Gasabo: Abagore basabwe kwita ku bo bashakanye bakabagenera umwanya

Yanditswe na Thamimu Hakizimana
Kuya 4 Ugushyingo 2019 saa 01:21
Yasuwe :
0 0

Abagore bo mu rugaga rw’Umuryango FPR Inkotanyi mu Karere ka Gasabo, bagaragaje ko kwita ku bo bashakanye bakanabagenera umwanya mu ari imwe mu nkingi yo guhuza neza inshingano z’akazi, iz’ububyeyi ndetse n’iz’urugo mu rugendo rw’Iterambere.

Ibi byagaragajwe mu mpera z’icyumweru gishize mu biganiro bagiranye bigamije kurebera hamwe uko ababyeyi bahuza neza inshingano z’akazi iz’ububyeyi ndetse n’iz’urugo.

Muri ibi biganiro abagore bagaragaje ko kutumvikana hagati y’abashakanye ari kimwe mu biteza amakimbirane mu ngo bikanadindiza iterambere ry’umuryango. Binatuma kandi hatuzuzwa inshingano zo kwita ku bana baba barabyaye.

Biyemeje gushyira imbaraga mu mikorere y’Itorero ry’umudugudu no gusaba ababyeyi kuganira n’abana babo kugira ngo babisanzureho banabagire inshuti, babatoze gukora ibibahesha agaciro bagambiriye gutegura ubuzima bwabo buri imbere.

Banasabwe kandi kwita ku bo bashakanye bakanabaha umwanya wihariye n’ibindi.

Uhagarariye urugaga rw’abagore rushamikiye ku muryango wa FPR Inkotanyi mu Karere ka Gasabo, Rugera Jeannette, yemeje ko nyuma y’ibi biganiro biyemeje kurushaho gukomeza ubufatanye n’abagabo mu nshingano zose.

Ati “Icyo ibi biganiro byadufashije ni ukumva cyane cyane ko umugabo yagerageza gufasha umugore kugira ngo za nshingano afite abashe kuzuzuza neza ntihabeho kumva ko igihe aba adahari aba yataye inshingano kuko ashobora kuba aba yagiye mu kandi kazi ahubwo habeho gufatanya haba mu kurera abana no mu zindi nshingano.”

Yongeyeho ko basoje ibi biganiro biyemeje gukangurira abashakanye gufatanya kurera abo babyaye ntibiharirwe umugore gusa no kujya baganira no kurangwa n’ubworoherane.

Kamanzi Umulisa Charlotte uhagarariye Urugaga rw’abagore mu muryango wa FPR mu Kagari ka Kibagabaga, yemeza ko ubwuzuzanye hagati y’abashakanye bwagerwaho 100% ari uko abantu bose bamenye icyo uburinganire ari cyo.

Yagize ati “Hari abafata uburinganire uko butari, rero mbona icyo bisaba ari uko abantu bakwigishwa bakanasobanurirwa icyo uburinganire ari cyo kuko umugore agomba kuzuza inshingano ze nk’umugore n’umugabo akazuza ize nk’umugabo noneho bagahurira kuri bya bindi bavuga aho badakwiye guheza umugore nko mu gihe cy’izungura no mu gufata ibyemezo mu rugo.”

Umunyamabanga mukuru wungirije wa RIB, Karihangabo Isabelle, agaragaza ko hakenewe imbaraga nyinshi mu bukangurambaga kugira ngo ababyeyi bahuze neza inshingano zabo n’akazi ndetse n’iz’urugo.

Yagize ati “Igikwiye gukorwa ni ugushyira imbaraga nyinshi mu kubungabunga mu muryango ababyeyi bagasubira ku nshingano zabo kuko niyo baba bafite imirimo itandukanye badakwiye kwibagirwa ko bafite abana bagomba gushakira umwanya uhagije no kumenya kubasuzuma no kubagenzura kugira ngo barebe ko ntacyo babaye banamenye uko biriwe.”

Agaragaza ko hakiri ibyaha bitandukanye bikigaragara mu bashakanye birimo gukubita no gukomeretsa, kwicana, gusesagura imitungo no kutita ku bana bikabaviramo gusambanywa bakiri munsi y’imyaka 18 ariko ashimangira ko nihakorwa ubukangura bwo gushishikariza abashakanye kuzuzanya byose bizakemuka.

Bamwe mu bagabo bitabiriye ibiganiro bigamije kurebera hamwe uko ababyeyi bahuza neza inshingano z’akazi n’iz’ububyeyi ndetse n’iz’urugo mu rugendo rw’Iterambere
Bamwe mu batanze ibiganiro
Visi Perezida w'Umuryango FPR Inkotanyi ku rwego rw'Umujyi wa Kigali, Mukarubega Zulfat, ni we wari umushyitsi mukuru muri iki gikorwa
Ibiganiro byitabiriwe n'abayobozi batandukanye mu Muryango FPR Inkotanyi ku rwego rw'Akarere ka Gasabo n'urw'Umujyi wa Kigali
Uhereye ibumoso: Umunyamabanga Nshingwabikorwa w'Inama y'Igihugu y'Abagore (CNF) Kamanzi Jacqueline; Senateri Jeanne d'Arc Gakuba; umunyamakuru Mbabazi Dorothy; Umunyamabanga Mukuru wungirije w'Urwego rushinzwe Ubugenzacyaha (RIB), Kalihangabo Isabelle na Senateri Niyomugabo Cyprien
Kamanzi Umulisa Charlotte uhagarariye Urugaga rw’abagore mu muryango wa FPR mu Kagari ka Kibagabaga yemeza ko bisaba ubukangurambaga bwinshi kugira ngo abantu bamenye icyo uburinganire ari cyo
Umunyamabanga Mukuru wungirije wa RIB, Karihangabo Isabelle, avuga ko abagabo n'abagore bakwiye gufashanya mu gutegurira abana babo ejo hazaza heza
Uko byari byifashe ahabereye ibiganiro bigamije kurebera hamwe uko ababyeyi bahuza neza inshingano z’akazi n’iz’ububyeyi ndetse n’iz’urugo mu rugendo rw’Iterambere
Umuyobozi w’Urugaga rw’abagore rushamikiye ku muryango wa FPR Inkotanyi mu Karere ka Gasabo, Rugera Jeannette aha ikaze abitabiriye ibi biganiro
Rugera Jeannette avuga ko ubufatanye bw'abashakanye bugira umusanzu ukomeye mu iterambere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza