00:00:00 IGIHE NETWORK KN KINYARWANDA EN ENGLISH FR FRANCAIS

Gen Kabarebe yavuze icyatumye ubumwe bw’Abanyarwanda bushoboka nyuma ya Jenoside yakorewe Abatutsi

Yanditswe na Ntabareshya Jean de Dieu
Kuya 15 April 2022 saa 08:07
Yasuwe :

Umujyanama wihariye wa Perezida mu by’Umutekeno Gen. James Kabarebe, yasobanuye ko kuba Abanyarwanda barabashije kwiyunga babikesha umuntu umwe gusa watekereje ko agomba gutandukana n’abandi akanga kwihorera.

Gen. James Kabarebe yavuze ko kubona u Rwanda rwaravuye mu icuraburindi rya Jenoside yakorewe abatutsi igakoranwa ubugome ndengakamere none mu gihe cy’imyaka 28 abantu bakaba bamaze kwiyunga ku kigero gishimishije, babikesha Perezida Kagame wagize igitekerezo gikomeye cyo kwirinda guhora.

Mu mvugo ijimije cyane mu ijambo rye yagejeje ku bakozi bo mu bigo bitandukanye birimo, RRA, Komisiyo y’Igihugu y’Amatora n’ibiro bikuru by’Umugenzuzi w’Imari ya Leta, Gen. Kabarebe yagaragaje ko aho bari ku rugamba nabo bumvaga ko bashobora kwihorera ariko baza gukurwamo ibyo bitekerezo na Perezida wa Repubulika Paul Kagame wari uyoboye urugamba.

Ati “Imbaraga ubuyobozi bw’Igihugu cyacu bwakoresheje ni imbaraga zidasanzwe kandi zidakwiye gupfushwa ubusa. Hari igihe dushaka kubicurika mu buryo bwa politiki, mu by’ukuri umuntu avugishije ukuri, uwatumye u Rwanda rubaho nyuma ya Jenoside ni umuntu umwe gusa.”

“Ntabwo ari Leta y’ubumwe, Leta y’ubumwe se ni iki? Ni umuntu umwe gusa watumye u Rwanda rumera uko rumeze, ni umuntu umwe gusa wanze bya bindi Albert yavugaga [kwihorera]".

Gen Kabarebe yavuze ko mu gihe cy’urugamba rwo guhagarika Jenoside yakorerwaga abatutsi, hari umunyamakuru w’umuzungu wigeze kubasura aho bari bari mu nkambi agirana ikiganiro na Perezida Kagame, amubaza niba mu basirikare ayoboye hari abarimo baba bariciwe imiryango undi aramwemerera niko kumusaba n’uburenganzira bwo kuba yababaza.

Ngo ubwo yababazaga hafi kimwe cya kabiri cyashyize hejuru cyemeza ko abagize imiryago yabo bishwe nawe [umunyamakuru] atungurwa n’uko abo basirikare bari ku rugamba kandi nyamara imiryango yabo yarishwe.

Icyo gihe Perezida Kagame yamusubije ko guhana uwakoze icyaha ari uruhare rw’ubutabera ari naho Gen Kabarebe yakomeje avuga ko ibyo bitashoboraga gutangwa n’umutu ubonetse wese uretse wa wundi ufite umutima ukomeye.

Ati “Ngira ngo uwashoboraga kubikora, uwashoboraga gukomeza kubivuga imbere y’imitwe y’ingabo yose ya RPA ukayihera mu burasirazuba ukageza mu burengerazuba…ukayibwira ngo ibyo turwanira ni ukubaka igihugu, ni uguhindura amateka y’iki gihugu.”

“Ukayibwira ngo ntitugomba gukora nk’uko abo turwanya bakora, hagomba kubaho itandukaniro, agatanga itegeko kugeza no kuri barya bose babonye imiryango yabo yarishwe. Nta muntu n’umwe washoboraga gutanga iryo tegeko ngo yumvikane atari umuntu umwe, ni ibintu bidashoboka.”

Yavuze ko amateka atagakwiye kujya acurikwa kubera impamvu za politiki kuko ibyakozwe byigaragaza kandi bizwi neza ko uwo muntu umwe ari we wemeye kugira itandukaniro n’abandi.

Ati “Ni bande se? twese ko twari abayobozi b’ingabo ni nde washoboraga kubikora? Hari naho wageraga ugasanga ubaye nka ba bana bato badatekereza kugera kure ariko ukibuka cya gitsure n’itegeko ryatanzwe kandi ryubahwaga nk’abubaha ijambo ry’Imana ku baryemera. Icyo ni cyo cyunamuye cyanakijije iki gihugu nta kindi. Abantu be kujya bibeshya.”

Ingabo za EX-Far zafashwe mbere zabaye ikimenyetso cy’ubumwe

Gen. Kabarebe yavuze ko ikimenyetso cya mbere cy’ubumwe n’ubwiyunge ku banyarwanda kuri we yakibonye ku itariki ya 4 Nyakanga 1994 Jenoside imaze guhagarikwa. Icyo gihe hari abasirikare batashoboye guhunga, harimo abatari bafite ibyo bikeka, abasigaye inyuma n’abari bafashwe.

Mu basirikare bafashwe mbere bageraga ku 1500 kandi ibintu byari bikimeze nabi, nko muri Kicukiro aho (amazi avanze n’ibinure) byavaga mu bantu bapfuye byatembaga mu muhanda nk’uruzi kandi byashoboraga guhembera umujinya.

Mu gihe Kimironko hari ikirundo cy’abantu bishwe banyanyagijweho amwe mu mafoto y’ingabo za RPA hejuru. Ibi ntabwo RPA yabigendeyeho ngo yihorere ahubwo bamaze kubafata binjijwe muri RPA niho batangiye bavuga ko ubumwe bw’abanyarwanda bishoboka.

Yavuze ko icyari cyoroshye ku ngabo za RPA nyuma yo gufata abo basirikare bahoze muri EX-Far kwari ukubegeranya bakabarasa.

Yakomeje agira ati “Ariko icyababujije ni rya tegeko nababwiye, RPA yarumviraga cyane, atari uko wayibwira uri kumwe nayo, oya. No kohereza message [ubutumwa] za gisirikare zikagera ku basirikare bakabyumva, barumviraga uretse ko bari barateguwe kugira ngo bagire itandukaniro nabo barwana nabo.”

Ingabo za RPA zemeye kubajyana, bamwe babajyana i Gako ari 800, abandi bajyanwa i Rubona 700 bigishwa n’abasirikare ba RPA nyuma y’amezi abiri basubizwa imbunda bamwe bahabwa imyanya y’ubuyobozi mu ngabo bigendanye n’amapeti bari bafite.

Gen Kabarebe yakomeje avuga ko “Kuva uwo munsi bibaye ni bwo nemeye ko u Rwanda rushobora kuzongera rukaba rumwe. Kuko aba ni abasirikare twari twararwanye guhera mu 1990 kugeza 1994 kandi nibo bicaga abantu, nibo bakoraga Jenoside cyangwa se bareberaga.”

Gen. James Kabarebe kandi yagaragaje ko nubwo byari bimeze gutyo abasirikare ba Ex-FAR bafatwaga na mbere yo muri 1994 n’ingabo za FPR babagumanaga mu gihe abafatwaga n’ingabo za Leta ya Habyarimana bakamenyako zifitanye isano na RPA zahitaga zicwa.

Mu 1993 ubwo FPR Inkotanyi na Guverinoma y’u Rwanda bari bamaze gusinyana amasezerano y’amahoro i Arusha muri Tanzania RPA yashyikirije guverinoma ingabo yari yarafashe zirenga 60 mu gihe bo bahawe abasirikare batatu gusa.

Kabarebe yavuze ko n’abasirikare ba RPA bakuru aho babaga bicaye muri bo wabonaga ko bafite gahunda yo kwihorera ariko ntibabikora.

Yavuze ko kuba u Rwanda rwararenze ibyo bihe bibi birimo no kwihorera atari ibintu byo gukinisha no gukiniramo kubera inyungu rusange z’igihugu, asaba buri munyarwanda wese bigendanye n’ibyo yaba atekereza guharanira gukomeza kubaka iguhugu.

Umujyanama wa Perezida mu by'umutekano Gen James Kabarebe yavuze icyatumye ubumwe bw'abanyarwanda bushoboka nyuma ya Jenoside
Abitabiriye iki gikorwa basabwe gukomeza gusigasira ubumwe bw'abanyarwanda

Amafoto: Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .