00:00:00 IGIHE NETWORK KN KINYARWANDA EN ENGLISH FR FRANCAIS

Gen Kabarebe yavuze ‘ku rujijo rukomeye’ ruri mu ihanurwa ry’indege ya Perezida Habyarimana

Yanditswe na Prudence Kwizera
Kuya 25 July 2022 saa 07:12
Yasuwe :

Umujyanama wa Perezida wa Repubulika mu by’Umutekano, Gen James Kabarebe, yavuze ko ihanurwa ry’indege yari itwaye uwari Perezida w’u Rwanda, Juvénal Habyarimana, ku wa 6 Mata 1994 ririmo urujijo bitewe n’ibyagiye biba mbere.

Yabigarutseho ku wa 22 Nyakanga 2022 ubwo yagiranaga ibiganiro n’abibumbiye mu ihuriro ry’urubyiruko mu Karere ka Gisagara ku nsanganyamatsiko igira iti “Turusheho kumenya amateka y’urugamba rwo kubohora igihugu n’uruhare rwacu, urugendo rurakomeje”.

Yasangije urubyiruko amateka yaranze urugamba rwo kubohora igihugu kuva mu 1990 kugeza mu 1994 nk’umwe mu barurwanye ariko by’umwihariko avuga no ku ihanurwa ry’indege yari itwaye Perezida Habyarimana.

Yagaragaje ko mbere y’uko indege ihanurwa hari ibyabaye mu Rwanda bitari bisanzwe ari na yo mpamvu harimo urujijo rukomeye.

Ingendo za Habyarimana

Gen Kabarebe yavuze ko ubusanzwe iyo Perezida Habyarimana yajyaga mu rugendo hanze y’igihugu, abaminisitiri bose babanzaga gutonda umurongo ku Kibuga cy’Indege i Kanombe bakamusezeraho.

Ati “Habyarimana kugwa n’indege ye nabyo birimo urujijo rukomeye cyane kubera ko ubundi iyo yajyaga gusohoka mu gihugu ajya Arusha [muri Tanzania] hazaga guverinoma yose ikamuherekeza ikamugeza i Kanombe [ku kibuga cy’indege] yaba agaruka bakaza, abaminisitiri bagatora umurongo bakamwakira.”

Yakomeje avuga ko ubwo Perezida Habyarimana yari agiye muri Tanzania atari ko byagenze kuko nta baminisitiri bongeye gutonda umurongo.

Ati “Ariko icyo gihe ajya kujya Dar es Salaam nta muntu n’umwe yabwiye ngo amuherekeze, yaherekejwe n’Umuyobozi w’Ibiro bye witwaga Enock Ruhigira wenyine.”

Kwimura abasirikare bakuru aho batuye

Ikindi giteye urujijo Gen Kabarebe yagarutseho ni uko ngo imiryango y’abasirikare bakuru bose yari ituye i Kanombe hafi y’Ikibuga cy’Indege yimuwe mu cyumweru kimwe.

Ati “Kariya gace mubona ka Kanombe kari gatuwe n’imiryango y’abasirikare bakuru bakomoka i Giciye aho Habyarimana yavukaga. Hari hashize icyumweru iyo miryango bayimuye yose.”

Aho niho avuga ko harimo urujijo kuko bitumvikana neza impamvu bimuwe bakajya gutuzwa ahandi kandi bigakurikirana n’ihanurwa ry’indege ya Habyarimana i Kanombe mu gice bari bavanywemo.

Gutumiza Umukuru w’Ingabo igitaraganya

Gen Kabarebe yavuze ko ku itariki ya 6 Mata 1994 ubwo Perezida Habyarimana yajyaga muri Tanzania, ageze ku Kibuga cy’Indege i Kanombe yatumijeho uwari Umugaba w’Ingabo, Castar Nsabimana mu buryo butunguranye.

Ati “Nsabimana ava mu kazi ke aza uko yakaje ageze ku Kibuga cy’Indege Habyarimana ati ‘injira mu ndege’ undi ati ‘ese ko ntiteguye, ko ntari nzi ko ngenda’ undi ati ‘ndakubwiye ngo injira’. Ubundi nta hantu na hamwe Perezida ajya ajyana n’Umugaba w’Ingabo mu ndege imwe, ntaho biba ni Habyarimana wari ubikoze wenyine. Na we yarabikoze bimukoraho.”

Gen Kabarebe yavuze ko Nsabimana Castar yinjiye mu ndege ajyana na Habyarimana muri Tanzania mu kugaruka indege iraraswa.

Icyo gihe ngo indege zari mu kirere bagaruka zari enye ariko ntihumvikana neza ukuntu iyarimo Habyarimana ari yo yarashwe.

Ati “Kugwa kw’indege ya Habyarimana na byo ni urujijo kuko indege zari mu kirere zari enye; hari indege ya Croix Rouge, hari indege ya MINUAR, hari indege yitwaga Sabena hari n’indege ya Habyarimana kandi uyobora indege yari umuntu umwe wo muri Rutsiro sinzi niba akiriho.”

“Ariko ni we wahagarikaga izi ndege akavuga ati iyi nize, iyi nihagarare, iyi nibe iretse iya Habyarimana nize. Iya Habyarimana ije irararaswa igwa iwe mu rugo.”

Nta muntu wemerewe kugera aho indege yaguye

Gen Kabarebe yakomeje avuga ko indege ya Habyarimana ikimara kuraswa ikagwa iwe mu rugo, nta muntu n’umwe wemerewe kuhagera kuko abasirikare bamurindaga bahise bahagota.

Ati “Indege yaguye mu rugo iwe hariya i Kanombe aho yabaga, igwa aho umugore ari kuri piscine yinywera champagne hamwe na bagenzi be, abona indege y’umugabo we iguye aho ngaho.”

“Nta muntu wemerewe kuhagera n’ingabo za MINUAR bazibujije kuhagera n’iz’Ababiligi bazibuza kuhagera. Iz’Abafaransa ni zo zahageze. Ibyari mu ndege byose babikuramo na ka gasanduku k’umukara [black box] aho umupilote avuga ibyamubayeho mu ndege nako barakarigisa baragatwara.”

Yavuze ko ibyo byose byari urwitwazo rw’uko bagomba gukora Jenoside bari barateguye kuko muri iryo joro hari abantu bahise batangira kwicwa, bukeye ubwicanyi bukwira mu gihugu hose bigaragara ko ari Jenoside yatangiye gushyirwa mu bikorwa.

Nyuma yaho nibwo uwari Umugaba Mukuru w’Ingabo za FPR Inkotanyi, Maj. Gen Kagame Paul, yahise atanga amabwiriza ku ngabo ze yo guhaguruka zikajya guhagarika Jenoside yakorerwaga Abatutsi.

Gen Kabarebe yavuze ko indege ya Habyarimana ikimara kuraswa ikagwa iwe mu rugo, nta muntu n’umwe wemerewe kuhagera usibye abasirikare bamurindaga n'abasirikare b'Abafaransa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .