Gasabo: Babangamiwe n’amazi aturuka ku musozi no mu muhanda uheruka kubakwa atarateganyirijwe inzira

Yanditswe na IGIHE
Kuya 14 Ukwakira 2019 saa 06:58
Yasuwe :
0 0

Abaturage bo mu Murenge wa Bumbogo mu Karere ka Gasabo bavuga ko babangamiwe n’amazi aturuka mu muhanda baheruka kubakirwa n’aturuka mu misozi ibakikije atarahawe uburyo buhamye bwo kuyafata akaba abangiriza imyaka n’inzu.

Abaganiriye na IGIHE bavuze ko uwo muhanda Zindiro-Masizi umaze amezi make utashywe ariko aho imvura itangiriye kugwa ari nyinshi, umuvu urenga inzira wagenewe ukagera mu ngo zabo no mu myaka.

Bavuga ko uretse kuba amazi arenga inzira yagenewe kubera ari nto akabangiriza imyaka, n’abantu n’ibinyabiziga bagorwa no kuwugendamo iyo imvura ihise kubera uba wuzuyemo amazi n’ibyondo byinshi.

Umwe muri bo yagize ati “Ntibateganyije aho amazi agomba guca kandi uri munsi y’imisozi. Hari n’ahari ruhurura idakoze amazi yose yamanuka agahita akubita inzu z’abaturage. Nk’imvura y’ejo yarahangije bikabije, n’ubu kugira ngo uhatambuke ni ingorabahizi kandi umuhanda nturamara n’amezi umunani wubatswe.”

Aba baturage basaba ko ayo mazi aturuka mu misozi yakubakirwa ruhurura yihariye kugira ngo atabasenyera kandi n’umuhanda ukubakirwa inzira ngari itwara amazi atangije ibikorwa byabo.

Undi muturage yagize ati “Dusaba ubuyobozi ko hakubakwa ruhurura y’aya mazi. Hanyuma umuhanda nta ruhurura zihagije zitwara ayo mazi washyizewo, uduhari ni duto cyane ku buryo ageramo akagaruka mu nzu z’abaturage, mu maduka no mu myaka.”

Uretse ikibazo cy’umuhanda utubakiwe inzira zihagije z’amazi, abaturage bavuga ko hari n’umushoramari uri kuhubaka sitasiyo ya lisansi wafunze amazi kugira ngo atajya aho yubaka ntiyakora izindi bituma amazi atagenda, akagaruka mu muhanda, mu maduka no mu nzu z’abaturage.

Umuyobozi Wungirije w’Akarere ka Gasabo ushinzwe Iterambere ry’Ubukungu, Mberabahizi Raymond Christian, yabwiye IGIHE ko icyo kibazo batari bakizi ariko bagiye kugikurikirana.

Ati “Nk’ubuyobozi bw’akarere nta kibazo turakira, gusa icyo tuzi ni uko kubera iriya mvura nyinshi yaguye hari ibibazo byinshi byagiye bigaragara n’aho Bumbogo hari ibyahagaragaye.”

Yavuze ko buri gihe iyo hubakwa ibikorwa remezo hari ibintu biteganywa nk’inzira z’amazi n’ibindi bikazagaragara ko bitari bihagije byatangiye gukoreshwa.

Mberabahizi yavuze ko nubwo uwo muhanda watashwe ugifitwe mu nshingano n’abawukoze, ikibazo wateza bagomba kugikosora.

Ati “Ntabwo umuhanda urarangira, bigaragaye ko hari ibitaranoga byanozwa, abaturage batwegera, bakatugaragariza ahari ibibazo kuko abawukoze baracyawufite mu nshingano, bigakemurwa.”

Mberabahizi yavuze ko icyo kibazo ubuyobozi bw’akarere bugiye kugikurikirana. Ati “Buriya tuzahagera, abaturage batugaragarize uko bimeze turebe uko ibyo bibazo byakosorwa.”

Umuhanda Zindiro-Masizi ureshya na kilometero 14, uca mu Mirenge ya Bumbogo, Nduba na Kinyinya.

Amazi yatangiye kugera mu ngo z'abaturage
Amazi kubera ubwinshi bwayo yatangiye kwangiza imyaka y'abaturage ikiri mu mirima
Kugenda muri uyu muhanda imvura ihise ni ingorabahizi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza