00:00:00 IGIHE NETWORK KN KINYARWANDA EN ENGLISH FR FRANCAIS

Gasabo: Polisi yafashe abakekwaho gukwirakwiza urumogi mu baturage

Yanditswe na IGIHE
Kuya 19 January 2022 saa 07:16
Yasuwe :

Polisi ikorera mu Karere ka Gasabo ku bufatanye n’Ishami rya Polisi rishinzwe kurwanya Ibiyobyabwenge (ANU) n’abaturage bafashe abantu babiri barimo n’umugore bakurikiranyweho gukwirakwiza urumogi.

Uyu mugore w’imyaka 40 n’umugabo wa 34 bafashwe ku wa Mbere, tariki ya 17 Mutarama 2022. Bafatanywe udupfunyika tw’urumogi 1664, bafatiwe mu Murenge wa Gisozi, Akagari ka Ruhango, Umudugudu wa Ntora.

Umuyobozi wa Polisi mu Karere ka Gasabo, SP Octave Mutembe, yavuze ko abatawe muri yombi bafashwe biturutse ku makuru yatanzwe na bamwe mu bantu bajyaga kugura urumogi kuri bariya bantu. Bamaze gutanga amakuru Polisi ijyayo isanga koko bafite urumogi mu ngo zabo.

Yagize ati “Bamwe mu baguraga urumogi kuri bariya bantu bamaze gutanga amakuru Polisi ijya mu ngo zabo. [Kuri wa mugore] hafatiwe udupfunyika tw’urumogi 1650 naho mu [rundi] rugo hafatiwe udupfunyika 14, bose bariyemerera ko barucuruzaga.”

SP Mutembe yavuze ko bariya bantu banze kuvuga aho bakura urumogi n’uko rubageraho.

Inshuro nyinshi mu Karere ka Rubavu hakunze gufatirwa abantu bafite urumogi baruzanye mu Mujyi wa Kigali bavuga ko barukura muri Repubulika Iharanira Demokarasi ya Congo.

Umuyobozi wa Polisi mu Karere ka Gasabo, SP Octave Mutembe, yaboneyeho gushimira abaturage batanze amakuru.

Yakanguriye abantu kureka ibiyobyabwenge ahubwo bakajya mu bikorwa byemewe n’amategeko.

Yagize ati “Ntabwo Polisi y’u Rwanda izarambirwa kurwanya abakwirakwiza ibiyobyabwenge cyangwa abakora ibyaha. Turakangurira abaturage gukomeza ubufatanye mu kurwanya ibyaha kandi turanashimira abarimo kuduha amakuru umunsi ku wundi.”

Abafashwe bahise bashyikirizwa Urwego rushinzwe Ubugenzacyaha (RIB) rukorera muri Sitasiyo ya Polisi ya Gisozi kugira ngo hakorwe iperereza.

Iteka rya Minisitiri nº 001/moh/2019 ryo ku wa 04/03/2019 rigena urutonde rw’ibiyobyabwenge n’ibyiciro byabyo rishyira ikiyobyabwenge cy’urumogi mu biyobyabwenge bihambaye.

Itegeko nº68/2018 ryo ku wa 30/08/2018 riteganya ibyaha n’ibihano muri rusange, ingingo ya 263 ivuga ko umuntu wese ukora, uhinga, uhindura, utunda, ubika, uha undi, ugurisha mu gihugu ibiyobyabwenge cyangwa urusobe rw’imiti ikoreshwa nka byo mu buryo bunyuranije n’amategeko, aba akoze icyaha. Iyo abihamijwe n’urukiko ahanishwa igifungo cya burundu n’ihazabu y’amafaranga y’u Rwanda arenze miliyoni 20 Frw ariko atarenze miliyoni 30 Frw ku byerekeye ibiyobyabwenge bihambaye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .