Dushaka ko Abanyarwanda bagira ubuzima bwiza ariko ntibicwe n’inzara -Perezida Kagame

Yanditswe na Ferdinand Maniraguha
Kuya 6 Nzeri 2020 saa 03:01
Yasuwe :
0 0

Perezida Paul Kagame yashimye imbaraga u Rwanda rukomeje gushyira mu guhangana n’icyorezo cya Coronavirus gikomeje kuzengereza isi, avuga ko rukomeje gushakisha amikoro ku buryo imbaraga zo guhashya icyo cyorezo zidahagarika ubundi buzima bw’igihugu.

Yabitangaje kuri iki Cyumweru ubwo yaganiraga na RBA, ku ngingo zitandukanye zijyanye n’ubuzima bw’igihugu.

Tariki 14 Werurwe 2020 nibwo Minisiteri y’Ubuzima yemeje ko Umuhinde wageze mu gihugu ku wa 8 Werurwe 2020 avuye i Mumbai, yasanganywe icyorezo cya COVID-19 giterwa n’agakoko gashya ka Coronavirus.

Kuva icyo gihe, mu Rwanda hamaze kuboneka abantu 4349 bayanduye barimo 18 bamaze guhitanwa n’iki cyorezo.

Perezida Kagame yavuze ko mu mezi asaga atanu ashize u Rwanda rwitwaye neza mu guhangana na Coronavirus.

Ati “Ntabwo bivuze ko kitatugizeho ingaruka zidashimishije nk’abandi ariko turi mu ba mbere no ku isi yose mu buryo bwo kuba twarahanganye n’iki cyorezo tukakibuza kudutwara benshi cyangwa kwanduzqaa benshi.”

“Kugira ngo uwo mwanya tube twarawubonye mu ba mbere, byavuye ku mbaraga z’abanyarwanda, ntabwo byikoze ni abantu babikoze ariko ibijyanye n’ubukungu, imibereho y’abantu byose byarahungabanye ariko mu buryo bwo guhungabana abantu bashoboye no kubaho ubuzima bwabo uko bishoboka.”

Perezida Kagame yavuze ko akurikije uburyo yumvaga icyorezo kizakomerera u Rwanda, atari ko byagenze.

Yavuze ko ingaruka za Coronavirus zizagera no ku bukungu bw’igihugu n’ubw’Isi muri rusange, gusa ashimangira ko Leta izakomeza gukora ibishoboka byose ubuzima bw’abaturage n’imibereho yabo ntibibangamirwe cyane.

Ati “Ni ugushakisha uburyo ubuzima butahagarara ahubwo tukajanisha dukurikije uko ikibazo giteye, dushaka uko abanyarwanda bagira ubuzima bwiza, ntibuhangabanywe n’iki cyorezo ariko nabwo ntibicwe n’inzara. Ntibibe hagati byo kwicwa n’icyorezo cyangwa kwicwa n’inzara.”

Yavuze ko Leta izakomeza gushakisha amikoro kugira ngo ubuzima bw’igihugu bukomeze.

Perezida Kagame yagaragaje uruhare rw’amahanga mu bwicanyi bwabereye muri Congo bukegekwa ku Rwanda
Perezida Kagame yavuze ko ibibazo by’u Rwanda na Congo byatangiye kera kandi amateka agaragaza ko atari u Rwanda rwabitangije
Perezida Kagame yavuze ko abakomeje gukuririza ibyo bibazo bashatse bakwitonda kuko uruhare runini ruri kuri bo kurusha abandi bose
Perezida Kagame yavuze ko ubwo Jenoside yakorewe Abatutsi yabaga, nabwo abagize uruhare muri Jenoside bambutse bajya muri Congo bakakirwa neza
Perezida Kagame yavuze ko ibibazo bivugwa muri Rayon Sports bikurikiranwa na Minisitiri Munyangaju Aurore Mimosa kandi yizera ko byabonewe igisubizo
Iki kiganiro cyabereye muri Village Urugwiro ku Kacyiru
Abanyamakuru b’Ikigo cy’Igihugu cy’Itangazamakuru, RBA, Barore Cléophas na Fiona Mbabazi ni bo bayoboye ikiganiro

Amafoto: Village Urugwiro


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .