Gatsibo: Abaturage baheze mu gihirahiro nyuma y’ifungwa rya rwiyemezamirimo wabambuye miliyoni 154 Frw

Yanditswe na Hakizimana Jean Paul
Kuya 10 Ugushyingo 2019 saa 06:15
Yasuwe :
0 0

Abaturage bo mu Murenge wa Ngarama mu Karere ka Gatsibo bamaze imyaka ine mu gihirahiro, bishyuza Akarere na rwiyemezamirimo miliyoni 154Fw bakoreye ubwo bubaka Ikigo Nderabuzima cya Ngarama.

Ni ibibazo byatangiye ubwo rwiyemezamirimo yafungwaga azira gukoresha impapuro mpimbano ubwo yasabaga iryo isoko, bikarangira abaturage yakoresheje n’abamugemuriraga ibikoresho batishyuwe.

Mu 2014 nibwo Niyigena Eraste yasinyanye amasezerano n’Akarere ka Gatsibo yo kubaka Ikigo Nderabuzima cya Ngarama. Yahise atanga akazi ku bafundi, abayede na ba rwiyemezamirimo bato ko kujya bamugemurira ibikoresho harimo nk’uwatangaga imicanga n’amabuye, sima, uwacumbikiraga abakozi akanabatekera n’abandi.

Mu mezi ya mbere ngo yarabishyuraga ariko aza gufungishwa n’Akarere kavuga ko yatanze ibyangombwa by’ibihimbano ubwo yasabaga isoko ryo kubaka Ikigo Nderabuzima cya Ngarama n’Agakiriro ka Kabarore.

Kuva icyo gihe abari abafundi n’abayedi bagera kuri 63 yabagiyemo umwenda ungana na miliyoni umunani zirengaho gato, naho abamugemuriraga ibikoresho abajyamo umwenda wa miliyoni zikabakaba 148Frw nk’uko babivuga.

Ngo bahise begera ubuyobozi bw’Akarere, bubabwira ko ahubwo yari yarahawe amafaranga menshi atanahwanye n’aho yari agejeje imirimo. Akarere kababwiye ko bakurikirana uwabahaye akazi, kuko ko nta masezerano kagiranye nabo.

Murorunkwere Zabibu, ni umugore uri mu kigero cy’imyaka 50 wakoraga akazi k’ubuyede. Avuga ko bagitangira gukora amezi ya mbere bahembwe, ariko nyuma ntacyo bahawe.

Ati “Kuva rwiyemezamirimo yafungwa twakomeje gukora tuziko Akarere kazaduhemba kuko ni nako kazanye uwo rwiyemezamirimo inaha, ariko byageze aho batubwira ko tuzamutegereza akatwishyura. Kubera igicuku twatahaga umugabo wanjye yabonye ntazanye amafaranga aranta, ngo nshobora kuba naramubeshyaga ko nagiye mu kazi nkigira mu bindi kubera ko nta mafaranga nacyuye.”

Kanyamihigo Fidele watangaga sima, ferabeto (fer à béton), amabati n’ibindi, avuga ko yambuwe miliyoni 23 Frw.

Ati “Nyuma nagiye mu nkiko ndega wa rwiyemezamirimo, ndaburana ndamutsinda, ariko tugiye kureba dusanga nta mutungo n’umwe umubaruyeho noneho nkibaza nti ni gute Akarere gaha isoko rwiyemezamirimo atatanze nk’ingwate yakurwamo ibyo kwishyura abantu mu gihe yahemutse?”

Ndayambaje Adolive wacumbikiraga abakozi bose bubakaga kuri iyo nzu, akababikira ibikoresho akanabagaburira, we avuga ko yishyuza ibihumbi 850 Frw.

Ati “Nari nafashe inguzanyo muri banki mvugurura inzu zanjye babagamo, ariko byarangiye banki iyiteje cyamunara kuko nabuze ubwishyu. Rwiyemezamirimo agifungurwa yatubwiye ko hari amafaranga Akarere katamwishyuye none turifuza ko bayakoramo bakatwishyura.”

Uwiringiyimana Samuel wagemuraga amabuye n’imicanga we avuga ko yishyuza miliyoni umunani. Ngo kutamwishyura byamugizeho ingaruka zirimo guterezwa cyamunara inzu yari afite, ubu asigaye ari umushoferi nyamara yari atunze imodoka ari na rwiyemezamirimo uciriritse.

Umunyamabanga Nshingwabikorwa w’Akarere ka Gatsibo Nankunda Jolly yabwiye IGIHE ko iki kibazo bakizi kandi ko banagiriye inama abaturage yo kwishyira hamwe bakarega uwo rwiyemezamirimo wabahaye akazi.

Ati “Icyo kibazo turakizi ariko abo baturage bakoreraga rwiyemezamirimo, abambuye barahindukira bishyuza Akarere. Urumva barishyuza utari we nubwo Akarere kabafite mu nshingano nanone, twabasabye kwishyira hamwe nk’abantu bakoreye umukoresha runaka barangiza bakarega, akaryozwa ibyo bazamutsindira.”

Yakomeje avuga ko n’Akarere kagikurikirana uwo rwiyemezamirimo ngo kuko yahawe amafaranga menshi atajyanye n’ibikorwa yakoze.

Mu minsi ishize Akarere katsinzwe urubanza kaburanagamo n’Ikigo cy’Ubwishingizi cya Radiant kuko aricyo cyatanze ubwishingizi ku masezerano kari kasinyanye na rwiyemezamirimo.

Twagerageje kuvugisha rwiyemezamirimo Niyigena Eraste kuri telefoni ariko ntiyitaba, n’ubutumwa bugufi yohererejwe ntiyabusubiza.

Ikigo Nderabuzima cya Ngarama cyujujwe n'undi rwiyemezamirimo, uwa mbere afunzwe
Urubuga rw'Umurimo n'Ubuvandimwe bw'abakozi, COTRAF, rwakomeje kwishyuriza aba bubatsi biba iby'ubusa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza