Gatsibo: Umurenge wa Gasange wagejejwemo umuriro bwa mbere, abaturage bahiga kuwubyaza umusaruro

Yanditswe na Hakizimana Jean Paul
Kuya 27 Ukwakira 2020 saa 07:58
Yasuwe :
0 0

Umurenge wa Gasange uherereye mu Karere ka Gatsibo wagejejwemo umuriro w’amashanyarazi bwa mbere mu mateka, abaturage bahiga kuwubyaza umusaruro mu myuga irimo gusudira, kogosha, ibyuma bisya n’ibindi.

Uyu muriro wageze muri uyu Murenge bwa mbere kuwa Gatandatu tariki 24 Ukwakira ari nabwo bwa mbere umuturage wa mbere yacanye umuriro w’amashanyarazi muri uyu Murenge.

Bagirishya Ignace utuye mu Kagari ka Kigabiro mu Mudugudu wa Maya yavuze ko guhabwa umuriro ari ikintu bategereje imyaka myinshi.

Yagize ati “ Njye nabyakiriye neza, ubu tugiye kujya twogosha, dusudire twiteze imbere ku buryo inaha hahinduka cyane, nkanjye ndabaza, twajyaga gusatuza imbaho za Kiramuruzi bikaduhenda cyane ariko ubu izo mashini natwe tuzazigura tujye tuzisaturira inaha birumvikana hari n’ibyo twagurishaga igiciro kizagabanuka kuko tutazongera kujya gusatuza imbaho ahandi.”

Bagirishya yakomeje avuga ko ku bijyanye n’imyigire y’abana ngo akenshi bakoreshaga udutoroshi baguriramo amabuye bigatuma batigira mu rugo neza ngo ariko ubu umuriro wabonetse bazajya biga bibongerere gutsinda mu ishuri.

Munyagisenyi Samuel ukora akazi ko kogosha we yagize ati “Twakoreshaga umuriro w’imirasire y’izuba, rimwe izuba rikabura ntidukore tugahomba kuko uba uzishyura inzu nyuma y’ukwezi, ubu rero twabonye umuriro w’amashanyarazi, urogoshera igihe ushakiye nta bwoba bw’uko imvura iri bugwe ngo umuriro ugende, ubu turanateganya kongeramo gusuka no kudefiriza ku buryo twagura ibyo dukora.”

Mukamurenzi Gaudence we yavuze ko hari igihe telefoni zashiragamo umuriro bikaba ngombwa ko imara iminsi itatu batarabona aho kuyishyiramo undi cyangwa ngo banahabona umuntu bakamuca 200 Frw cyangwa 300 Frw.

Rukundo Jean Claude usanzwe ateka amandazi, keke n’imigati we yavuze ko zimwe mu mashini akoresha afunyanga zamutwaraga mazutu y’arenga ibihumbi 100 Frw buri kwezi, ibi byiyongera ku kudakoresha amafuru ya kijyambere kubera kutagira umuriro.

Ati “ Ubu ayo mafuru ya kijyambere tugiye kuyagura, mu buryo bwo gufunyaga twakoreshaga mazutu ikaduhenda none tugiye kujya dukoresha umuriro mu rwego rwo kugabanya amafaranga byadutwaraga, imashini nshya turahita tuzigura abaturage tubahe imigati n’amandazi bimeze neza cyane.”

Umuyobozi w’ikigo Nderabuzima cya Gasange, Irambona Xavier, yavuze ko ubusanzwe bakoreshaga mazutu n’umuriro uturuka ku mirasire y’izuba ariko ngo n’ubundi byarangiraga ibikoresho byinshi batabikoresheje kubera umuriro muke.

Ati “Mu kwezi twishyuraga ibihumbi bigera ku 100 kuzamura kuri mazutu kugira ngo ducane kumanywa na nijoro ariko ukabona ko bitwara amafaranga atakagombye kandi ugasanga ntitwizeye uwo muriro, hari nubwo moteri yagiraga ikibazo twahamagara umutekenisiye akaduca amafaranga menshi kuyabona bikagorana, ariko ubu twabonye umuriro mwiza ugiye kudufasha.”

Yakomeje avuga ko hari ibikoresho byinshi batakoreshaga kubera umuriro muke kuri ubu bagiye gukoresha birimo Frigo zibika inkingo n’ibindi byinshi bigiye gutuma serivisi bahaga abaturage zigenda neza kurushaho.

Umunyamabanga Nshingwabikorwa w’Umurenge wa Gasange, Ndayisenga Jean Claude, we yavuze ko kutagira umuriro byatumaga hari serivisi nyinshi zitatangwaga neza ku muturage. Uyu muriro uje ari igisubizo yaba ku buyobozi, abaturage ndetse na ba rwiyemezamirimo, yavuze ko yaba ku Murenge ndetse no mu zindi nzego zikorera muri uyu Murenge hagiye kugaragara impinduka.

Ati “ Ugiye nko ku bikorwa bigendanye n’imirimo yo gusudira, ububaji bukoresha imashini zigezweho, inganda nto byose ntibyahabonekaga kubera ko twakoreshaga mazutu mu bikorwa bitandukanye ariko ubu bigiye kuhagaragara bidufashe mu iterambere, hari abagiye guhita bakora ubucuruzi bukeneye Frigo haze n’inganda nyinshi nk’izisya ibigori n’izindi.”

Gitifu yakomeje avuga ko umuriro w’amashanyarazi uzatuma hanahangwa imirimo mishya bitume abaturage babona akazi ashimira Perezida Kagame ku kuba imiyoborere myiza ye ariyo itumye muri uyu murenge hagezwa amashanyarazi.

Kuri ubu abaturage basaga ibihumbi 47 560 bangana na 42.7% nibo bagerwaho n’amashanyarazi mu Karere ka Gatsibo barimo 23,75 bagerwaho n’amashanyarazi na 18.32 bagerwaho n’amashanyarazi aturuka ku mirasire y’izuba.

Akanyamuneza ni kose kuri Bagirishya wahawe amashanyarazi yari amaze igihe kinini ategereje
Abakora umwuga wo kogosha bishimiye umuriro w'amashanyarazi bahawe bavuga ko bajyaga bagorwa no kogoshera ku muriro uturuka ku mirasire y'izuba
Rukundo usanzwe akora amandazi n'imigati, yavuze ko mu gufunyanga ifarini buri kwezi yakoreshaga mazutu yamuhagararaga ibihumbi 100 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .