00:00:00 IGIHE NETWORK KN KINYARWANDA EN ENGLISH FR FRANCAIS

Gasabo: Ibitaro bya Caraes Ndera bihangayikishijwe n’ubwiyongere bw’abarwayi babigana

Yanditswe na Thamimu Hakizimana
Kuya 26 Ukwakira 2021 saa 05:48
Yasuwe :
0 0

Ubuyobozi bw’Ibitaro by’abarwayi bo mu mutwe bizwi nka ‘Caraes Ndera Neuropsychiatric Hospital’ biherereye mu Murenge wa Ndera buhangayikishijwe n’ubwiyongere bw’abarwayi babugana umunsi ku wundi.

Ubuyobozi bwa Caraes, bwemeza ko ku munsi hari ubwo bwakira abarwayi bo mu mutwe bagera ku 100 barembye ndetse ko bukunze guhura n’imbogamizi z’uko hari ababazana kubavuza bakahabasiga ntibazongere kugaruka kubatwara.

Aba bayobozi bavuze ko ibi biteza igihombo ibitaro, cyane ko usanga biba birimo abarwayi benshi kandi harimo n’aborohewe bagakwiye gukurikiranwa bari hanze.

Ikindi gikunze kugorana ngo ni ukubona abishyurira aba barwayi amafaranga y’ibitaro.

Ushinzwe serivisi zijyanye n’imibereho myiza mu Bitaro bya Caraes, Nyirabakungu Pacifique, yabwiye IGIHE ko bifuza ko hashyirwaho ikigo cyunganira ababyeyi badafite ubushobozi bwo kwita ku bafite uburwayi bwo mu mutwe n’ibi bitaro kugira ngo umubare w’abarwayi babigana bakabitindamo ugabanuke.

Ati "Abarwayi baraza ibitaro bikabaha ubufasha bw’ibanze ku buryo bakomeza gukurikuranwa bari hanze ariko imbogamizi noneho nyinshi ziri ku bazanwa n’abatari abo mu miryango yabo kuko hari abamara koroherwa twabahamagara ngo babatware babiteho bari hanze bakabyanga bikaba ikibazo."

Yongeyeho ko ibi bitera igihombo ibitaro kubera ubwinshi bw’abarwayi baba bakagombye gusohoka barimo amadeni menshi kuko hari n’ababa bafite mituweli zarangiye kubera igihe kinini baba bahamaze.

Ubuyobozi bw’ibitaro bya Caraes bwemeza ko bwakira abarwayi bagera ku 100 ku munsi mu gihe bufite ibitanda 402 n’amashami abiri arimo iriherereye mu Karere ka Gasabo no mu Karere ka Huye.

Uhagarariye NOUSPR-Ubumuntu, umuryango uharanira uburenganzira bw’abafite uburwayi bwo mu mutwe, Umutesi Rose, yavuze ko iki kibazo bakizi ndetse bifuza ko buri muntu wese yumva ko uburwayi bwo mu mutwe ari indwara isanzwe kuko ivurwa igakira.

Ati "Ibitaro bishyiraho akabyo bigatanga imiti bikanavura abarwayi ariko ntibyabona umwanya wo kubitaho, kubereka urukundo no kubaganiriza kuko baba bakeneye abandi babitaho ku buryo twumva buri wese yabigiramo uruhare tukabitaho kuko uburwayi bwo mu mutwe n’indwara nk’izindi."

Yongeyeho ko bari gukora ubushakashatsi kugira ngo bamenye nyir’izina umubare w’abafite uburwayi bwo mu mutwe, anashimangira ko mu Karere ka Nyanza bamaze ku bukoreramo basanze abagera kuri 500 bafite ubwo burwayi.

Ibitaro bya Caraes Ndera bihangayikishijwe n'ubwiyongere bw'abafite uburwayi bwo mu mutwe babigana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .