 umupaka wa Gatuna urafungurwa.

Ni mu gihe benshi batamuhaga amahirwe kuko nta bunararibonye yakunze kugaragaza muri politiki cyangwa dipolomasi.

Uruzinduko rwa mbere rwabaye ku wa 20 Mutarama 2022, rushimangirwa n’urwabaye muri Werurwe 2022 rugamije gukemura "ibibazo byari bisigaye" mu mubano.

Nyuma yaho Perezida Kagame na Museveni bahuriye i Nairobi.

Perezida w'u Rwanda Paul Kagame n'uwa Uganda, Yoweri Kaguta Museveni baherutse guhurira i Nairobi, benshi barushaho kugira icyizere ko ibihugu byombi bishobora kwiyunga.

Lt Gen Muhoozi yaje gutangaza ko ahura na Perezida Kagame yamwijeje ibintu bibiri.

Ati "Icya mbere, nk’Umugaba w’Ingabo za Uganda zirwanira ku butaka, ingabo zanjye ntizizigera zitera u Rwanda, icya kabiri nta n’umwe mu bagize inzego z’umutekano za Uganda urwanya u Rwanda uzaguma mu mwanya w’akazi arimo, ibindi biraza mukanya."

Akubutse mu Rwanda, Major General Abel Kandiho wayoboraga CMI yakuweho.

Mu gushimangira izahuka ry’umubano, Uganda iherutse kwirukana Robert Mukombozi usanzwe ari umuhuzabikorwa wa RNC muri Australia.

Muhoozi yatangaje ko uwo mugabo yasubijwe aho yari aturutse, anaburira Kayumba Nyamwasa ko bamwoherereje "umuntu wawe."

Ati "Jenerali Kayumba, ndagusabye gerageza kubaha Uganda. Dufitanye amahoro na Afande Kagame n’u Rwanda. Gerageza kubyubaha."

Ubwo yari yitabiriye isabukuru ya Muhoozi, Perezida Kagame yabwiye abari muri ibyo birori ko nubwo yari afitiye Muhoozi icyizere gikomeye ubwo bahuraga, yari azi ko ibyo amubwira abyemeranyaho na Museveni.

Ati "Mu buryo ntashidikanyaho nubwo nari mfitiye icyizere gikomeye Muhoozi, niyumvishaga ko Perezida wa Uganda (Se) agomba kuba ari inyuma y’ubwo butumwa."

Kugeza ubu bikomeje kuvugwa ko Muhoozi ashobora kuzasimbura se ku butegetsi.

Amatora ataha ya Perezida wa Uganda azaba mu 2026. Museveni azaba afite imyaka iri muri 80, Muhoozi afite 51.

Uburyo yakorewe ibirori by’isabukuru y’imyaka 48 byabaye mu gihugu hose, birimo guhuzwa no kumurika Muhoozi nk’umukandida, icyiswe ‘Muhoozi Project’.

Gen Muhoozi akomeje kugaragaza ubushake bwo gukemura ibibazo by'umubano mubi bimaze igihe hagati y'u Rwanda na Uganda.
Perezida Kagame mu birori by'isabukuru ya Lt Gen Muhoozi i Kampala

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .