00:00:00 IGIHE NETWORK KN KINYARWANDA EN ENGLISH FR FRANCAIS

FARDC yeruye ko ishyigikiye FDLR; ibwira u Rwanda ko ruri kurira ay’ingona

Yanditswe na IGIHE
Kuya 1 June 2022 saa 04:20
Yasuwe :

Igisirikare cya RDC, FARDC, cyeruye kigaragaza uruhande gihagazeho ku Mutwe wa FDLR, gishimangira ko kitumva uburyo uteye ikibazo u Rwanda kuko ngo ugizwe n’abantu baba bishakira ibyo kurya gusa.

Umuvugizi w’Igisirikare cya RDC, Gen Maj Léon-Richard Kasonga, yatangaje ko igisirikare avugira cyakoze ibishoboka byose, kirwanya FDLR ku buryo muri iki gihe imaze kuba amateka.

Yagize ati "Kandi ntimwibagirwe, muri iki gihugu ni abasirikare bangahe bapfiriye ku rugamba bari kurwanya FDLR? Ni abagabo bangahe, ababyeyi, abana bacu, abasore n’abakobwa biciwe muri Kivu y’Amajyaruguru n’iy’Epfo mu bikorwa byo kurwanya FDLR?"

Kasonga yumvikanishaga ko ibyo u Rwanda ruvuga ko rubangamiwe na FDLR ari ukwitatsa.

Yakomeje ati "Twarwanyije ibyo byihebe dushishikaye kandi dufite umuhate ku buryo twabitsinze ku butaka bwacu, ku buryo abo bantu uyu munsi nta kibazo bateye ibihugu bakomokamo."

"Dushobora gufata icumi, icyenda cyangwa umunani bari ahantu runaka bari gushaka ibyo kurya cyangwa imiti kugira ngo babone uko bakwiberaho, ariko mu buryo ubwo aribwo bwose, nta muntu bashobora guhungabanyiriza umutekano yewe n’uw’aho bakomoka."

Uyu mugabo yavuze mu biro bye afitemo inyandiko na dosiye ndende zivuga kuri FDLR. Ngo iyo uzifunguye, nta tariki n’imwe ubonamo igaragaza ko uyu mutwe waba waragabye igitero ku butaka bw’u Rwanda.

Ati "Mu biro byanjye mfite dosiye, urafungura ubonemo dosiye ndende ivuga kuri FDLR ariko nta gitero na kimwe uri bubone cyagabwe ku Rwanda, yewe n’umunsi n’umwe. Uyu mutwe twarawutsinze."

Mu mvugo z’uyu mugabo yanavuze ko Igisirikare cya RDC cyahashyije burundu Umutwe wa LRA ugizwe n’inyeshyamba za Joseph Konny zo muri Uganda, ko ari na ko byagendekeye FDLR.

Imvugo za Kasonga zishingiye kuki?

Amagambo ya Gen Kasonga aje nyuma y’aho u Rwanda rushinje FARDC gukorana n’Umutwe wa FDLR bagashimuta abasirikare babiri b’u Rwanda.

Ni ibikorwa byabaye mu mpera za Gicurasi ndetse bikaba imbarutso y’umwuka mubi hagati y’ibihugu byombi.

Minisitiri w’Ububanyi n’Amahanga, Dr Vincent Biruta, mu kiganiro n’abanyamakuru cyabaye ku wa Kabiri, tariki 31 Gicurasi 2022, yavuze ko Ingabo za RDC zirimo gukorana na FDLR mu mugambi wo kuyifasha kugera hafi y’u Rwanda ngo ijye iruhungabanyiriza umutekano.

Ati “FARDC, ni ingabo za RDC, uyu munsi amakuru dufite ni uko bafatanyije na FDLR, baza kurwana, babahaye impuzankano, akaba ari bo bashyira imbere ariko urumva FARDC ifite gahunda yayo, FDLR ifite gahunda yayo, ni ukugira ngo bagere ku mupaka w’u Rwanda noneho babashe kujya bakora ibikorwa byabo by’iterabwoba mu Rwanda."

Yakomeje agira ati "Bararwanana, ubu baravanze rwose wagira ngo ni igisirikare kimwe, inama barazikora bagahuza gahunda y’ibyo bagiye gukora, ni ibintu bizwi. Ariko noneho bakazana na MONUSCO ikaza ngo ije gushyigikira FARDC."

"Kuko iyo ukoranye na FARDC uziko irimo FDLR, uba wahisemo gukorana na FDLR.”

Gen Kasonga yumvikanishaga ko ibyo u Rwanda ruri kuvuga ari ukwiriza, ko FDLR rutaka itabarizwa muri RD Congo, kandi ko nta kibazo iyiteye mu buryo ubwo aribwo bwose.

Nyamara uyu mutwe ugizwe n’Interahamwe zavuye mu Rwanda zikoze Jenoside yakorewe Abatutsi mu 1994. Zageze mu mashyamba ya Congo, zagabye ibitero byinshi ku Rwanda guhera mu 1995.

Nyuma y’aho wagiye ugaba mu Rwanda ibitero shuma bigamije gusahura no kureba uko waca mu rihumye inzego z’umutekano z’u Rwanda ngo usohoze umugambi wa Jenoside.

Aho mu mashyamba ya RD Congo watangiye gucikamo ibice bitewe n’ingengabitekerezo y’abawugize, uvamo indi mitwe nka RUD Urunana na FLN yagabye ibitero ku Rwanda mu bihe biheruka cyane mu myaka ya 2018 na 2019.

Umujyanama wa Perezida Kagame mu by’Umutekano, Gen James Kabarebe, umwaka ushize yatangaje ko abateye u Rwanda binjiriye muri Nyungwe mu myaka ishize, bakomoka kuri FLDR.

Ati “Politiki yabo y’amacakubiri bamaranye igihe yabinjiyemo baritandukanya bashingiye ku byo bakeka ko bibatandukanya. Abaturutse i Burundi bagiye batera u Rwanda banyuze muri Nyungwe.”

Usibye abagiye mu Burundi, hari ikindi gice cyagumye muri RDC kigikora na magingo aya.

Abasesenguzi basobanura ko kuba FDLR yava muri Congo burundu, ari igihombo ku basirikare bamwe ba FARDC kuko bayifashisha mu gushaka ubutunzi, ari nayo mpamvu muri iki gihe bigoye kwemera ko iriho kandi ko ibangamiye u Rwanda.

Kuba FARDC yavuga ko FDLR nta kibazo iteye, birasa no kwivuguruza yo ubwayo kuko umwaka ushize Guverinoma ya Congo yavuze ko uyu mutwe ariwo wishe Ambasaderi w’u Butaliyani muri RDC.

Icyo gihe Guverineri wa Kivu y’Amajyaruguru yavuze ko abarwanyi ba FDLR bateze imodoka za PAM, bagakuramo abari bazirimo barimo na Ambasaderi, bikaza no kurangira yishwe.

Umwe mu basesenguzi baganiriye na IGIHE, yagize ati “RDC iri kwivuguruza. Niba abo 10, 9 cyangwa 8 bavuze ngo babona, bagiye gushaka ibyo kurya, aribo bishe Ambasaderi, ni gute wahindukira ukavuga ko nta kibazo bateye?”

Umwaka ushize FDLR yagabye ibitero ku Rwanda, abarwanyi bayo barasa inka eshanu z’umuturage wo mu Murenge wa Bugeshi, hapfamo imwe izindi zirakomereka.

Mbere y’aho bari bateye nabwo Sacco yo muri uwo murenge, bangiza inzu z’ubucuruzi z’abaturage ndetse basahura bimwe mu bintu byabo.

Umuvugizi w’Igisirikare cya RDC, Gen Maj Léon-Richard Kasonga, yatangaje ko u Rwanda ruri kwiriza, ko nta kibazo FDLR irutwaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .