Dushore intambara ifunguye ku bagabo n’abahungu bakomeje kudusambanyiriza abana- Amb. Nyirahabimana

Yanditswe na Habimana James
Kuya 11 Ugushyingo 2019 saa 08:08
Yasuwe :
0 0

Minisitiri w’Uburinganire n’iterambere ry’umuryango, Amb. Nyirahabimana Solina, yabwiye abagize Inama Nkuru y’Urugaga rw’Abagore rushamikiye kuri FPR Inkotanyi, gushoza urugamba ku bagabo n’abahungu bakomeje gutera inda abana b’abangavu, kuko iki kibazo gikomeje kuba imbogamizi ku muryango nyarwanda.

Minisitiri Nyirahabimana yabigarutseho kuri iki Cyumweru ubwo yitabiraga inama nkuru y’urugaga rw’abagore, yahuje abagore b’abanyamuryango bagera ku bihumbi bibiri, yabereye ku cyicaro gikuru cy’umuryango FPR Inkotanyi i Rusororo, muri Intare Arena.

Ni inama yitabiriwe kandi na Madamu Jeannette Kagame, ikaba yari ifite inyanganyamatsiko igira iti, ‘Abagore, duharanire umuryango ushoboye kandi utekanye’.

Minisitiri Nyirahabimana ubwo yasobanuraga ku ishusho y’umuryango nyarwanda muri iki gihe, yavuze ko nubwo hari ibyakozwe ngo utekane, hakiri ibibazo bikomeye kandi bigomba guhagurukirwa.

Imibare itangwa na Minisiteri y’ubuzima igaragaza ko mu 2017 abangavu babyariye kwa muganga bari munsi y’imyaka 19 bari 17,337, mu 2018 baba 19,832, na ho mu mwaka wa 2019 guhera muri Mutarama kugeza muri Kanama ababyaye ni 15,696.

Naho imibare y’uburyo ibirego byo gusambanya abana byatanzwe igaragaza ko mu 2016/17, Urwego rw’Igihugu rw’Ubugenzacyaha, RIB, rwakiriye ibirego 2091, mu 2017/18 biba 3060 naho mu 2018/19 yakira ibirego 3512.

Mu bantu bakurikiranyweho ibi byaha, mu 2018/2019 ni 3417, mu 2017/18 bari 3001 naho mu 2016/2017 ni abantu 2092.

Iyi minisiteri igaragaza ko muri rusange, kugeza ubu miliyoni 12 arizo zituye u Rwanda, abagore bakaba ari 52%, abagabo ni 48%. Abari munsi y’imyaka 35 ni 60%, naho 16% bari mu bukene bukabije.

Minisitiri Nyirahabimana avuga ko abana b’abangavu bangana na 7% bari hagati y’imyaka 15-19, byagaragaye ko babyaye.

Agaragaza ko iki ari ikibazo kigomba guhagurukirwa na buri wese, niba koko abantu bifuza kugira umuryango utekanye.

Yagize ati “Dushore intambara ifunguye ku bagabo n’abahungu bakomeje kudusambanyiriza abana bacu, abagize urugaga twese impinduka twifuza tugomba kuyikorera kandi muri iki gihe ntabwo tubisaba kuko twarabihawe, turi mu nzego zifata ibyemezo ntacyo twakwitwaza, ni nayo mpamvu inama nk’iyi twiringira ko turi bufate ingamba zidufasha mu iterambere twifuza, turwanye ibi bibazo.”

Umwaka ushize wa 2018, warangiye mu Turere dutanu twaje imbere mu kugira abangavu benshi batewe inda zitifuzwa, tune twari utwo mu Ntara y’Iburasirazuba.

Raporo ya Minisiteri y’Ubuzima igaragaza ko Akarere ka Nyagatare kaza ku mwanya wa Mbere n’abana 1465 batewe inda, Gatsibo ifite abana 1452, Kirehe 1055 na Bugesera ifite abangavu 925 batewe inda zitifuzwa. Gasabo nayo ifite abana 1064 batewe inda umwaka ushize.

Iyi nama yahuje abagore b’abanyamuryango bagera ku bihumbi bibiri
Dr Nyirahabimana Jeanne wagizwe umunyamabanga Nshingwabikorwa w'Intara y'Iburasirazuba (hagati) ubwo yifatanyaga n'abandi bagore kwishimira ibyagezweho
Dr Pierre Damien Habumuremyi (ibumoso) ni umwe mu bitabiriye iyi nama y'urugaga rw'abagore rushamikiye kuri FPR Inkotanyi
Madamu Jeannette Kagame yitabiriye inama nkuru y'urugaga rw'abagore rushamikiye kuri FPR Inkotanyi
Minisitiri w'Uburinganire n'iterambere ry'umuryango, Amb. Nyirahabimana Solina, yavuze ko hagomba gushozwa urugamba ku bahungu n'abagabo bakomeje gusambanya abana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza