00:00:00 IGIHE NETWORK KN KINYARWANDA EN ENGLISH FR FRANCAIS

Gatsibo: Hari kubakwa inzu 14 zigenewe abatishoboye

Yanditswe na IGIHE
Kuya 29 May 2022 saa 08:56
Yasuwe :

Abagize inama njyanama y’akarere ka Gatsibo batangiye kubakira abatishoboye 14, inzu zifite agaciro ka miliyoni zisaga 37 Frw.

Kuri Gatandatu hatashywe inzu umujyanama uhagarariye umurenge wa Murambi mu nama njyanama y’akarere, yubakiye umuturage utishoboye afatanyije n’inshuti ze.

Nzabonimana Jean ari mu kigero cy’imyaka 70 wubakiwe inzu, yari amaze igihe kirekire acumbitse mu gikoni cy’umuhungu we muto.

Iribagiza Lydia, umujyanama mu nama njyanama y’akarere ka Gatsibo yavuze ko igitekerezo cyo kubakira utishoboye cyaje nyuma yo kumva ko mu karere hari abantu badafite amazu yo kubamo.

Iribagiza Lydia yagize ati “Nkimara kumenya uko ikibazo cy’abadafite amazu giteye, negereye inshuti zanjye nkora ubuvugizi duterateranya amafaranga, tuza kuzuza avamo inzu ariyo dushyikirije uyu musaza uyu munsi.”

Iki gitekerezo cyashimwe n’abandi bajyanama, bose biyemeza kubakira abatishoboye mu bice bitandukanye bigize akarere ka Gatsibo.

Inzu abajyanama mu nama njyanama y’akarere ka Gatsibo barimo kubakira abatishoboye ni 14 , imwe ikaba ifite agaciro ka miliyoni 2.7 Frw

Nzabonimana washyikirijwe inzu ,amatungo magufi n’ibikoresho byo mu nzu, yashimiye abamwubakiye iyi nzu bakanamuha amatungo maze nawe abasezeranya ko azayifata neza.

Yagize ati “Ubu sinzongera kubura iwanjye, mfite abana bane bose barashatse nabaga mu gikoni cy’umwe aho yari yarancumbikiye kuko na we nta bushobozi yari afite bwo kunyubakira.”

Umuyobozi w’Akarere ka Gatsibo Gasana Richard, yavuze ko ibi abajyanama babikora mu rwego rwo gutanga umusanzu wabo hagamijwe kurangiza ibibazo bibangamiye abaturage bahagarariye.

Biteganyijwe ko inzu zindi ziri kubakwa zizaba zuzuye mu mpera za Kamena uyu mwaka.

Abaturage bafite ubushobozi nabo basabwe kwifatanya bakajya bishakamo ibisubizo
Inzu yatanzwe ifite agaciro k'asaga miliyoni ebyiri
Uyu muturage yashyikirijwe n'ihene yo korora kugira ngo yiteze imbere
Nzabinomana ubwo yinjiraga mu nzu yagenewe nyuma y'igihe acumbitse ku muhungu we
Uwahawe inzu yasabwe kuyifata neza no kuyishingiraho yiteze imbere
Abajyanama b'akarere ka Gatsibo biyemeje kubaka inzu 17 zose zigenewe abatishoboye badafite aho baba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .