00:00:00 IGIHE NETWORK KN KINYARWANDA EN ENGLISH FR FRANCAIS

Gaz yo mu Kiyaga cya Kivu ishobora gutangira gukoreshwa mu guteka mu 2023

Yanditswe na IGIHE
Kuya 28 July 2022 saa 10:25
Yasuwe :

Mu mpera za 2023 abaturarwanda bashobora gutangira gutekesha gaz yacukuwe mu Kivu, ni mu gihe hakomeje umushinga wo gutunganya gaz yo muri iki kiyaga ngo yifashishwe mu guteka, mu nganda no mu binyabiziga.

Mu ntangiriro za 2019, Guverinoma y’u Rwanda ihagarariwe n’Ikigo cy’Igihugu gishinzwe Mine, Peteroli na Gaz (RMB) n’Urwego rw’Igihugu rw’Iterambere (RDB), byasinyanye amasezerano na Gasmeth Energy Ltd, azafasha iki kigo gucukura no gutunganya Gaz méthane yo mu Kiyaga cya Kivu.

Ni umushinga wagombaga gutwara miliyoni 400 z’amadolari urimo kubaka uruganda rucukura gaz mu Kiyaga cya Kivu, aho Gasmeth Energy Ltd, izacukura ikanatandukanya Gaz Méthane ikayitwara mu rundi ruganda ruyitunganya nyuma ikajyanwa ku isoko ry’imbere mu gihugu n’iryo mu mahanga.

Africanews yasuye aho Ikigo Gasmeth Energy Ltd, irimo kubaka hafi y’Ikiyaga cya Kivu. Ni umushinga witezweho kugabanya igiciro cya gaz yo gutekesha cyazamutse, aho icupa ry’ibilo 12 ryaguraga 12.600 Frw, ubu rikaba rigeze kuri 18.500 Frw.

Umuyobozi ushinzwe Imyubakire muri Gasmeth Energy Ltd, Manzi Steven, yasobanuye ko hari ibyiciro bibiri byo kubaka. Aho gaz izajya icukurwa ni mu bilometero hagati ya 30-35 uvuye aharimo kubakwa.

Yagize ati “Nyuma yo gucukura gaz, hazajya habaho icyiciro cyo gusuzuma ko twageze kuri gaz y’umwimerere dukeneye. Gaz izajya itwarwa mu matiyo azanyura mu kiyaga hasi no hejuru.”

Uyu mushinga wakererejwe ahanini n’icyorezo cya Covid-19. Umuyobozi wa Gasmeth Energy Ltd, Stephen Tiernney, yavuze ko umushinga uhagaze neza kandi mu mezi 12 ari imbere uzaba watangiye gukora.

Ati “Twatangiye kubaka, amafaranga yo gukoresha arahari, umushinga ugomba gutangira kandi turashaka kubona ibintu bikoreka”.

Ikiyaga cya Kivu kizwi na bamwe mu bahanga mu bya siyansi nka kimwe mu biyaga byica byo muri Afurika, kubera ingano y’ibicu by’umwuka uremereye wa méthane cyohereza.

Byitezwe ko uyu mushinga wa Gasmeth Energy y’abacuruzi bo muri Amerika, Nigeria n’u Rwanda, ucukura iyi gaz ku ndiba y’iki kiyaga, hanyuma igashyirwa mu macupa ngo ikoreshwe nk’itanga ingufu.

Bivugwa kandi ko ibyo nabyo byahita bifasha mu gutuma umwuka urimo uburozi udasendera hejuru y’amazi y’iki Kiyaga cya Kivu.

Ikiyaga cya Kivu gifite amoko atatu ya gaz arimo Dioxide de Carbone, Methane na Sulfure d’Hydrogène. REG ivuga ko izo zose zishobora kugira ingaruka mbi mu gihe haba harekuwe nyinshi.

Inyigo iheruka yerekanye ko mu Kiyaga cya Kivu harimo kilometero kibe (km3) hagati ya 250 na 300 za Carbon (CO2) na Gaz Méthane igera kuri km3 hagati ya 55 na 60, kandi ngo bikomeza kwiyongera uko bwije n’uko bukeneye. Gaz Méthane irimo ngo ishobora gutanga umuriro ungana na MW 700 mu gihe cy’imyaka 55.

Gaz Methane yo mu Kiyaga cya Kivu ishobora kuba yatunganywa igatekeshwa mu 2023

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .