Ganzo wamamaye mu muziki mu myaka 10 ishize yagiriwe icyizere n’Inama y’Abaminisitiri

Yanditswe na Uwiduhaye Theos
Kuya 15 Ukuboza 2020 saa 08:57
Yasuwe :
0 0

Maryse Bonhomme Gwiza wamamaye nka Ganzo mu muziki ari mu bagiriwe icyizere mu Nama y’Abaminisitiri yateranye ku wa 14 Ukuboza 2020, iyobowe na Perezida Paul Kagame.

Ganzo ni umwe mu bahanzikazi bakoze umuziki mu myaka 10 ishize ndetse yamenyekanye cyane mu ndirimbo ‘Karumuna kanjye’ yamamaye cyane muri ibyo bihe.

Inama y’Abaminisitiri yateranye, yamugize Umuyobozi Ushinzwe gusesengura no guhuza imikoranire y’ibijyanye n’Ikoranabuhanga [Digitization Analyst] mu Kigo cy’u Rwanda gishinzwe Ikoranabuhanga mu Itumanaho n’Isakazabumenyi, RISA.

‘Karumuna kanjye’ yamenyekanishije Ganzo, yayisohoye 2011 ubwo umuziki w’u Rwanda wari ufite umurindi ukomeye waturukaga mu yari Kaminuza Nkuru y’u Rwanda i Huye.

Ganzo yari umwe mu bahanzikazi batangiye kwigaragaza mu 2009, ubwo yigaga muri iyo kaminuza mu Ishami ry’Ubumenyi mu bijyanye na Mudasobwa.

Yakoze izindi ndirimbo zirimo ‘Wowe’, ‘Ubuntu’, ‘Byakubaho’, ‘Ndagukunda’ n’izindi. Nyuma aza kwibaruka umwana we w’imfura ndetse asa nk’ushyize umuziki ku ruhande. Ganzo afite ubu afite imyaka 32.

Muri iyi nama Ganzo yaherewemo inshingano nshya, na Dr Muyombo Thomas wamenyekanye mu muziki nka Tom Close yazamuwe mu ntera agirwa Umuyobozi w’Ishami rishinzwe gutanga amaraso mu gihugu ribarizwa mu Kigo cy’Igihugu gishinzwe Ubuzima.

Abafite aho bahuriye n’umuziki bakomeje kugirirwa icyizere kuko mu Nama y’Abaminisitiri yateranye ku wa 11 Ugushyingo 2020 yahaye Umuhanzi Aimable Twahirwa inshingano nk’Umuyobozi Mukuru ushinzwe Iterambere ry’Umuco muri Minisiteri y’Urubyiruko n’Umuco.

Maryse Bonhomme Gwiza wamamaye nka Ganzo mu muziki yagizwe Umuyobozi Ushinzwe gusesengura no guhuza imikoranire y’ibijyanye n’Ikoranabuhanga [Digitization Analyst] muri RISA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .