Forode mu bucuruzi bw’imodoka zambaye ‘plaque’ za RDC zikomeje kwiyongera mu Rwanda

Yanditswe na Rabbi Malo Umucunguzi
Kuya 14 Ukwakira 2020 saa 05:16
Yasuwe :
0 0

Nutembera hirya no hino nko mu Murwa Mukuru Kigali cyangwa mu mijyi ikora kuri Repubulika Iharanira Demokarasi ya Congo nka Rusizi cyangwa Rubavu, uzabona umubare munini w’imodoka nyinshi zambaye ‘plaque’ za RDC, nyamara si ko abazitunze bose ari Abanye-Congo cyangwa babyemererwa n’amategeko.

Ni ibintu bimaze kumenyekana nk’uko hari abashoferi benshi mu Rwanda bagendera kuri permis zitwa ko ari inkongomani, nyamara abazikoreyeyo ari mbarwa, ahubwo imiterere y’ubutegetsi bw’icyo gihugu yatumye forode ikorwa ku bwinshi, ufite ifaranga akabona icyo akeneye.

Amakuru IGIHE yamenye ni uko uretse permis, muri iyi minsi abantu batuma muri RDC ibyangombwa by’imodoka birimo plaque, ubwishingizi na carte jaune, bikinjizwa mu Rwanda bigaterwa ku modoka ziturutse mu mahanga ziri mu nzira (transit) zigana muri RDC, urugendo rugasorezwa aho zidasoze.

Umwe mu bemeye gutanga amakuru ariko wasabye ko umwirondoro we udatangazwa, yahamije ko mu mezi ashize yinjije mu Rwanda imodoka icumi mu gihe mugenzi we yinjije esheshatu.

Byagenze bite ngo zinjire mu Rwanda zidasoze?

Ubundi izi modoka zitumizwa mu Buyapani mu buryo bw’ikoranabuhanga ziba zitwarirwa ibumoso, byitwa ko zigomba kujyanwa muri Repubulika ya Demokarasi ya Congo, kuko zidashobora kwemerwa mu Rwanda rwakira gusa izitwarirwa iburyo.

Uwo musore yagize ati “Iyo njye nyikuguriye tugirana amasezerano atatu: Kuba imodoka yagera muri Tanzania ukajya kuyizanira, kuba nayikugereza ku Rusumo cyangwa se niba nayikugereza muri gasutamo ya Congo. Ibyo rero nibyo twakoraga kuva kera, nyuma hajemo COVID-19 ari nayo yatangije ibibazo.”

Ngo yatumije imodoka, muri Werurwe imipaka irafungwa ariko imodoka zo zikomeza kuzanwa, zigeze ku Rusumo zirahatinda.

Zaje kuhaba nyinshi mu gihe cya Guma mu Rugo, bigera aho parikingi izamurirwa igiciro biba 11800 Frw ku munsi, hatangira kubaho ubwoba ko amafaranga zaguzwe ashobora gushirira mu kwishyura parikingi ku mupaka, kandi ba nyirazo ngo ntabwo bari kubasha kuzikurikirana zinjiye muri Congo kubera COVID-19.

Aho ngo nibwo hajemo icyo bise “kwiyeranja.” Kubera ko izo modoka zari iz’abanyarwanda, ngo habonetse umuntu abizeza ko hari uwafabasha akabaha ibyangombwa imodoka ziri mu Rwanda, ntizirirwe zigera muri Congo muri gasutamo yaho kandi ariho zigomba gusohokera, zikazabona kugaruka mu Rwanda.

Ibyangombwa byashatswe mu buryo butemewe n’amategeko, babigerezwa mu Rwanda, birangira imodoka zitangiye gukoreshwa mu Rwanda kandi zitigeze zitangirwa umusoro cyangwa icyangombwa cyo kuhinjira.

Izo modoka zageze ku mupaka wa Rusumo zahawe inyandiko yo kwambukiranya u Rwanda izwi nka T1, yagomba kwemezwa bwa nyuma n’umukozi wo ku mupaka wa Rusizi i aho zari gusohokera mu Rwanda zikinjira muri RDC.

Uyu musore yakomeje ati “Rero habayemo kwiyeranja, hari uwabidufashijemo bakajya babidukuriramo, ibyangombwa by’imodoka byo muri Congo byabaga byaguzwe, bakabishyiriraho hano [mu Rwanda], imodoka ikajya mu muhanda.”

Hari amakuru ko umuntu wahuje aba bacuruzi b’imodoka n’umukozi wa RRA wabafashije kwemeza ko imodoka zasohotse mu Rwanda kandi ziri mu gihugu, yasabye 450$ kuri buri modoka. Harimo 400 $y’ibyangombwa by’imodoka byo muri Congo na 50$ y’ikarita yo kwinjira mu Rwanda yakwa buri kwezi. Ni ukuvuga ko nk’uwari ufite imodoka icumi yishyuye 4500$.

Byaje gutangira kumenyekana

Magingo aya hari amakuru ko bene izi modoka zinjiye zityo mu Rwanda zikomeje gufatwa, ndetse ubu hari izigera hafi 40 zafashwe cyane cyane mu Mujyi wa Rusizi.

Kugira ngo amategeko akurikizwe, izi modoka zagombaga gukomeza urugendo zikagera muri RDC nk’uko ibyemezo bizitumiza byabigaragazaga, zikishyurirwa imisoro zikava muri gasutamo zigahabwa ibyangombwa byaho.

Nyuma nibwo ba nyirazo bashoboraga kuzinjiza mu Rwanda, bagaca ku mupaka bagahwa ikarita ko binjiye mu Rwanda, bakishyura 15000 Frw by’iminsi 14 cyangwa 50$ cyangwa 48000 Frw ku kwezi. Nyamara zabonye ibyangombwa byose zikiri mu Rwanda, nubwo hatangiye kugenda kubonekamo ibyangombwa bitari umwimerere.

Uwo musore yagize ati “Kugira ngo bazimenye rero, imodoka yose y’inyamahanga iri mu gihugu igomba kuba iri mu ikoranabuhanga rya RRA. Bazishyiragamo rero, kubera ko nta karita yo kwinjira mu gihugu twari dufite, bakayibura, kuko nta buryo yagaragara kandi itarashyizwemo.”

Ni ukuvuga ko imodoka zari zitangiye kugaragara mu gihugu kandi byitwa ko zasohotsemo, nta n’icyangombwa kigaragaza igihe zagarukiye mu Rwanda.

IGIHE yamenye umusore umwe imodoka ye ya Toyota Ferozo yaje gufatwa, avuga ko yahawe ibyangombwa byo muri Congo imodoka iri mu Rwanda, n’icyangombwa cy’uko yinjiye mu Rwanda ivuye RDC, kandi itarigeze ihasohoka.

Ati “Njye nari ndimo ngenda mpura n’umukozi wa RRA, arambwira ati ‘nkeneye kureba ku byangombwa by’imodoka yawe. Ndabimuha byose, muha n’iyo karita, arambwira ati ‘rero hari imodoka zitari mu ikoranabuhanga, tugende turebe imodoka yawe ko yaba iri mu ikornabuhanga’.”

“Barareba basanga ikarita yo kwinjira mu gihugu ntabwo iri mu ikoranabuhanga, imodoka ntabwo igaragara ko yinjiye mu gihugu kubera ko icyemezo cyanditswe n’intoki. Ni ukuvuga ngo biri kubarwa ko imodoka iri muri Congo, kandi imodoka iri mu Rwanda, bivuze ko zimeze nk’izinjiye zitishyuye.”

Kuki imodoka zifite ibyangombwa bya Congo?

Abemeye kuvugana na IGIHE bahamije ko nk’abantu bakunda kujya muri Congo, bifashisha imodoka zifite ibirango byaho by’umwihariko zitwarirwa ibumoso, kuko usanga zigura make ugereranyije n’izitwarirwa iburyo zemewe mu Rwanda.

Nk’urugero imodoka ya Mercedes-Benz Kompressor itwarirwa iburyo ari nayo yemerwa mu Rwanda, ishobora kugurwa 10.000$, byagera ku itwarirwa ibumoso ikagurwa 6000$. Byongeye, nk’imodoka yagasorewe miliyoni 4,5 Frw mu Rwanda, muri RDC ngo isorerwa miliyoni 2.5 Frw.

Hari n’uwavuze ko bitewe n’uburyo uzwimo, nk’umucuruzi ashobora gukura imodoka ye muri gasutamo muri RDC ku 2000$ cyangwa 2200$, wowe ukayivanamo ku 1500$ cyangwa ku 1600$, kuko hariya ntabwo ari ibintu ntakuka, “ni ukumvikana.”

Mu kumvikanisha kandi amafaranga yanyerejwe, aba bacuruzi bemeza ko nk’imodoka iguzwe 3000$ mu Buyapani, kugira ngo ive muri Tanzania ku cyambu igere muri RDC bitwara nibura 1000$ (bikaba 4000$), yagera muri RDC, ivatiri kuyivana muri gasutamo ikishyura 2500$, ku buryo yaba ihagaze mu 6500$.

Banavuga ko umuntu ukorera muri RDC afite imodoka ifite plaque yo mu Rwanda, bamusuzugura cyane n’abashinzwe umutekano mu muhanda bakakwiyenzaho.

Umwe yakomeje ati “Uri nk’umunyarwanda ufite iduka hariya, iyo bihindutse, imodoka ushobora kuyiparika ku muhanda ugataha n’amaguru. Hari igihe ibintu bihinduka bagatwika amapine, ufite imodoka y’inyarwanda ku muhanda wasanga bayitwitse. Ariko ari inye-Congo ushobora no kugenda ukayiparika ahantu mu gipangu umuntu akayikubikira.”

Ubuyobozi bwa RRA bwemeje ko bukomeje gukurikirana iki kibazo, ndetse ko hamaze gufatwa imodoka zisaga 30 cyane cyane mu Karere ka Rusizi.

Mu Rwanda haboneka imodoka nyinshi zambaye plaque za RDC, ariko si ko zose zahageze byemewe n'amategeko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .