Gen Kabarebe yakomoje ku barwanyi babuza Abanyarwanda gutahuka bakabagira imbohe

Yanditswe na Habimana James
Kuya 15 Gashyantare 2020 saa 07:18
Yasuwe :
0 0

Umujyanama wa Perezida wa Repubulika mu by’Umutekano, Gen James Kabarebe, yakomoje ku bari abarwanyi mu mitwe yitwaje intwaro, bananiwe gutaha mu Rwanda ku neza kugeza ubwo bacyuwe ku ngufu, nyuma y’igihe baragize abaturage imbohe zaho.

Ku wa Kane nibwo Gen Kabarebe yaganirije urubyiruko 500 ruhagarariye urundi rwo mu Ntara y’Amajyaruguru n’Uburengerazuba, muri gahunda ya “Rubyiruko Menya Amateka Yawe”, ikiganiro cyabereye mu Kigo cy’Urubyiruko cya Kimisagara.

Kimwe mu bibazo byagarutsweho ni ukumenya impamvu kugeza uyu munsi hakiri Abanyarwanda batarafata inzira yo gutaha mu gihugu cyabo, mu gihe nta kibazo cyababuza kujya kwiyubakira urwababyaye.

Gen Kabarebe avuga ko kuba kugeza uyu munsi hari bamwe mu Banyarwanda bakomeje guhera muri ayo mashyamba, biterwa n’uko hari ababa badafite amakuru ko igihugu cyabo kibakeneye, hakaba n’abandi baba barafashwe bugwate na bamwe mu biyita abanyapolitiki baba barasize bakoze Jenoside.

Guhera mu Ukuboza umwaka ushize, u Rwanda rwakiriye mu kivunge ibihumbi by’Abanyarwanda bari barahungiye muri Repubulika Iharanira Demokarasi ya Congo, barimo abahoze ari abarwanyi b’imitwe irimo CNRD n’imiryango yabo.

Ni Abanyarwanda batashye nyuma y’uko Ingabo za Congo, FARDC zigabye ibitero bikomeye ku mitwe yitwaje intwaro yahungabanyaga umutekano muri icyo gihugu, abafashwe n’imiryango yabo boherezwa mu Rwanda.

Uretse abaturage basanzwe bakiriwe, harimo na bamwe mu basirikare bakomeye nka Brigadier General Mberabahizi David wakoraga mu Biro bya Perezida w’Umutwe wa CNRD Ubwiyunge, Colonel Gatabazi Joseph wari ushinzwe Ibikorwa bya Gisirikare n’Imyitozo mu Mutwe wa FLN n’abandi.

Gen Kabarebe avuga ko kuba kugeza mu 2020 hakiri abantu bagifatira abaturage mu mashyamba ya Congo bababeshya ko bazapfa nibagera mu Rwanda, ari ibintu bibi.

Yagize ati “Ureba aba bantu ukibaza nk’umuntu watwaye abo bantu akabafata bugwate icyo wamukorera, ubu bari i Mutobo hariya, muzajyeyo muzabasangayo, abitwa ba General, ba Colonel, abo bose barahari.”

“Ibitangaza by’abanyapolitiki byafashe abaturage bugwate mu mashyamba ya Congo ngo ni impunzi, bakirirwa birukankana nabo aho barwana na Mai Mai, abaturage kuko ari injiji baba batazi n’uburenganzira bwabo ugasanga babagumanye.’’

Ibyo ngo bitizwa umurindi nuko usanga hari abanyapolitiki bakoze ibyaha bakeneye kuguma mu mashyamba bihishe, ugasanga bagumanye n’abaturage gutyo.

Hakiyongeraho n’abariyo kubera ubujiji, kuko badafite amakuru ko igihugu cyabo kibakeneye kandi kibashaka ngo baze kugiteza imbere.

Urubyiruko rwasabwe kwitandukanya na politiki z'abatifuriza u Rwanda ibyiza
Gen Kabarebe ni umwe mu bahaye ikiganiro uru rubyiruko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .