00:00:00 IGIHE NETWORK KN KINYARWANDA EN ENGLISH FR FRANCAIS

Gen Maj Abel Kandiho wa CMI yazengereje Abanyarwanda muri Uganda yahinduriwe inshingano

Yanditswe na Musangwa Arthur
Kuya 25 January 2022 saa 01:48
Yasuwe :

Perezida Yoweri Kaguta Museveni yakuye Maj. General Abel Kandiho ku mwanya w’Ubuyobozi bw’Urwego rushinzwe Ubutasi mu Gisirikare cya Uganda (CMI), amusimbuza Maj Gen James Birungi.

CMI imaze igihe iregwa by’umwihariko n’u Rwanda gushimuta Abanyarwanda, ikabakorera iyicarubozo, abandi ikabasaba kujya mu mitwe y’’iterabwoba irimo RNC, P5, FDLR, FLN n’indi ihorana imigambi mibisha yo guhungabanya umutekano warwo.

Ku ruhembe rw’uru rwego, Maj. General Kandiho waruyoboraga yakunze gushyirwa mu majwi nk’utiza umurindi ibikorwa by’iyicarubozo rikorerwa Abanyarwanda ku butaka bwa Uganda.

Nko mu rubanza rwa René Rutagungira, umwe mu Banyarwanda bafungiwe muri Uganda, yavuze ko Kandiho yamukoreye iyicarubozo rikamuviramo ubumuga.

Kandiho yanagarutsweho mu birebana n’Abanyarwanda bashaka guhungabanya ubutegetsi bw’u Rwanda banyuze mu mitwe y’iterabwoba n’abagiye bafatwa bari gutegura iyi migambi mibisha barabyemeje.

Uheruka ni Nsabimana Callixte ‘Sankara’ wabaye Umuvugizi wa FLN, ufunzwe nyuma yo guhamwa n’ibyaha by’iterabwoba n’ubwicanyi.

Uyu musirikare mukuru mu Ngabo za Uganda yanashinjwe kuba ku ruhembe rw’iyicarubozo rikomeje gukorerwa Abanyarwanda muri Uganda binyuze muri CMI, urwego rushinjwa gukorana bya hafi n’umutwe wa RNC ya Kayumba Nyamwasa mu gushaka abayoboke muri Uganda, binyuze ku bantu batandukanye barimo Kayumba Rugema.

Sankara yigeze kuvuga ko Kandiho yari yaramwemereye ubufasha, aho ngo abo bakoranaga muri FLN bagiye muri Uganda, basanga yagize izindi gahunda, aboherereza ushinzwe iperereza ryo hanze.

Inkuru yo gusimbura Kandiho yatangajwe kuri uyu wa Kabiri, tariki ya 25 Mutarama 2022.

Chimp Reports yanditse ko amakuru yizewe ikesha bamwe mu bayobozi bakuru mu gisirikare ari uko Gen Kandiho yoherejwe muri Sudani y’Epfo aho yagizwe Intumwa yihariye ya Uganda.

Gen Abel Kandiho yakuwe ku ntebe yo kuyobora CMI nyuma y’iminsi itatu Gen. Muhoozi Kainerugaba usanzwe ari Umugaba w’Ingabo za Uganda zirwanira ku Butaka, ahuye na Perezida Kagame ndetse bakagirana ibiganiro bigamije kunoza umubano w’ibihugu byombi umaze igihe urimo agatotsi.

Yanabaye mu Rwanda aho yari umukozi muri Ambasade ya Uganda ahagana mu 2000 ariko aza kuhava nyuma yo kutumvikana n’inzego z’umutekano mu gihugu.

U Rwanda rwakunze gushinja Gen Kandiho kuba ku isonga ry’itotezwa n’ifungwa rya hato na hato ry’Abanyarwanda.

Uyu musirikare kandi raporo nyinshi zamushyize mu majwi kubera uruhare rwe mu guhonyora uburenganzira bwa muntu. Mu Ukuboza 2021, Leta Zunze Ubumwe za Amerika zamufatiye ibihano biri mu rwego rw’ubukungu.

Gen Maj Kandiho ni umwe mu bantu 15 bo mu bihugu bitatu bafatiwe ibihano na Amerika, aho imitungo ye yose iri muri iki gihugu yafatiriwe kandi Abanyamerika bakabuzwa gukorana na we ubucuruzi.

Gen Muhoozi mu butumwa yanyujije kuri Twitter, yashimiye Kandiho n’uwamusimbuye ku myanya mishya bahawe.

Yagize ati “Ndashimira Maj. General Abel Kandiho na Maj. General James Birungi ku nshingano nshya bahawe. Mwishyuke!’’

Maj Gen Birungi wahawe kuyobora CMI yari umuyobozi ushinzwe kugenzura iyubahirizwa ry’urugendo rwo kugarura amahoro, kwinjiza no gusubiza mu buzima busanzwe ingabo muri Sudani y’Epfo.

Yanabaye Umuyobozi w’Ingabo z’Umutwe udasanzwe (Special Forces Command, SFC); anayobora Igisirikare cya Uganda kirwanira mu Kirere.

Mbere y’uko izi mpinduka zitangazwa, Kainerugaba ku mugoroba wo ku wa Mbere, tariki ya 24 Mutarama 2022, yashyize kuri Twitter ye ifoto iriho ibendera ry’u Rwanda n’irya Uganda ayiherekesha amagambo avuga ko ubumwe bw’ibihugu byombi bufite imizi kuva kera.

Yakomeje ati “Turi umwe. Imana ihe umugisha ubumwe hagati ya Uganda n’u Rwanda.’’

Umuvugizi Wungirije wa Guverinoma y’u Rwanda, Mukuralinda Alain, aheruka gutangaza ko icyizere ku izahuka ry’umubano na Uganda wari umaze imyaka itanu urimo agatotsi kigeze kuri 60%.

Yagize ati “Ni ukuvuga ngo niba Perezida wa Uganda atumye Umuhungu we, Umugaba Mukuru w’Ingabo zirwanira ku butaka akaba n’Umujyanama we mu bikorwa bya gisirikare; iyo bigeze aho atuma umuntu nk’uwo kuri Perezida wa Repubulika icyizere abantu bafite cy’uko ibintu bigiye gutungana ntibaba bibeshye.”

Imyaka itanu irihiritse, u Rwanda na Uganda birebana ay’ingwe, imipaka ibihuza yarafunzwe n’ubuhahirane burahagarara.

Abasesenguzi muri Politiki bafashe iyi ntambwe nk’ikindi kimenyetso cyerekana ubushake bwo kunagura umubano umaze igihe urimo agatotsi.

Gen Maj Abel Kandiho wayoboraga CMI yoherejwe kuba Intumwa yihariye ya Uganda muri Sudani y’Epfo. Ashyirwa mu majwi nk'umwe mu bari ku isonga mu bikorwa byo gushimuta no gukorera iyicarubozo Abanyarwanda
Maj Gen James Birungi ni we wagizwe Umuyobozi mushya w’Urwego rushinzwe Ubutasi mu Gisirikare cya Uganda (CMI)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .