00:00:00 IGIHE NETWORK KN KINYARWANDA EN ENGLISH FR FRANCAIS

Gasabo: Batatu batawe muri yombi bazira gukubita no gukomeretsa bigatera urupfu

Yanditswe na Igizeneza Jean Désiré
Kuya 4 Ukuboza 2022 saa 08:23
Yasuwe :

Urwego rw’Igihugu rw’Ubugenzacyaha, RIB, rwatangaje ko kuri Sitasiyo yarwo iherereye mu Murenge wa Rusororo ho mu Karere ka Gasabo hafungiye abagabo batatu bakekwaho kugira uruhare mu gukubita no gukomeretsa uwitwa Muhizi Emmanuel bikamuviramo urupfu.

RIB yatangaje aya makuru kuri iki Cyumweru, tariki ya 4 Ukuboza 2022, nyuma y’aho ku mbuga nkoranyambaga hacicikanaga amashusho y’abagabo bari gukubita mugenzi wabo mu buryo bukomeye.

Ayo mashusho agaragaza Muhizi ari gukubitwa ndetse anakururwa mu muhanda hagati, abantu benshi bashungereye. Byabereye imbere ya kamwe mu tubari gaherereye mu Kagari ka Kabuga mu Murenge wa Rusororo ho mu Karere ka Gasabo.

Umuvugizi wa RIB, Dr Murangira B. Thierry, yabwiye IGIHE ko abantu batatu ari bo bafashwe ndetse bari gukurikiranwa.

Ati “Abatawe muri yombi barimo umuyobozi w’ako kabari, uwagakoragamo atanga ibyo kunywa akaba n’umu-bouncer’ ndetse n’ushinzwe umutekano (sécurité)."

Muhizi Emmanuel wakubitwaga bivugwa ko yazizwaga ko muri Kanama 2022 yafatanyije na mugenzi we bakubita uwitwa Harushyubuzima Clément baramukomeretsa bikomeye.

Icyo gihe ngo haje gufatwa mugenzi we gusa, Muhizi Emmanuel aratoroka; uwafashwe yakorewe dosiye inashyikirizwa Ubushinjacyaha.

Nyuma Muhizi yasubiye kuri ako kabari abagabo batawe muri yombi baramubona batangira gukimbirana bamushinja ko yagize uruhare mu gukubita no gukomeretsa Harushyubuzima.

Dr Murangira yavuze ko umurambo wa nyakwigendera wajyanywe gupimwa kugira ngo hamenyekanye icyamuhitanye.

Yakomeje ati “Umurambo wa nyakwigendera wajyanywe muri Laboratwari y’u Rwanda y’Ibimenyetso bishingiye ku bumenyi n’ubuhanga byifashishwa mu Butabera, RFL, kugira ngo hakorwe isuzuma. Iperereza rirakomeje kugira ngo hakorwe dosiye izashyikirizwa Ubushinjacyaha."

Icyaha cyo gukubita cyangwa gukomeretsa ku bushake aba bagabo bakekwaho, gihanwa n’ingingo ya 121 y’itegeko nimero 68/2018 ryo ku wa 30 Kanama 2018 riteganya ibyaha n’ibihano muri rusange.

Iyo gukubita cyangwa gukomeretsa byateye urupfu, abahamwe n’icyaha bahanishwa igifungo kitari munsi y’imyaka 15 ariko kitarenze imyaka 20 n’ihazabu y’amafaranga y’u Rwanda atari munsi ya miliyoni 5 Frw ariko atarenze miliyoni 7 Frw.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .