Gatsibo: Abagabo 160 bamaze gutabwa muri yombi bazira gutera inda abangavu

Yanditswe na Hakizimana Jean Paul
Kuya 16 Mutarama 2020 saa 12:40
Yasuwe :
0 0

Ubuyobozi bw’Akarere ka Gatsibo butangaza ko kuva umwaka ushize kugera mu cyumweru gishize, kubera abangavu 648 batewe inda, hamaze gutabwa muri yombi abagabo 160 barimo 101 bashyikirijwe urukiko bagakatirwa n’abandi bakiburana.

Byatangajwe n’Umuyobozi w’Akarere ka Gatsibo nyuma y’aho umuryango Plan International Rwanda ufashije abana 250 kwiga imyuga bakanahabwa ibikoresho. Muri abo bana abagera ku 100 batewe inda imburagihe bakaba barigishijwe imyuga itandukanye ituma biteza imbere.

Umuyobozi w’Akarere ka Gatsibo Gasana Richard, yabwiye itangazamakuru ko kuva aho Isange One Stop Center ibahereye imibare y’abana barenga 1200 batewe inda ngo baramanutse bajya mu mirenge n’Utugari bikorera ibarura.

Iryo barura ngo ryagaragaje abana 648 b’abangavu batwitiye iwabo bakanabyara mu Karere kose.

Ati “Ubu icya mbere twahise dukora ni ukubegeranya, kubaha icyizere cy’uko bazasubira mu ishuri bagakomeza kwiga kandi bakanagirira igihugu akamaro, ikindi ni ugukurikirana abagabo babateye inda, ubu mu mibare mfite y’icyumweru gishize ni uko hamaze gufatwa abagabo 160 bashyikirijwe ubutabera.”

Yongeyeho ati “Muri bo 101 barakatiwe ubu bari gukora ibihano byabo, hari abagizwe abere kubera impamvu zitandukanye, ariko nanone haracyarimo ibanga rikomeye ryo kubamenya, kugira ngo umwana yature akubwire uwamuteye inda ntabwo byoroshye.”

Gasana yakomeje avuga ko ubwumvikane hagati y’ababyeyi bukibangamiye ifatwa ry’aba bagabo baba bateye inda aba bangavu.

Ati “ Ababyeyi baracyabyihishe inyuma, ugasanga ababyeyi b’umuhungu n’ababyeyi b’umukobwa bahuriye ku bugambanyi bwo kutagaragaza umuhungu wamuteye inda, rimwe na rimwe ugasanga banabishyigikiye nubwo aho bigaragaye tubafata nk’abafatanyacyaha ariko biracyahari, ni nayo mpamvu tugifite imibare mike y’abagabo twafashe.”

Yanavuze ko hari n’abagabo bamenya ko icyaha bakoze gikomeye ndetse bazanahabwa ibihano bikomeye bagahita batoroka bakajya hanze y’igihugu, ariko ngo bari gukorana na Polisi kugira ngo bakurikiranwe.

Intara y’Iburasirazuba iza ku mwanya wa mbere mu kugira umubare munini w’abangavu batewe inda. Mu turere dutanu tuza ku isonga tune ni utwo muri iyi ntara aritwo Nyagatare, Gatsibo, Kirehe na Bugesera hakiyongeraho Gasabo.

Kuri ubu harateganywa gusinyisha abayobozi b’imidugudu, ab’utugari, abayobozi b’ibigo by’amashuri n’abandi bafite aho bahuriye n’urubyiruko imihigo igamije kurwanya inda ziterwa abangavu muri iyi ntara.

Umuyobozi w'Akarere ka Gatsibo, Richard Gasana avuga ko abateye inda abana bakomeje gukurikiranwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .