Gasabo: Umugabo yatawe muri yombi akekwaho kugira umugore umwangavu w’imyaka 17

Yanditswe na Twarabanye Venuste
Kuya 8 Ukuboza 2019 saa 04:18
Yasuwe :
0 0

Umugabo wo mu Karere ka Gasabo ufite imyaka 41 yatawe muri yombi akekwaho kugira umugore umwana w’imyaka 17 akamutera inda, amakuru ataremezwa na muganga akaba avuga ko yaba yaranamwanduje Virusi itera SIDA.

Uwo mugabo wari umaranye n’uwo mukobwa amezi atanu, yatandukanye n’undi mugore. Yatawe muri yombi ku wa 06 Ukuboza 2019.

Umuyobozi Nshingwabikorwa w’Akarere ka Gasabo, Rwamurangwa Steven yabwiye IGIHE ko ari igikorwa cyakozwe ku bufatanye bw’inzego z’umutekano n’abaturage, kuko ngo ukekwaho icyaha yari yanze gufungura bikaba ngombwa ko bica urugi.

Bivugwa ko uwo mukobwa afite inda y’amezi atanu, ari nayo yatumye babana. Uwo mugabo ngo yemera ko ari we wateye uwo mukobwa inda ariyo mpamvu yahisemo kumugira umugore.

Uwo mugabo yemera ko ari we wateye inda uwo mukobwa ari nayo mpamvu ngo yahisemo kumugira umugore.

Amakuru bitegerejwe ko yemezwa na Muganga ni ay’uko ngo uwo mugabo yaba yaranduje uwo mukobwa Virusi Itera Sida.

Uwo mugabo yashyikirijwe urwego rw’ubugenzacyaha (RIB) sitasiyo ya Gatsata kugira ngo akorerwe idosiye.

Ingingo ya 133 yo mu gitabo cy’amategeko ahana ibyaha mu Rwanda, yateganyaga ko iyo gusambanya umwana byakurikiwe no kubana nk’umugabo n’umugore, igihano kiba igifungo cya burundu kidashobora kugabanywa kubera impamvu nyoroshyacyaha.

Icyakora urukiko rw’ikirange ruherutse gutesha agaciro iyo ngingo ruvuga ko inyuranyije n’Itekeo Nshinga rya Repubulika y’u Rwanda.

Umunyamategeko Mugabonabandi Jean Maurice aherutse kubwira IGIHE ko mu gihe ingingo nk’iyi iteshejwe agaciro, nta muntu wakurikiranwaho gusambanya umwana byakurikiwe no kubana nk’umugabo n’umugore. Yahanishwa itegeko rihana gusambanya umwana n’izindi ngingo bijyana ndetse haboneka impamvu nyoroshyacyaha umucamanza akaziha agaciro.

Icyaha cyo gusambanya umwana gihanishwa igifungo kitari munsi y’imyaka 20 ariko kitarenze imyaka 25.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza