00:00:00 IGIHE NETWORK KN KINYARWANDA EN ENGLISH FR FRANCAIS

Gatsibo: Abaturage barenga 300 bahawe imbabura zirondereza ibicanwa, abandi bagenerwa ibigega by’amazi

Yanditswe na Hakizimana Jean Paul
Kuya 3 June 2022 saa 09:22
Yasuwe :

Abaturage 320 babarizwa mu cyiciro cya mbere n’icya kabiri cy’ubudehe bo mu Murenge wa Kabarore mu Karere ka Gatsibo, bahawe imbabura zizwiho kurondereza inkwi, abandi bagenerwa ibigega by’amazi mu rwego rwo kubafasha guhangana n’ikibazo cy’inkwi n’icy’amazi.

Izi mbabura n’ibigega babihawe ku wa Gatanu, tariki ya 3 Kamena 2022, babihabwa na Banki ya Kigali ifatanyije na Green Solution and Supply Ltd.

Imbabura buri muturage yahawe ifite agaciro k’ibihumbi 40 Frw ikaba irondereza inkwi ku kigero cya 60%, ikigega buri muturage yahawe kimwe cyakira litiro 1500 z’amazi.

Nyuma yo guhabwa izi mbabura n’ibigega by’amazi abaturage bashimiye abafatanyabikorwa babibazaniye bavuga ko bizabafasha cyane.

Hafashimana Antoine utuye mu Mudugudu wa Mutarama mu Kagari ka Karenge uri mu baturage 20 bahawe ibigega by’amazi, yavuze ko ubusanzwe abana babo bakoraga ibilometero bisaga birindwi bajya kuvoma amazi ariko ngo kuri ubu bimaze kubaruhura.

Ati “Agasozi dutuyeho ni karekare, umwana nibura aba agomba gukora ibilometero bitari munsi ya birindwi n’umunani ku munsi ajya kuvoma, bitewe n’uko umusozi wacu ari muremure cyane. Iminsi mike rero tumaranye ibi bigega haguye imvura bishyiramo amazi bituma abana bacu baruhuka kujya kuvoma buri gitondo mbere yo kujya kwiga.”

Kantengwa Sarah uri mu baturage 300 bahawe imbabura we yashimiye Leta ngo kuko ari yo ituma babona abafatanyabikorwa beza babagezaho ibikorwa byiza.

Ati “Abana banjye bajyaga kwanduranya ngo babone inkwi arinjye ubatumye, none ubu nabonye imbabura nziza. Nahoze mbara umubare w’inkwi ncana mu cyumweru nsanga ncana ibilo 30 by’inkwi none iyi mbabura nzajya ncanamo urukwi rumwe gusa.”

Kantengwa yavuze ko yaguraga inkwi 1000 Frw akazicana umunsi umwe none ubu ngo azajya azimarana iminsi myinshi. Yavuze ko n’abana babo batazongera kwanduranya bajya gutashya ahatemewe.

Umukozi wa Green solution and supply Ltd, Bizimana Modeste, yavuze ko nk’uko bashinze kurengera ibidukikije, batekereje ku kuntu bafasha abaturage ba Kabarore kurengera ibidukikije ngo kuko babonaga bakenera gukoresha inkwi nyinshi kandi nta ziri hafi yabo.

Yavuze ko batekereje kubaha imbabura zirondereza inkwi ku kigero cya 60% zikaba zishobora kumara imyaka itatu zikora neza kandi ngo buri wese akaba yayitwara aho ashaka.

Yasobanuye ko bitabaje Banki ya Kigali nk’umwe mu bafatanyabikorwa kugira ngo igikorwa kirusheho kugenda neza.

Umuyobozi wa Banki ya Kigali, Ishami rya Kabarore, Girimana Patrick, yavuze ko iyi banki ari umufatanyabikorwa w’abaturage muri buri gace kose ikoreramo.

Yagaragaje ko kuba abaturage bahawe ibigega n’imbabura zirondereza ibicanwa hagamijwe gusigasira ibidukikije.

Ati “Banki ya Kigali rero mu gace iherereyemo igamije gufasha abaturage kuva mu cyiciro kimwe bajya mu kindi ari nabyo twakoze hano kugira ngo tubashe gusigasira amashyamba n’ubuzima bw’abaturage aho abana babo bakererwaga ishuri bagiye kuvoma.”

Ubuyobozi bw’Akarere ka Gatsibo bwasabye abaturage gukoresha neza imbabura bahawe kandi ngo bagatandukana no kuvogera Ikigo cya Gisirikare cya Gabiro aho bajyaga gushaka inkwi.

Abahawe imbabura basabwe kutongera kujya gusenya mu ishyamba ribamo ikigo cya gisirikare cya Gabiro
Girimana Patrick uyobora Banki ya Kigali ishami rya Kabarore, ashyikiriza imbabura umwe mu bagenerwabikorwa
Imbabura bahawe buri imwe ifite agaciro k'ibihumbi 40 Frw
Ibigega bahawe buri kimwe gifite ubushobozi bwo kubika litiro 1500 z'amazi
Umuyobozi wa Banki ya Kigali ishami rya Kabarore, Girimana Patrick yavuze ko iyi banki yiyemeje gufasha abaturage baho ikorera hose
Kantengwa yavuze ko byamutwaraga amafaranga menshi agura inkwi zo gucana akaba yishimiye imbabura nziza yahawe
Akanyamuneza kari kose ku bahawe ibigega by'amazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .