Dusubize amaso ku mpinduka zimaze kuba muri Guverinoma muri iyi manda ya 3 ya Perezida Kagame

Yanditswe na Twarabanye Venuste
Kuya 14 Ugushyingo 2019 saa 08:05
Yasuwe :
0 0

Abayobozi bashya bashyizwe muri Guverinoma bararahirira kubahiriza inshingano zabo kuri uyu wa Kane tariki 14 Ugushyingo 2019. Ni Guverinoma irimo amasura mashya, impinduka mu mibare y’abayigize n’igaruka rya Minisiteri nshya.

Abagize Guverinoma yatangiranye na Manda ya Gatatu ya Perezida wa Repubulika Paul Kagame barahiye ku wa kuwa 31 Kanama 2017. Yari igizwe n’Abaminisitiri 20 n’Abanyamabanga ba leta 11 bose hamwe bakaba 31.

Kuva icyo gihe Perezida Paul Kagame yagiye akora impinduka zitandukanye, aho yagiye yongeramo amaraso mashya abandi akabahindurira imirimo.

Muri Guverinoma, hagiye habaho impinduka zasize abagera kuri 48% mu batangiranye na Guverinoma ya manda ya gatatu ya Perezida wa Repubulika Paul Kagame aribo bakiyirimo, mu gihe 52% bayinjiyemo nyuma ya Werurwe 2018.

Perezida Paul Kagame yarahiriye kuyobora u Rwanda muri manda ya gatatu, ku wa 18 Ukwakira 2017.

Ku wa 30 Kanama 2017 yashyizeho Guverinoma iyobowe na Dr. Edouard Ngirente, wagizwe Minisitiri w’intebe avuye muri Banki y’Isi. Abayigize barahira ku wa 31 Kanama 2017.

Nyuma y’imyaka ibiri Guverinoma igiyeho, abagera kuri 16 ntibakiyirimo bivuze ko kuri 31 batangiranye nayo hasigaye 15 ni ukuvuga 48%.

Nyuma yaho hagiye haba izindi mpinduka muri Guverinoma aho kuwa 06 Mata 2018 uwari Minisitiri w’ibikorwa remezo, Musoni James yasimburwaga kuri uwo mwanya na Amb. Claver Gatete wari usanzwe ari Minisitiri w’Imari n’igenamigambi, umwanya we ugahabwa uwari Umunyamabanga wa leta muri Iyo Minisiteri, Dr. Uzziel Ndagijimana.

Nyuma y’amezi atandatu izo mpinduka zibaye Perezida Kagame yongereye amaraso mashya muri Guverinoma, bongeye gukora impinduka maze abayigize bava kuri 31 bagirwa 26.

Izo mpinduka zatumye abarimo Gen. Albert Murasira, yinjira muri Guverinoma nka Minisitiri w’Ingabo, Prof. Shyaka Anastase nka Minisitiri w’Ubutegetsi bw’Igihugu, Ingabire Paula nka Minisitiri w’Ikoranabuhanga na Inovasiyo na Soraya Hakuziyaremye nka Minisitiri w’Ubucuruzi n’Inganda.

Impinduka ziheruka muri Guverinoma zabaye ku wa 04 Ugushyingo 2019 zizana amasura mashya nyuma y’uko bamwe mu bagize Guverinoma babaye Abasenateri, n’Uwagizwe Ambasaderi. Zagaruye kandi Minisiteri y’Umutekano yari imaze imyaka itatu ivuyeho.

Habayeho gutandukanya Minisiteri ya Siporo n’Umuco maze umuco ushyirwa muri Minisiteri y’Urubyiruko ihabwa n’Umunyamabanga wa Leta umwanya utari usanzweho. Minisiteri y’Ibikorwa remezo yigeze kugira abanyamabanga ba leta barenze umwe ubu nta n’umwe ifite.

Ni Guverinoma irimo amasura mashya, impinduka mu mibare y’abayigize n’igaruka rya Minisiteri nshya.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza