Filime ‘Notre-Dame du Nil’ igiye kwerekanwa mu nama y’iminsi ibiri yateguwe na RDB

Yanditswe na Uwiduhaye Theos
Kuya 20 Ugushyingo 2019 saa 07:46
Yasuwe :
0 0

Filime ‘Notre-Dame du Nil’ yakomotse ku gitabo cya Mukasonga Scholastique igiye kwerekanwa mu nama yateguwe n’Ikigo cy’Igihugu cy’Iterambere (RDB) igamije kuganira ku iterambere ry’uruganda rw’amajwi n’amashusho yiswe ‘Kigali Audiovisual Forum [KAF]’.

Iyi nama izaba guhera ku wa 27-28 Ugushyingo 2019 ku nshuro yayo ya kabiri, ihurize muri Kigali Serena Hotel abantu 500 baturutse mu bice bitandukanye ku Isi.

Gusa ku wa 26 Ugushyingo hateganyijwe ikiganiro nyunguranabitekerezo ku bantu baba mu ruganda rw’amajwi n’amashusho bo mu Rwanda.

Mu kiganiro n’abanyamakuru cyo kuri uyu wa Kabiri tariki 19 Ugushyingo ; Umuyobozi w’ishami rishinzwe ubukerarugendo no kubungabunga ibidukikije muri RDB, Ariella Kageruka, yavuze ko iyi izaba umuyoboro ku bazayitabira bafite aho bahuriye n’uru ruganda kuko bazabasha kungurana ibitekerezo no guhura imbona nkubone.

Ati “Iyi nama ni umwanya mwiza wo guhura no kungurana ibitekerezo ku bantu batandukanye bakora ibikorwa bijyanye n’uru ruganda rw’amajwi n’amashusho. Ntabwo bizakorwa nk’u Rwanda gusa ahubwo bizakorwa ku rwego mpuzamahanga.”

Umwaka ushize hari hitabiriye abantu 300 baturutse mu bihugu bitandukanye mu gihe uyu hazaba hitabiriye 500, ndetse hazarebwa umusaruro inama y’umwaka ushize yatanze.

Yakomeje ati “Nk’uko mubizi leta y’u Rwanda ifata uruganda rw’amajwi n’amashusho nka hamwe mu hantu hafite imbaraga hashobora kuba hakurura ba mukerarugendo kandi rwafasha mu iterambere ry’igihugu no guhanga imirimo ku rubyiruko.”

Yavuze ko u Rwanda rwifuza ko haba amahirwe menshi yo kuba umuntu yakurura abashaka gukorera filime muri Afurika, kuba baza mu Rwanda kuko filime ari kimwe mu bintu byihutisha kumenyekanisha ahantu.

Victor Cludal wari uhagarariye Umushinga w’Abadage wita ku Iterambere (GIZ) uri mu bafatanyabikorwa muri iyi nama, yavuze ko ari ubwa kabiri bagiye gufatanya na RDB kandi babyishimiye.

Ati “Tugiye gufatanya na RDB ku nshuro ya kabiri muri iyi nama ya ‘Kigali Audiovisual Forum’ kuri GIZ, ku mpamvu nyinshi ni uruganda rw’ingirakamaro by’umwihariko bikaba akarusho iyo bigeze kuri iyi nama.”

Muri iyi nama hazaganirirwa uko uruganda rwakomeza gutera imbere ariko na none harebwa ibirubangamira kugira ngo bibe byavugutirwa umuti.

Uyu mwaka hategerejwe abakinnyi, abanditsi, abayobora n’abakora filime; sosiyete sivile, abikorera n’abandi.

Abazatanga ibiganiro harimo Umunya-Ghana, Isaac Kwaku Fokuo, washinze ikigo cya Botho Emerging Markets Group ; Umufaransa Franck Priot washinze Ghost City umaze kwamamara mu kuyobora filime na Talitha Watkins uzaba uturutse muri Leta Zunze Ubumwe za Amerika.

Bimwe mu bizigwaho harimo imbaraga za Afurika mu gukoresha ikoranabuhanga mu kubara inkuru, ubunyamwuga mu ruganda ndetse n’iterambere ry’ubumenyi bwa kinyamwuga mu gutunganya amajwi n’amashusho ndetse n’ikwirakwiza ry’ibyakozwe.

Uretse ibiganiro, hazerekanwa na filime yiswe “Our Lady Of The Nile” [Notre Dame du Nil] yakinywemo n’abakobwa b’abanyarwandakazi iri no muri filime ebyiri [yo na Petit Pays] yakomotse ku gitabo cya Gael Faye, zakiniwe mu Rwanda zikabasha kungura ubukungu bw’igihugu miliyoni ebyiri z’amadorali.

Yashibutse ku gitabo cyanditswe na Scholastique Mukasonga, umunyarwandakazi uba mu Bufaransa cyasohotse mu 2012, kigahabwa ibihembo mpuzamahanga bibiri ari byo Prix Renaudot na Prix Ahmadou Kourouma.

Muri iki gitabo Mukasonga agaragaza itotezwa ryakorerwaga abakobwa b’abanyeshuri bakomokaga mu bwoko bw’Abatutsi mbere ya Jenoside yakorewe Abatutsi mu 1994.

Umwanditsi avuga ibyabereye mu kigo cy’amashuri yisumbuye cyitwaga Notre Dame Du Nil cyari icy’abakobwa gusa.

Nyuma y’imyaka umunani iki gitabo gisohotse, ikigo gikora filime cyitwa Les Films du Tambour kiyobowe na Marie Legrand na Rani Massalha, bari kumwe n’umuhanga mu gutunganya filime Atiq Rahimi, baje mu Rwanda gukora filime ishingiye kuri iki gitabo.

Iyi filime yakiniwe mu Karere ka Musanze no muri Rutsiro ku ishuri rya Murunda, igaragarano abakobwa b’abanyarwandakazi bagera kuri 20 barimo Amanda Mugabekazi, Malaika Uwamahoro, Albina Sydney Kirenga na Clariella Bizimana.

Hazatangwa ibihembo ku banditsi n’abayobozi ba filime.

Ariella Kageruka yavuze ko iyi nama izaba umuyoboro wo kungurana ibitekerezo ku bazayitabira
Umuyobozi Mukuru w’Ishami rishinzwe gucunga imishinga ya Leta muri RDB, Siboniyo Felix mu kiganiro n'itangazamakuru cyabaye kuri uyu wa Kabiri
Victor Cludal wari uhagarariye Umushinga w’Abadage wita ku iterambere (GIZ) uri mu bafatanyabikorwa muri iyi nama

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza