EBM mu kwishyura amazi, imishinga y’isuku n’isukura: Bimwe mu bihanzwe amaso bitarenze 2024

Yanditswe na Cyprien Niyomwungeri
Kuya 19 Gashyantare 2020 saa 08:45
Yasuwe :
0 0

Imibare yerekana ko abaturage barenga 40% ku Isi yose bugarijwe n’ikibazo cyo kutagira amazi meza, ndetse hari ibyago by’uko bashobora kuziyongera biturutse ku mihindagurikire y’ibihe.

Abakurikiranira hafi ibijyanye n’isuku n’isukura, bahamya ko gukwirakwiza amazi meza ari ikibazo gikomeye buri mugabane ku Isi ukirwana na cyo, ari nayo mpamvu hashyizweho intego y’uko mu 2030 buri muturage ku Isi yaba agerwaho n’amazi meza kandi ahendutse.

Guverinoma y’u Rwanda n’ubwo irebwa n’intego z’iterambere rirambye, yiyemeje ko igihe ziteganya cyo kugeza amazi meza ku baturage cyazagera yaresheje uwo muhigo, yiyemeza ko nibura mu 2024, buri munyarwanda azaba agerwaho n’amazi meza yaba abatuye mu mijyi no mu byaro.

Ku rundi ruhande ariko uyu muhigo urakomeye kuko usaba ishoramari rikomeye mu bikorwa remezo by’amazi n’isukura ndetse n’ubukangurambaga bukomeye bwo kubibyaza umusaruro himakazwa isuku kuri buri rwego.

Imyaka irabarirwa ku ntoki ngo 2024 yo kuba u Rwanda rwagejeje amazi meza ku baturage bose igere. Kuri ubu, amazi akwirakwizwa mu bice by’umujyi ni metero kibe 187,293 ku munsi, ugereranyije na metero kibe 290,038 zikenewe ku munsi. Iki cyuho kizibwa binyuze mu gusaranganya amazi kandi bikorwa nk’igisubizo cy’agateganyo.

Minisiteri y’Ibikorwa remezo, ivuga ko igisubizo kirambye ari uko hari imishinga irimo gukorwa izongera ingano y’amazi atunganywa akava kuri metero kibe 267,660 ku munsi akagera kuri metero kibe 365,298 ku munsi.

Minisitiri w’Ibikorwa Remezo, Gatete Claver ati “Icyo turwana na cyo nko muri Kigali, ni ukugira ngo muri Kamena noneho dukurikije amafaranga twabonye ya Banki Nyafurika Itsura Amajyambere, adufashe mu bikorwa remezo”.

Avuga ko imishinga ihanzwe amaso harimo uwa Gihira wo kuvana ku bushobozi bwa metero kibe ibihumbi 15 zikagera ku bihumbi 23, Mwoya [Rusizi] ukagera kuri metero kibe 3000, Ngoma ni metero kibe 12 000, Busogwe muri Nyanza ni 12 000, umushinga wa Kagaga muri Muhanga uzatunganya metero kibe 9000.

Hari umushinga wa Mushogoro wa metero kibe 7000, uwa Sake wa metero kibe 6000, ku kiyaga cya Muhazi muri Gatsibo ni metero kibe 10 000, uwa Mwange muri Gicumbi haracyakorwa inyigo naho uwa Kanzenze ukazatunganya metero kibe 40,000 ku munsi.

Minisitiri Gatete ati “Hari imishinga myinshi itwereka ko dushobora kugira icyizere cyo kuva aho turi ubungubu, ubu mu gihugu cyose 267 660 metero kibe ku munsi mu 2024 hari intego yo kongeraho metero kibe ibihumbi 100”.

Uruganda rw'amazi rwa Kanyonyomba rwubatswe mu Murenge wa Gashora mu Karere ka Bugesera
Ruzakemura ibibazo by'amazi meza mu Karere ka Bugesera mu mirenge yakundaga kuyabura

Imiyoboro yo gukwirakwiza amazi ireshya na kilometero 568 muri Kigali na kilometero 351 mu mijyi yunganira Kigali irimo kongererwa ubushobozi. Uyu mushinga watangiye mu 2018 witezweho kurangira mu Ukuboza 2020.

Gukwirakwiza amazi meza mu bice by’Umujyi wa Kigali by’umwihariko i Kanombe, Kimironko, Nduba n’ahandi, byagizwe iby’ibanze binyuze mu kongera umubare n’ubushobozi bw’ibigega bikava kuri 24 [bifite ubushobozi bwa metero kibe 31,600], bikagera ku bigega 65 [bifite ubushobozi bwa metero kibe 118,500] mu Ukuboza 2020.

Minisiteri y’Ibikorwa remezo itangaza kandi ko hari imishinga y’amazi ikenewe cyane igera kuri 34, yatangiwe mu turere 13, aho abafite amazi meza bari munsi ya 70%; utwo ni Ngororero, Gicumbi, Gisagara, Rutsiro, Ruhango, Nyanza, Nyaruguru, Rusizi, Gakenke, Nyagatare, Gatsibo, Kayonza na Bugesera.

Mu miyoboro 43o itarakoraga mu 2017, igera kuri 78 yarasanwe , 53 irimo gusanwa naho igera ku 177 biteganyijwe ko izasanwa mu 2020-2021, mu gihe indi isigaye 122 izasanwa mu ngengo y’imari ya 2023/2024.

Ibiciro by’amazi byashyizwe ku murongo

Ibiciro by’amazi mu mijyi byavuguruwe muri Gashyantare 2019, mu gihe mu byaro byashyizweho muri Gashyantare 2017. N’ubwo habayeho iryo zamuka, igiciro ku ijerekani ntikigeze kirenga 20Frw.

Abaturage binubiye ko ibiciro by’amazi biri hejuru mu byaro no mu bice by’umujyi ariko byagaragaye ko bamwe mu bikorera n’abacuruza amazi batubahirizaga ibyo biciro.

Ibi biciro byavuguruwe kugira ngo bitume abacuruza amazi babasha kwita ku bikorwa remezo no kubisana.

Hari kandi abakiriya binubiye guhabwa inyemezabwishyu z’amafaranga menshi. Binyuze mu igenzura rya WASAC, uburyo bwo kwishyuza bwakozwe muri Mata 2019, ndetse hatanzwe ibyifuzo njyanama bikomeye birimo ko abakiriya 1462 bagizweho ingaruka n’ibyo biciro bizakosorwa.

Amavomero yose acungwa na WASAC yashyizweho ubutumwa bw’uko ijerekani ari amafaranga 20, ndetse na nimero yahamagarwaho mu gihe hari utabyubahirije.

Minisiteri y’Ibikorwa remezo itangaza ko kugeza ubu n’ubwo nta nyemezabwishyu (EBM) ihabwa abakiriya b’amazi ariko bishyura umusoro ku nyongeragaciro wa 18%.

Ivuga ko uburyo bw’ikoranabuhanga rizatuma ibi bishoboka bigeze kuri 46% bushyirwaho, ku buryo nibura mu mpera za Werurwe 2020 biteganyijwe ko uburyo bwa EBM bwazatangira gukoreshwa mu kwishyura inyemezabwishyu y’amazi mu mpera za Werurwe 2020.

Mu 2024 abanyarwanda bose bazaba bafite amazi meza

Ubushakashatsi bwa Gatanu ku mibereho y’ingo (EICV 5), bwerekana ko 87.4%, bagerwaho n’amazi meza ariko hakiri urugendo rwo kugera kuri gahunda ya Guverinoma y’imyaka irindwi (NST-1), yo kuba mu 2024 abanyarwanda bose bazaba bagerwaho n’amazi meza.

Minisitiri Gatete avuga ko ‘Ikindi kirimo gukorwa ni igishushanyo mbonera cy’amazi, aho hari inyigo irimo gukorwa yo kureba ahari amasoko y’amazi yose mu gihugu kugira ngo twirindwe kuba twashyira ibikorwa remezo biremereye ku mazi wenda azakama mu gihe runaka’.

Hari indi nyigo kandi yo kureba muri Kigali, uko mu 2050 izagenda yaguka n’abazaba bakeneye amazi.

Hari kandi kugeza amazi meza aho akenerwa cyane. Kugeza ubu hari amashuri 1197 [abanza 775 n’ayisumbuye 422], ibigo nderabuzima 59 adafite amazi ndetse n’ibindi bice bifite icyo kibazo.

Mu mishinga irimo gukorwa, ahantu 109 hakorerwa cyane hazagezwa amazi mu mwaka w’ingengo y’imari 2019-2020, ahandi 132 hazagezwa amazi mu 2020/21. Nibura muri Kamena 2021, kugeza amazi meza mu bice byose bizaba birangiye.

Mu Karere ka Gatsibo hubatswe uruganda rwa Gihengeri rufite ubushobozi bwo gutanga metero kibe 2500 ku munsi
Uruganda rw'amazi rwa Karenge ruzafasha abaturage kubona amazi meza

Gahunda y’isukura ntiyasigaye inyuma

Minisitiri w’Ibikorwa Remezo, Gatete avuga ko isukura ari nko gutangira bundi bushya, ariko hari ahantu nka 25 hakusanyirizwa imyanda ariko hose byakozwe nabi bigiye kongera gusubiramo bigakorwa neza mu buryo bugezweho.

Ati “Hari Nyagatare, Kayonza, Nyanza n’ahandi mu gihugu hose, tureba uko zishobora gukoreshwa no kuzubaka mu buryo bugezweho”.

Muri Kigali, ikimoteri cya Nduba kizakorwa mu buryo bugezweho, ubu kiri mu micungire y’abikorera ariko harangiye gukorwa amasezerano n’uzahakora mu buryo bugezweho ndetse agasiba n’ikimoteri cya Nyanza. Gusa hari inyigo imwe igomba kubanza kurangira mbere y’uko atangira.

Ati “Turashaka kugira ngo noneho wa mwanda usukika [ibivanwa mu misarane] na byo bigire aho bishyirwa i Masaka ahatoranyijwe, aho ibijyanye n’inyigo birimo gukorwa”.

Minisitiri Gatete avuga ko n’ibiciro bizahuzwa n’iby’amazi ku buryo uzajya wishyura ikintu ku mafaranga amwe ariko ukaba uzi neza ko aho utuye utekanye, aho ukorera utekanye kuri uwo mwanda.

Kuri ubu kandi Umujyi wa Kigali urimo guhuza inyandiko zose zikenewe zijyanye no kwimura abantu i Nduba, ibibanza n’imitungo biri mu gice cy’ikimoteri bikazishyurwa.

Kubaka uruganda rufata imyanda y’amazi rwa metero kibe 200 (Kigali Centralised Sewerage System) ku munsi birimo kongera gutangirwa isoko nyuma y’uko uwarihawe bwa mbere adashoboye gukora, byitezwe ko uru ruganda ruzaba rwuzuye mu Ukuboza 2020.

Uruganda rwa mbere rutunganya amazi mabi mu mujyi wa Kigali, byitezwe ko amasezerano azasinywa muri Kamena 2020. Kubaka bizatwara imyaka itatu, harimo gusumwa agaciro ko kurwubaka no kwimura abantu aho ruzubakwa ku Giticyinyoni.

Hari kandi kubaka uruganda rutunganya imyanda ituruka mu misarane, inyigo ikaba iteganyijwe mu mwaka w’ingengo y’imari wa 2020/2021.

Uruganda rw'amazi rwa Kimisagara rwongererewe ubushobozi mu gukemura ikibazo cy'amazi muri Kigali
Mu Karere ka Nyagatare hubatswe uruganda rwa Mirama rwakemuye isaranganya ry'amazi muri uyu mujyi
Abatuye ku kirwa cya Nkombo ntibakivoma amazi mabi
Uruganda rwa Nzove mu Karere ka Nyarugenge rwakemuye ikibazo cy'amazi mu bice bitandukanye by'Umujyi wa Kigali
Abatuye i Kigali baravuga ibigwi uruganda rwa Nzove

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .