EU yatanze miliyari zisaga 10 Frw zo gufasha impunzi zicumbikiwe i Gashora

Yanditswe na Rabbi Malo Umucunguzi
Kuya 22 Ugushyingo 2019 saa 09:20
Yasuwe :
0 0

Komiseri w’Umuryango w’Ubumwe bw’u Burayi ushinzwe ubutwererane n’amahanga n’iterambere, Neven Mimica, yatangaje ko uyu muryango wahaye Ishami ry’Umuryango w’Abibumbye ryita ku mpunzi, UNHCR, inkunga ya miliyoni €10.3, ni ukuvuga asaga miliyari 10 Frw, yo kwifashisha mu gutunga impunzi n’abimukira baturutse muri Libya, bacumbikiwe mu nkambi y’agateganyo ya Gashora.

Izi mpunzi zakiriwe n’u Rwanda nyuma y’igihe zaraheze mu gihugu cya Libya, aho zageze zihunga ibihugu byabo zishakisha amayira yo kujya mu Burayi, ariko zikabura inzira, n’abagerageje kwambuka inyanja ya Méditerranée abenshi bagatikiriramo.

U Rwanda rwemeye kwakira izi mpunzi n’abashaka ubuhungiro baturutse muri Libya bagera kuri 500 n’ubwo bashobora kurenga, mu gihe hagishakishwa niba babasha gusubira mu bihugu byabo, bakimurirwa ahandi cyangwa bakaguma mu Rwanda igihe babihisemo.

Ni inkunga yatanzwe binyuze mu kigega cya EU cyitwa Emergency Trust Fund for Africa, kinatanga inkunga mu gufasha inkambi y’agateganyo yo muri Niger, icumbikiwemo impunzi n’abashaga ubuhungiro bagera ku 2900, nabo baturutse muri Libya guhera mu 2017.

Intumwa ya EU mu bubanyi n’amahanga, Federica Mogherini yavuze ko gushyiraho inkambi y’agateganyo ari igikorwa gikomeye u Rwanda rwakoze, rukemera kurengera ubuzima bw’abaturage bari bakeneye gufashwa byihutirwa.

Ati “Ni ikimenyetso gikomeye cyo kwifatanya n’imikoranire n’Umuryango w’Ubumwe bw’u Burayi. Bari bamaze igihe bafungiwe mu bigo byo muri Libya, bikeneye gufungwa mu buryo bwihutirwa.”

Komiseri Mimica yavuze ko uyu mushinga uzunganira Guverinoma y’u Rwanda yemeye kwakira no kurinda impunzi n’abimukira bavuye muri Libya.

Ati “Ikimenyetso gikomeye nk’iki cy’ubufatanye bwa Afurika gikwiye kurushaho gushyigikirwa, kikiganwa kandi kigahabwa ubushobozi.”

Izo mpunzi n’abimukira bamaze kugera mu Rwanda bavuye muri Libya barimo 21 bakomoka muri Somalia, 153 baturuka muri Eritrea, 10 baturuka muri Sudani na batanu bo muri Ethiopia. Muri aba harimo abana 79 batari kumwe n’ababyeyi babo.

Kugeza magingo aya UNHCR imaze gukura muri Libya impunzi 4,250 n’abashaka ubuhungiro kuva mu 2017. Nyamara haracyabarurwa abandi basaga 4700 bafungiwe mu bigo bitandukanye, bakeneye ubutabazi bwihuse ngo bimurirwe ahantu hatekanye, aho ubuzima bwabo burinzwe.

Impunzi za mbere zamaze kwisanga mu nkambi ya Gashora

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza