00:00:00 IGIHE NETWORK KN KINYARWANDA EN ENGLISH FR FRANCAIS

Gen Kabarebe yagarutse ku butabera butajenjetse bwafashije Inkotanyi ku rugamba

Yanditswe na IGIHE
Kuya 5 Ukuboza 2022 saa 11:17
Yasuwe :

Umujyanama wihariye wa Perezida mu by’Umutekano, Gen James Kabarebe yavuze ko ikinyabupfura no kubahiriza amategeko n’amabwiriza ari intwaro ikomeye yafashije FPR Inkotanyi n’ingabo zayo ku rugamba rwo kubohora u Rwanda.

Gen Kabarebe yavuze ko iyo Inkotanyi zitagira ikinyabupfura, nta kindi zari gutsindisha ingabo za Leta bari bahanganye.

Yabitangaje kuri iki Cyumweru, tariki 4 Ukuboza 2022, ubwo yaganirizaga ba rwiyemezamirimo b’urubyiruko bari mu mahugurwa muri IPRC Musanze, agamije kurwongerera ubumenyi n’ubushobozi ngo rurusheho kuba indashyikirwa mu byo rukora no guharanira iterambere ry’Abanyarwanda bose muri rusange.

Ubwo FPR Inkotanyi yatangizaga urugamba mu Ukwakira 1990, yahurije hamwe abasore n’inkumi b’impunzi z’Abanyarwanda bari baturutse mu bihugu bitandukanye, bafite n’imyitwarire itandukanye.

Gen Kabarebe yavuze ko hasabye ko habaho amabwiriza aganisha ku myitwarire imwe kugira ngo ubirenzeho abihanirwe kandi bikubahirizwa.

Ati “Ntabwo twazanye ikinyabupfura cyiza bitewe n’aho twari duturutse kandi ntabwo twashoboraga kurwana urugamba rukomeye gutyo, ruturusha imbaraga nta kinyabupfura. Hakoreshejewe uburyo butandukanye, hari ukwigisha ariko habaye n’imbaraga.”

Yavuze ko uretse ku rugamba, ikinyabupfura ari ingenzi ahantu hose no mu buzima busanzwe kugira ngo umuntu agere ku ntego ashaka.

Ati “Ikintu cyose kitarimo ikinyabupfura ntaho cyageza umuntu ku giti cye nta n’aho cyageza igihugu. Buriya ikinyabupfura kigaragara ku muntu ku giti cye, kiragenda kikagaragarira kuri sosiyete no ku gihugu, ukamenya ngo iki gihugu kimeze gutya. Ikinyabupfura gishobora kwigishwa abantu bakagitozwa cyangwa se bakagihatirwa.”

Kubera ko mu ntangiriro imyumvire y’ingabo za RPA itari imwe, byasabye ko hakoreshwa n’amategeko uyarenzeho agahanwa kugira atazasubira kandi bibere urugero abandi.

Gen Kabarebe yagize ati “Inkotanyi mu ishyamba zari zifite ubucamanza, abantu bagacirwa imanza, bagahanwa. Hari nk’abo nzi bafunzwe 1991 kugeza duhagarika Jenoside kandi aho twafungiraga nta nzu zari zihari, ni ukugufungira mu ndaki, mu mwobo. Hari nk’umuntu wavuye 1991 buri munsi uko twimutse ajya mu mwobo, twagera i Kabuga agasubira mu mwobo […] iyi myaka yose akajya mu mwobo kugeza mu 1994 aho iminyururu yabonekeye akajya mu munyururu nk’abandi.”

Yavuze ko bimwe mu byaziririzwaga muri RPA harimo guhohotera abaturage, kubiba amacakubiri, gukora ibitandukanye n’ibyo abandi biyemeje n’ibindi.

Ati “Ikinyabupfura kumvira amabwiriza, kumvikana n’abandi byabaye intwaro ikomeye.”

Gen Kabarebe yabwiye abo ba rwiyemezamirimo ko no mu rugamba bariho rw’iterambere, nibatagira ikinyabupfura ntacyo bashobora kugeraho.

Ati “Mwese mufite amahirwe angana yo kuzakora ibitangaza muri iki gihugu kuko igihugu kiguha amahirwe ariko ntabwo kigukorera, urikorera. Ikizakubuza rero ni izo ndangagaciro, nutazuzuza uzaba utakaye.”

“Mu myaka icumi […] muzasanga hari ababasize intambwe udashobora kumenya uko ingana. Hari uwo uzasanga ukayoberwa aho yakuye amafaranga, nta handi azaba yarayakuye atari mu byakunaniye. Yayakuye mu kinyabupfura cyakunaniye, yayakuye mu kwihangana kwakunaniye, yayakuye mu kugira ubutwari, mu guhitamo neza byakunaniye.”

Gen Kabarebe yasabye urubyiruko kugendera kuri izo ndangagaciro zaranze FPR Inkotanyi n’ingabo zayo ku rugamba, kugira ngo rubashe gutsinda ibibazo byugarije igihugu n’isi muri iki gihe.

Gen Kabarebe yabwiye urubyiruko ko ikinyabupfura iyo cyabuze, umuntu adashobora kugera ku ntego
Urubyiruko rwasabwe kugendera ku kinyabupfura nk'icyaranze Inkotanyi ku rugamba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .