00:00:00 IGIHE NETWORK KN KINYARWANDA EN ENGLISH FR FRANCAIS

Gatsibo: Minisitiri Nsabimana yatuwe ikibazo cy’amashanyarazi aturuka ku mirasire ahenze cyane

Yanditswe na Hakizimana Jean Paul
Kuya 9 Ukuboza 2022 saa 12:51
Yasuwe :

Abaturage bo mu Karere ka Gatsibo basabye Leta kubafasha mu gukemura ikibazo cy’amashanyarazi aturuka ku mirasire y’izuba bakoresha ariko ngo ahenze cyane ugereranyije n’asanzwe, aho unite imwe bayigura 675 Frw.

Ibi babigarutseho kuri uyu wa Kane tariki ya 9 Ukuboza ubwo Minisitiri w’Ibikorwaremezo, Dr Nsabimana Erneste, n’Umunyamabanga wa Leta muri Minisiteri y’Ubutabera, Amb Solina Nyirahabimana n’abandi bayobozi b’ibigo bitandukanye batangiraga uruzinduko rw’iminsi ibiri mu Karere ka Gatsibo.

Ni uruzinduko rwibanze ku kureba ibikorwaremezo birimo imihanda, ibiraro, ibikorwa bijyanye n’amazi ndetse n’amashanyarazi biri gukorwa muri aka karere n’ahagikenewe ubuvugizi.

Kimwe mu bikorwa basuye ni umushinga wa ARC Power utanga amashanyarazi aturuka ku mirasire y’izuba mu Murenge wa Gitoki, aho bafite imirasire 120 zitanga Kilowatt 47 ku munsi zigatanga amashanyarazi ku baturage 550. Unite imwe aba baturage bayigura 675 Frw iyi ikaba ari imbogamizi yagaragajwe n’abaturage.

Mukeshimana Claudine utuye mu Mudugudu wa Kigabiro mu Kagari ka Cyabusheshe yavuze ko bishimira kuba barahawe umuriro ngo kuko wabaruhuye kuba mu kizima ndetse unatuma abana babo bigira ku matara.

Ati “ Ariko rwose ikibazo cyawo urahenze, 1000 Frw hari abagicanira icyumweru, hari abagicanira iminsi itanu gusa nkanjye mu kwezi nkoresha hagati ya 4000 Frw na 5000 Frw. Ubufasha nasaba Leta ni uko yadushyiriramo nkunganire kuko twe biraduhenda cyane rwose.”

Nyirandikuryaho Grace utuye mu Mudugudu wa Cyoto mu Kagari ka Cyabusheshe mu Murenge wa Gitoki yavuze ko umuriro bahawe ufite amatara atatu ngo icyo bawunenga ni ukubahenda gusa.

Yagize ati “ Uyu muriro ufite ingufu nke, nta kintu wakoreraho wenda wagize nk’ubushobozi ugashaka kugura moteri isya ntibyakunda. Ikindi kuwugura urahenze cyane kuko 1000 Frw ntabwo kigucanira icyumweru kandi ubushobozi bwacu buracyari buke.”

Ntirandekura Pacifique we yasabye ko uyu muriro wakongererwa ubushobozi kugira ngo n’abifuza kugura ibyuma bisya, abifuza gushinga utubari dukoresha Frigo n’ibindi byuma bisaba umuriro mwinshi babe babizana ngo kuko kuri ubu bikigoranye kubicokemkaho.

Umukozi wa ARC Power, Pamella Bigirimana, ari nayo yatanze uyu muriro ukomoka ku mirasire y’izuba, yavuze ko umuriro baha abaturage ufite imbaraga zo kuba wakoresha ibyuma bisya, bagasudira ndetse bakanakora ibindi bikorwa bitandukanye ahubwo ngo abaturage ntibarabona ubushobozi bwo kubigura.

Yakomeje agira ati “ Ibyo abaturage bavuga ko ibiciro byacu biri hejuru baragereranya umuriro wacu n’uwa REG, usanzwe haba hariho nkunganire ya Leta kugira ngo abaturage bose babashe kubona umuriro, kuri twebwe rero umuturage yiyishyurira 100% ariko ubu twasinyanye amasezerano na REG aho tuzajya dutanga umuriro ku giciro gisanzwe.”

Minisitiri w’ibikorwaremezo, Dr Erneste Nsabimana, yijeje abaturage ko bagiye gukorana n’izindi nzego barebe uko iki giciro giteye kibe cyamanurwa gishyirwe aho umuturage ashobora kudahendwa.

Ati “ Mwumvise ko nubwo abaturage bavuga ko igiciro kiri hejuru gato ariko biraruta gusubira ku gukoresha bougie n’udutadoba cyangwa se kutagira umuriro, tugiye gufatanya n’izindi nzego zibishinzwe yaba REG n’izindi nzego kugira ngo turebere hamwe iki giciro bari kuvuga ko kiri hejuru turebe uko giteye.”

Kuri ubu mu gihugu hose ARC Power imaze gucanira abaturage 1600 bo mu turere twa Bugesera na Gatsibo, Akarere ka Gatsibo kageze kuri 67,4% mu kugira abaturage bafite umuriro w’amashanyarazi. Abafatiye ku muyoboro mugari wa REG ni 27,9% mu gihe abakoresha ukomoka ku mirasire y’izuba ni 39,5%.

Aba bayobozi babanje gusura ahakusanyirizwa umuriro mbere wo kugezwa mu baturage
ARC Power ifite imirasire itanga umuriro ku baturage bo mu Murenge wa Gitoki
Pamella Bigirimana wo muri ARC Power yavuze ko bumvikanye na REG ko umwaka utaha abaturage bazajya bishyura hakurikijwe igiciro gisanzwe
Abaturage bavuze ko umuriro ukomoka ku mirasire ugihenze cyane basaba ko bagabanyirizwa
Nyirandikuryaho Grace yasabye Leta kubafasha amashanyarazi aturuka ku zuba akagurishwa ku giciro gisanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .