Mokaddem yabitangarije IGIHE mu kiganiro cyihariye nyuma y’umuhango wo kwibuka ku nshuro ya 28 Jenoside yakorewe Abatutsi wateguwe n’itsinda ry’Abanyarwanda batuye muri Niamey, Niger.

Iki gikorwa cyabereye muri Radisson Blu Niamey mu Murwa Mukuru wa Niamey muri Niger, ku wa Gatandatu, tariki ya 28 Gicurasi 2022.

Salim Mokaddem, usanzwe ari umwarimu wa Philosophie muri Kaminuza ya Montpellier, yavuze ko Jenoside yakorewe Abatutsi mu Rwanda, ari ubwicanyi ndengakamere, bukwiriye guhashywa aho ari ho hose.

Ati “Abazize Jenoside yakorewe Abatutsi mu Rwanda uyu munsi ni urugero rw’abaturage batereranywe, bigatanga ubutumwa bw’uburyo byihutirwa kongera kubasubiza ubuzima tubibuka, twirinda ko bazigera bibagirana na rimwe.”

Yagarutse ku ruhare rw’ingengabiterezo ya Jenoside n’imvugo z’urwango zabanjirije Jenoside yakorewe Abatutsi no mu gihe yakorwaga, zigatambuka ku binyamakuru birimo RTLM.

Mokaddem yavuze ko “Ibyo bikwiriye gutuma twongera gutekereza ku gaciro k’ubuzima, ku ndangagaciro zikwiriye muri politiki n’imyitwarire iboneye.”

Yakomeje agira ati “Ibyabaye mu Rwanda bikwiriye gutuma dutekereza ku mbaraga z’ingengabitekerezo, imbaraga z’amagambo akoreshwa n’uruhare rw’itangazamakuru mu buzima bw’abaturage, politiki no mu mateka.”

Yavuze ko ubu igihangayikishije cyane ari abantu bakomeje gukwirakwiza ingengabitekerezo ya Jenoside, bahakana iyakorewe Abatutsi cyangwa se bagashaka kugoreka amateka kugira ngo bagabanye ubukana bwayo.

Salim Mokaddem yavuze ko guhakana amateka nka Jenoside yakorewe Abatutsi ari “ubugwari bwo kwanga kwemera ukuri.”

Yavuze ko Isi igomba gucungira hafi abo bantu. Ati “Ni uburyo bwo gushaka guhindura amateka no kuyasobanura uko atari. Bivuze ko dusabwa kuba maso haba muri gahunda zijyanye n’amateka, mu bushakashatsi n’ibindi byose bidufasha guhererekanya ayo mateka, twirinda ko habaho kuyagoreka haba mu buryo bwa politiki n’imyumvire.”

Mokaddem yongeyeho ko kurwanya abo bantu bikwiriye kujyana no guhana, binyuze mu bufatanye bw’ubutabera mpuzamahanga.

Ati “Mu bahakana Jenoside harimo abanyabwenge bafite intego yo guhindura amateka n’ukuri kugira ngo bigarure imitima y’abaturage, bagere ku butegetsi. Ni inshingano kwirinda ko baturangaza bikaba byaba intandaro y’ibindi byaha.”

Yakomeje agira ati “Abahakana Jenoside n’ababiba amacakubiri nubwo ari abantu batandukanye ariko bose icyo baba bagamije ni uguhindura amateka bagabanya uburemere n’ukuri kwayo, kuyatesha agaciro ku buryo bishobora gutuma habaho indi Jenoside kuko batumva uburemere bw’ibyabaye.”

Mokaddem yagarutse ku bubi bw’amateka yagejeje kuri Jenoside yakorewe Abatutsi mu buryo bwimbitse nk’umuntu wabimenye rugikubita akabikurikirana kubera akazi yarimo, agaragaza ko Isi idakwiye kongera kuyanyuramo.

Yashimye Leta y’u Rwanda yakomeje gusigasira ubumwe bw’Abanyarwanda bwari bwasandaye.

Mu ijambo rye yavuze ko ibyo avuga abivuga nkawe kandi nk’intumwa y’umukuru w’igihugu cya Niger, ushima ibyo mugenzi we Paul Kagame yagejeje ku Rwanda nyuma y’aya mateka rukaba ari icyitegererezo muri Afrika.

Yakomeje ati “Ibi si ibintu bisanzwe kubona u Rwanda rw’uyu munsi nk’igihugu cy’icyitegererezo, habayeho gukora cyane no kugira ubuyobozi bwiza.’’

Ikiganiro cyihariye IGIHE yagiranye Salim Mokaddem mu rurimi rw’Igifaransa

Ambasaderi w’u Rwanda muri Niger, Stanislas Kamanzi, yatanze icyifuzo ku buyobozi bwa Niger asaba ko hashyirwaho urwibutso rwihariye mu Kwibuka Jenoside yakorewe Abatutsi

Jean Pierre Nkuranga yari ahagarariye Ibuka-Rwanda. Yashimye ubuyobozi bw'igihugu bwongeye kucyubaka n’ingabo zahoze ari iza FPR Inkotanyi zahagaritse Jenoside

Kayiranga Didace ni we wayoboye igikorwa cyo Kwibuka Jenoside yakorewe Abatutsi muri Niger

Salim Mokaddem, Umujyanama wihariye wa Perezida wa Niger, Mohamed Bazoum, yashimye uko u Rwanda rwiyubatse nyuma ya Jenoside

Dr Gloriose Daouda Gashugi uyobora Diaspora Nyarwanda muri Niger yasabye amahanga kutareberera abakekwaho Jenoside bayihishemo

Buri wese yasabwe uruhare mu guhangana n'abahakana cyangwa abapfobya Jenoside yakorewe Abatutsi

Abitabiriye bunguranye ibitekerezo ku kamaro ko kwibuka no guhangana n'abapfobya cyangwa abahakana Jenoside yakorewe Abatutsi

Ubuhamya bwa Diane bucishijwe muri film mbarankuru 'Ma revanche' yakozwe na Karirima Ngarambe Aimable

Ubuhamya bwa Diane bucishijwe muri film mbarankuru 'Ma revanche' yakozwe na Karirima Ngarambe Aimable

Abanyarwanda n'inshuti z'u Rwanda bari baje kwifatanya kwibuka Jenoside yakorewe Abatutsi

Uhereye ibumoso: Salim Mokaddem, Umujyanama wihariye wa Perezida wa Niger, Mohamed Bazoum; Ambasaderi Stanislas Kamanzi uhagarariye u Rwanda mu bihugu bimwe by’Uburengerazuba bwa Afurika birimo Chad, Burkina Faso, Niger ufite icyicaro muri Nigeria; Jean Pierre Nkuranga wari uhagarariye Ibuka Rwanda; Dr Gloriose Daouda Gashugi uyobora Diaspora Nyarwanda muri Niger n'abana ubwo bacanaga urumuri rw'icyizere

Aimée Mpambara na Alida Faraya bateguye igikorwa cyo Kwibuka Jenoside yakorewe Abatutsi muri Niger

Muganga Eric (iburyo) ni umwe mu bayobozi ba Radisson Blu yakorewemo igikorwa cyo kwibuka Jenoside yakorewe Abatutsi mu 1994. Yari kumwe n'abandi Banyarwanda bakorera mu Mujyi wa Niamey

Abanyarwanda baba muri Niger bifatanyije n'inshuti zabo kwibuka Jenoside yakorewe Abatutsi mu 1994

[email protected]