Gatsibo: Plan International yatanze impamyabushobozi n’ibikoresho ku bana 250 inataha amashuri mashya

Yanditswe na Hakizimana Jean Paul
Kuya 16 Mutarama 2020 saa 04:30
Yasuwe :
0 0

Umuryango Plan International Rwanda, watanze impamyabushobozi ku rubyiruko 250 rurangije kwiga imyuga rwiganjemo abakobwa 100 batewe inda imburagihe, hanatahwa ku mugaragaro ibyumba by’amashuri birindwi n’amarerero abiri byose byubatswe ku bufatanye bw’uyu muryango n’Akarere ka Gatsibo.

Ibi byabaye ku wa Gatatu tariki ya 15 Mutarama 2020 mu muhango wabereye mu Murenge wa Kiziguro mu Karere ka Gatsibo.

Abana bahawe impamyabushobozi barimo 100 batewe inda imburagihe n’abandi 150 bari barataye ishuri kubera ibibazo birimo ubukene n’ibindi, bahawe impamyabushobozi ndetse n’ibikoresho bazifashisha bifite agaciro ka miliyoni 25 Frw.

Umuyobozi wa Porogaramu muri Plan International Rwanda, Jean Lambert Sebareze, yavuze ko mu nshingano uyu muryango ufite harimo kubungabunga uburenganzira bw’abana hibandwa ku bana b’abakobwa kugira ngo biyumvemo ubushobozi.

Yavuze ko gufasha abana b’abakobwa batwaye inda imburagihe bo mu Karere ka Gatsibo, byakozwe kugira ngo babagarurire icyizere na bo bumve ko hari icyo bashobora kwimarira.

Ati “Bizabafasha kubaho neza ndetse bitume banatanga ubutumwa ku bandi bakobwa ku buryo barushaho kwitwara neza.”

Avuga ko gahunda Plan ifite mu myaka itanu iri imbere ari ukugera ku bana b’abakobwa miliyoni ebyiri n’ibihumbi 200, abahungu miliyoni imwe ndetse no ku rubyiruko ibihumbi 400.

Ati “Ubu inzira irakomeje buri mwaka tuzajya dufasha abandi ari nako dukora ubukangurambaga”.

Umuyobozi w’Akarere ka Gatsibo, Richard Gasana, yashimiye Plan International ku nkunga ikomeye yateye aka karere irimo ibyumba birindwi by’ishuri n’ibikoresho byose, amarerero abiri ndetse no gufasha abana benshi bo muri aka karere.

Yasabye abana bahawe imyampabushobozi n’ibikoresho bizabafasha mu kwinjira ku isoko ry’umurimo kubyaza umusaruro ibikoresho bahawe, bakirinda uwakongera kubashuka ku buryo bakongera bagatwara inda imburagihe.

Ati “Abana b’abakobwa muri hano ndagira ngo mbisabire ubufatanye mu kurwanya inda ziterwa abangavu imburagihe, nimumenye kuvuga oya ku muntu uwo ariwe wese watuma ubuzima wari urimo busubira inyuma, ugakurikiza uwo mwana imburagihe. Nubona hari ubishaka akanashyiramo imbaraga uzavuze induru tugutabare.”

Yabasabye gukoresha neza ibikoresho bahawe bakiteza imbere kandi bagateza imbere imiryango yabo n’abana babyaye.

Umutoni Yvonne utuye mu Murenge wa Kiziguro mu Kagari k’Agakomeye, yabwiye IGIHE ko yatewe inda ageze mu mwaka wa gatatu w’amashuri yisumbuye, nyuma ngo yabayeho nabi cyane kuko uwamuteye inda yahise amwihakana ariko kubw’amahirwe aza gufashwa na Plan Interantional Rwanda.

Ati “Ubu nsoje kwiga kudoda ngiye gukora nshake amafaranga njye mbona ayo kwishyurira umwana ishuri, niteze imbere ku buryo abo twiganye batazansiga cyane.”

Umugwaneza Lea wavuze mu izina rya bagenzi be yashimiye leta ku kuba idatererana abana baterwa inda nyamara hari ababyeyi bamwe na bamwe babatererana cyane.

Ati “Ubu twasubijwe agaciro nyuma yo kunyura muri byinshi bibi birimo amazina atandukanye batwitaga bavuga ko turi indaya, ibirara n’andi menshi, ariko ubu Plan yadusubije mu mashuri twiga imyuga ubu turi mu cyerekezo cyo kwiteza imbere kandi tuzabigeraho.”

Yagiriye inama abakiri bato ku kuba bakwirinda ibiyobyabwenge ngo kuko akenshi ariyo ntandaro ya byose, abasaba kwiga bashyizeho umwete bakirinda n’abahungu babashora mu ngeso mbi.

Ibikorwa byose byakozwe byamuritswe na Plan International Rwanda, yabitanzeho miliyoni 150 FRW zirimo 72 zatanzwe ku banyeshuri bize imyuga itandukanye irimo ubudozi, guteka, gukora imisatsi, ubukanishi ndetse no gusudira.

Ibikoresho byatanzwe ku banyeshuri bose bifite agaciro ka miliyoni 25 Frw andi akaba yarakoreshejwe hubakwa amashuri arindwi n’ibikoresho byayo ndetse n’amarerero abiri arimo n’ibikoresho byayo.

Ibikoresho byahawe abanyeshuri bose uko ari 250 bifite agaciro ka miliyoni 25 z'amafaranga y'u Rwanda
Abize imyuga bose uko ari 250 bahawe ibikoresho by'imyuga bizatuma biteza imbere
Hanatashywe amarerero abiri azafasha ababyeyi kwegerezwa amashuri y'abana babo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .